Amos 4 - Nobonob Baibel

Samaria ah dilag nai

¹ Amu Yawe Nug atte. “Samaria ah, ag nai imu doyeg! Ag amu, ag makau, Basan appa ⌊gikkiɗah enaib lanana, beɗulag enaib daatteb,⌋ ag amubia daatteb. Ag daɗek danab ah eheɗ hattanna, ag laa keeke iitta ele am hatteg nauhtteb. Ag amu henana, ag ahilkad danab amelagppa, ‘Le ɠagattag aon doppeg latu!’ aon atteb.

² Anam amu, da, Naɗi Yawe, da oppiaawak daattem, da amuppa dahil nai ɠagattag qetten, imu genab bekkun daatte attem. ‘Haen laa genab uɗitte amu, kekeɗ ag uɗin, ag Samaria ah nau amu hetteb amu, ag ag aɗualadna, hukppa diin gokkulag. Ao, ag nid ahilkad, danab nug kakai hukppa eeɗtte, ag amubia ag diin gokkulag.

Israel ag Kayak nai ii dabmeppig

³ Ag diiadna gobeppeg, aabnu aɗ loppaɗakppa, ag tutukkuib gokkulag; talilidna odppa gona gokkulagnu am iitta. Kekeɗ ag diin gona, Harmon ib ukkakppa buɗiadppeg gokkulag.’ ” Yawe Nug anam awa atte.

⁴ Amu Yawe Nug atte. “Ag ahan, Betel gona, hipunin heig! Ao, ag ahan, Gilgal gona, hipunin baubau tuɗidna heig! Ag buttua oh ahilag mana mettak aon uɗin, qaɗabppa manatteg! Ge, ag maɗ ewam ewamppa ahilkad keekenu obatak eblaih tanig ele ooppanu, obatak laippu aon uɗin, Lewi buɗub matteg!

⁵ Ag ena heme anaknu ofa hekkulagnu bret yis ele aon uɗin, maneg! Yo, ag akka ag ɗo hamu mettaknu ofa laala ele henan, danab ah laa amelagppa ag akka binalag mena, ag appeg doyeg! Ge, ag Israel danab ah, ag akka ag amunu binalag meig! Aɗinu? Ag amu hekkulagnu oolag huana daatte.” Naɗi Yawe Nug anam atte.

⁶ Amu Yawe Nug atte. “Da hei, ag aab okkai ohppa ee iitta daappig. Ao, aab naunau ohppa ag bret iitta daappig, amge ag eɗun, da dim lamiɗkkulagnu da gumiɗna ii uɗippig,” awa atte.

⁷ Yawe Nug anam ana amu, Nug ele atte. “Wit, bali keeke meu awak haen nakok miag doob, kalam ewam uueb, meu oɗueb aolob amu, haen amuppa da hei, gu pehettak ii neum. Da hei, gu aab laappaib ne, aab laappa ii neum. Ao, gu dad okkai laappa ne, dad okkai laappa ii neum amunu, dad okkai laa gu ii neum ele amu, keeke qaɗaiettom.

⁸ Gu ii nedeppa amu, appa le iitta daye, danab ah ag beɗulag gai-iitta daye, ag ahan qiin ona, qiin donana, aab laappa le mattin goppig; amge ag le lakkulagnu elele ii aoppig. Da hei, ag Israel, ag ahilagppa anam beum, amge ag eɗun dim lamiɗkkulagnu da gumiɗna ii uɗippig,” awa atte.

⁹ Yawe Nug anam ana amu, Nug atte. “Haen kuɗum da hei, ahilkad dadppa, ahilkad grep dadppa ele eenu oɗe ba, ahilkad ee amu he nauhom. Ao, da hei, ahilag dadppan keeke oɗenu nauhppig. Da hei, tap-lokus ag uɗin, ad fig, ad olip ahilkad ele heeg nauhppig; da amu hemi, amge ag eɗun, da dim lamiɗkkulagnu da gumiɗna ii uɗippig,” awa atte.

¹⁰ Yawe Nug anam ana amu, Nug atte. “Da anukka Isip danab ah uug naunab aqadkkunu hei aqom amu, da uug amuib ag Israel, ag aqadkkunu hei aqom. Ao, da hei, ban ahe, ahilkad nid bau ag banppa daan, qep elabppa mauhegeg, kekeɗ ag ag Israel, ahilkad bannu hos ele diin aqatteg mauhppig. Ge, da hei, anam be, danab, hos ele gaɗalkad beɗaegeg, uɗig nau ahilag haen tutu dayaknu aab kalappigppa dayom. Keeke amu oh ahilagppa beum, amge ag eɗun, da dim lamiɗkkulagnu da gumiɗna ii uɗippig,” awa atte.

¹¹ Yawe Nug anam ana amu, Nug ele atte. “Da hei, ag oolagppan laa ag Sodom, Gomora danab padal meppig, amubia padal meppig. Ge, ag am aab bau maha laa, danab nug aab maha amu ewebeb, eɗua aotte, tuɗitta ii eotte, ag amubia daappig, amge ag eɗun, da dim lamiɗkkulagnu da gumiɗna ii uɗippig,” awa atte.

¹² Yawe Nug anam ana amu, Nug ele atte. “O Israel danab ah, ag anam aakku heegeg uɗie, gemu ele hetteb amunu, da bu okkai ag madakkul. Ge, da bu okkai madakkul amunu, O Israel danab ah, ag da, da ahilag Kayak, ag da uɗal tekkulagnu babaitteg!” awa atte.

¹³ Yawe Nug anam attenu diig am, Nugib am laa qauko heum, Nugib am laa Nug he, ulah iwala oitte, Nugib am laa Nug dabmak nuhig danab ah ippunadtte, Nugib am laa Nug he, aam bette haenppa gatatu nette, Nugib am laa Nug qauko attan igippa ele oitte; Nugib am laa Nug keeke amu oh hette. Nug am Yawe Kayak Nukka Ɠagattag Oh Ele. Nug onig am aakku.