Amos 5 - Nobonob Baibel

Israel ag eɗun, Yawe dim lamidkkulagnu nai

¹ O Israel danab ah, da nai oo doyak ele butti aɗi ahilagppa bekku amu, da amunu madippi, ag doyeg!

² “Israel wan am ah makkun laa na qa malom, eɗua ii ahama, am amubia daatte. Ao, Israel ag ahilag wanppa na qak anam niitteb; laa ehanatteb ahaglagnu iitta.” ⌊Nai oo doyak ele am anam.⌋

³ Israel dilagppa am anam bekku. Aɗinu? Naɗi Yawe Nug amunu inam atte. “Kekeɗ ag uɗippeg, aab okkai attenppan danab 1,000 ag ahan, ban hak abenppa laippu tappan gokkulag amu, kekeɗ ag aqadppeppeg, 100ib daaglag. Ao, aab laappan danab 100 ahan goppeg, 10ib daaglag,” awa atte.

⁴ Laa amu, Yawe Nug Israel danab ah amelagppa atte. “Israel danab ah, ag bau daaglagnu, ag da aniɗna dim lamiɗkkulagnu da mattiɗna oiyeg!

⁵ Amge ag amu hekkulagnu ag Betel appa aib mattiɗna goppig. Ag Gilgal ele aib goppig. Berseba ele aib goppig. Aɗinu? Kekeɗ ag genab uɗin, danab ah Gilgal appanu diin goppeg, Gilgal danab ah ag wan laappa diia ukka laih me dayak danab ah daaglag. Ao, kekeɗ ag ele Betel loppaɗna heppeg, nauha autanab awa daakku.” Yawe anam atte.

⁶ Ag Israel danab ah, ag eɗun, Yawe mattina, dim lamidkkulagnu mattieg! Iitta amu, aab aɗu paha keeke ewe iitta mette, amubia Yawe Nug paha bu matteb, ag padal mekkulag. Nug anam hekku dayeb amu, kayak hambuppuak ahilkad Betel appa ag padal mak amu, aab aɗu huana diditte bia amu, kayak hambuppuak amu ag ehanadkkulagnu elele iitta.

⁷ Ag laa ag nai doya mala hettoɗia epeɗia elele mettak kobol aon kabolin heeg, uud ad tiig mua ele bette. Ao, ag genab tutukku hak kobol aon buɗieg, wanppa nette; ahilagnu am gadonnab!

⁸ ⌊Ag laa ag anam hetteb amu, ag⌋ Laa Nug hoɗoppai huu mak laa onig Pledes, laa onig Orion ele, Nug ag hatta, abenalkadppa mattom daatteb, ag Laa Nug he, tuqannu gatatu am eɗua, wagkkaɗakppa amahlak daatte, ag Laa Nug he, amunnu amahlak am eɗua, tuqannu gatatu daatte, ag Laa Nug he, yuppan le am wan tonadtte, Nug onig am Yawe, ⌊ag Nug mattina, dim lamidkkulagnu mattieg⌋!

⁹ Yawe Nugib Nug he, ban haknu aben ɠagattag aakku nauhtte. Ao, Nug he, aab ɠagattag aɗ ele, aab amu nauha autanab aotte.

¹⁰ Ag Israel danab ag epeɗittak danab kobol tutukku hettebnu nau ninig ele dootteb. Ao, ag danab ag ⌊hettoɗiakppa⌋ nai genabib maditteb, ag ahilagnu ena iinab dootteb.

¹¹ Ag daɗek danab keeke ebappig ele, ag attem attem ebappignu takis mekkulagnu heeg mattaeg; ag ee aeg awak dimppa ele takis amunu laa ele aotteb. Ag danab eheɗ amu hetteb ele, ag anam hetteb amunu, ag laulkad ena ena, men otaɗa babaittak eleppa hadappig amu, ag lag amuppa ii daamna. Ao, grep dad ag eppaladppig amu, ag amuppanu wain ii lamana.

¹² Aɗinu? Da ahilag tappe naknu ebqak okkai amu, da doottem. Ao, da ahilag hipunin, ag am eheɗ nau amu, da amu ele doottem. Amuam ag genab tutukku hak danab ele kekeɗ madatteb. Ao, ag lokkumakppa eheɗ haknu ehanittak aotteb. Ge, ag ele hettoɗiakppa daɗek danab dilagnu nai doya mala hettoɗia epeɗia elele mettak kobol ii dim lamidtteb.

¹³ Ag amu heegeg, haen nau aakku daatte amunu, haen imu biappa laa ag eheɗ bemanu dabmak awa dabmak amu dim lamittak danab, ag oɗelag qamutna daatteb.

¹⁴ Amu ag genab bauklel daaglagnu amu, ag kobol nau amu uuna, ag digmena, kobol ena heig! Ag anam heppeg amu, Yawe Kayak Nukka Ɠagattag Oh Ele, ag gemu nuhignu, “Yawe ig ele daattem,” atteb amu, Nug anak amubia, Nug ag ele daaglag.

¹⁵ Ag kobol enanu amu, ag oo mauhak doon, ag kobol naunu, ag nau ninig ele doyeg! Ag hettoɗiakppa nai doya mala hettoɗia epeɗia elele mettak kobol ele dim lamitteg! Ag anam hebeppeg amu, Yawe Kayak Nukka Ɠagattag Oh Ele, Nug geha ag Israel danab ah, oɗo yaak daaglag, Nug ahilagnu oo gai-iitta doya oo matta ehanadkkutai.

¹⁶ Anam amunu Naɗi, Nug Yawe Kayak Nukka Ɠagattag Oh Ele, Nug atte. “⌊Israel ag hipunin huanak hetteb amunu,⌋ ag uug naunab anidna, ag aab okkainu ib ohppa qanaglag. Ao, danab ah ag aabnu haɗap ohppa eheɗ gaaglag. Laa ag dad okkai hak danab ag ele gaaglagnu onilagppa ekkulag. Yo, laa ag mauhak haenppa mahiak hetteb ele amu, laa ag ag mahiglagnu onilagppa ekkulag.

¹⁷ Da ag bu madakkulnu uɗien, ag oolagppa oikkul amunu, ahilag grep dad ohppa mahiak okkai daakku.” Yawe Nug anam awa atte.

Yawenu deɗ naɗi

¹⁸ Israel danab ah ag Yawenu deɗ naɗi, ag deɗ amu ameg menan tappaɗidtteb ele, ahilagnu amu gadonnab gadon. Ag aɗinu deɗ amu paha ahilagppa uɗikkunu oolag daye tappaɗidtteb? Deɗ amu geha gatatuib daakku; amahlak laa ii daama.

¹⁹ Deɗ amu geha danab laa nug doɗ laion laa baɗitta, oola ukka, doɗ bea laa noobppa watte bia daakku. O iitta, danab laa nug ⌊aɗi keeke baɗitta oola,⌋ laug ooppa noa, nug eppeg bahia, lagnu gilil aɗa hik aokkunu heehe, mat nau laa eppeg emaltte bia daakku.

²⁰ Yawenu deɗ naɗi amu, deɗ amu geha gatatu, amahlak iitta ele iite daama? Ge, deɗ amuam gatatu naunab, amahlak nakoknab laa iitta iite daama?

²¹ Yawe atte. “Ag hobul da ag hekkulagnu ami amu, ag hetteb, amge ⌊ag hambuppun hetteb⌋ amunu, da nau ninig ele doottem. Ge, da amunu ena iinab doottem Ag da onilppa qagmak okkai hetteb, amge ⌊ag hambuppuna heeg,⌋ da qagmak okkai amunu amu, da nau aakkuib doottem.

²² Ag manaknu ofa hekkulagnu doɗ aon uɗin, manadna meɗaglagtai, o iitta ag ee aegnu ofa da meɗaknu ee aeg akkan uɗin, manan meɗaglagtai. Ag amu hekkulagtai, amge ⌊ag hipunin uuglagnu uun autna aotteb amunu,⌋ da mana mettak amu ii aopa. Yo, ag da ele laippu dayaknu ofa hekkulagnu doɗ ena ena akkan uɗin, manadna meɗaglagtai, amge ⌊ag hipunin uuglagnu uun autna aotteb amunu,⌋ da mana mettak amu ii dabmepa.

²³ Ahi ag ettaladtteb, ahi amu hamu oqottiib bette, ag aib baula ettaladppig. Yo, da ag ahi harp-ppa qedatteb amu, da baula ii doopa.

²⁴ Ag hambuppuak kobol amu oh uueg! Amge ag nai doya mala hettoɗia epeɗia elele mettak kobol lailkad dilagppa, le okkai ugakkaib gotte bia dim lamitteg! Ao, ag genab tutukku hak kobol, lenag laa hanhan ugakkaib daatte, iitta ii mette, ag amubia henanaib dayeg!

²⁵ O Israel danab ah, ag atu taɗakppa maɗ 40 oinna, ag ⌊oolag genab meɗan, da ool hette bia⌋ ofa iɗu iɗu meɗappigte. Iitta.

²⁶ Ag ahilag kayak hambuppuak Sakut, ag nuhignu, ‘Ihinig king,’ dootteb ele amu, ag nug dottog maon oinna, ag kayak hambuppuak laa onig Kaiwan, nug dottog am hoɗopai dottog bia hoippig ele amu, ag amu ele maon oin, aa nooltippa dup nona binalah meppig

²⁷ amunu, da heppi, kekeɗ ag uɗin, ag eɗadna diiadppeg, ag Damaskus eɗitta wanak, appa diia ukka laih me dayak danab ah daaglagnu gokkulag.” Yawe, Nug onig laa am Kayak Nukka Ɠagattag Oh Ele, Nug anam awa atte.