Amos 3 - Nobonob Baibel

Israel ag aɗi heegeg anidppignu danab ag hettoɗiak abenppa amunu appeg doyaknu ewak

¹ Ag Israel, ag Yawe Nug ag eheɗ heppignu aum amu, ag nai amu doyeg; Nug nai aum amu, Nug ag aun aɗi, Nug ag Isipnu diia uɗiom buɗulkad daatteb amu, Nug ahilagnu aum.

² Yawe atte. “Danab huu digdig kuɗum wanppa daatteb, amge da ag Israel aakkuib da ag tituanadmi. Da anam hei, ⌊ag dahilad danabnab daatteb,⌋ amge ag hipunin huanaknab hetteb amunu, da ag bu aqakkul,” awa atte.

³ Danab aɗit laa aa oolah laippu iitta ele, aa oh laippu oiglahnu elelete? Iitta!

⁴ Laion nug doɗ laa qa lakkunu oiyaya, nug doɗ laa ad qataiettak daattebppa ii antta dayaya, gayak okkai hettete? Iitta! Laion bau nug ele appidppa doɗ laa lakkunu ii qa dayaya, nug liɗimttete? Iitta!

⁵ Danab laa nug ai awaknu uhui ii meum, amuppa ai nug uhui ooppa nottete? Iitta! Doɗ nug baeg uhui ooppa ii me no amu, uhui nukka ba tettete? Iitta!

⁶ Haen aab okkai laappan aɗi uɗitte anittak danab nug kekeɗ uɗitteb antta, nug trampet iwale amu, aab okkai amuppanu danab ag hamu doon, ii baɗattebte? Iitta! Ag baɗatteb. Ao, aab okkai laa, ⌊amuppan danab ah ag hipunin heeg,⌋ uug nau aab okkai amuppa bette amu, uug amuam Yawe eppegppanu iite uɗitte? Ge, nuhigppan uɗitte.

⁷ Am anam daatte amunu, Naɗi Yawe Nug aɗi keeke laa ⌊nuhikkud propet amelagppa qehakkak dayeye,⌋ ii hette. Ao, Nug tatam nuhikkud propet, ag am nuhikkud maɗi nid amu, Nug ag amelagppa nuhig maittak, lokkumak daatte, amu a doyeg hette.

⁸ Laion laa nug gaya malom, danab laa nug iite baɗakku? Ao, amubia Naɗi Yawe Nug nai mattia malom, propet laa nug nai amu doyom ele, nug nuhig nai amu iite tuɗitta mehuqa, laa amelagppa madikku?

⁹ Laa nug Pilistia dilag danab okkai, am Isip dilag danab okkai ele, nug amu oh amelagppa inam ab doyeg! “Ag ahan uɗin, qauko Samaria guguittak daattebppa qagmen daan, ag Israel danab ah ag maɗoɗ iinab daan, ag akka akka, ag laa eheɗ hadatteb ele antteg!” Laa nug anam ab doyeg!

¹⁰ Amu Yawe Nug inam atte. “Israel danab ag kobol tutukku dim lamidna hekkulagnu ib ii dootteb. Ag ahan, lailkad dilag keeke hamu aotteb. Ag ban danab laih gona, wan laappan daup eɗadna, wan amuppan keeke aon gotteb, ag Israel, ag amubia ag lailkad dilagppa anam hena, ag keeke aotteb amu, ag aon gona, aab aɗ ɠagattagnab ele, ag aguppa daatteb amu, ag appa aon gona metteb,” awa atte.

¹¹ Ag anam hetteb amunu, Naɗi Yawe Nug inam atte. “Kekeɗ ag uɗin, Israel wan imu oh ag tonaglag. Ag ban hena, ag Israel, ahilkad ban haknu aben ɠagattag loppaɗna, keeke ahilkad aab aɗ ɠagattagnab ele, keeke amuppa daatte, ag amu oh ele akkan gokkulag,” awa atte.

¹² Am Yawe Nug inam ele atte. “Sipsip gumak danab nug laion uɗia, sipsip laa aɗa, beɗu he nauhe antta, nug aha, wagai ma, sipsip baeg ebehi aɗit, o daug laihib laion oɗeppanu eɗua aotte, amubia Israel danab Samaria daatteb laippu laippuib ehanittak aon daaglag. Gemu amu, Israel danab amu ag ahilkad betppa, o ahilkad sia enappa heɗep nen daatteb, ⌊amge ahilagppa uug nau anam bekku⌋,” awa atte.

¹³ Naɗi, Nug Yawe Kayak Nukka Ɠagattag Oh Ele, Nug inam atte. “⌊Amos,⌋ na imu doon, Jakop buɗub, ag am Israel danab, na ag amelagppa ag nau aomnanu dabmettak nai imu appe doyeg!

¹⁴ Haen da Israel ag hipunin heppig, da amunu bu madakkul, haen amuppa amu da Betel appa qaɗab daatteb oh loppaɗadppi nauhkkulag. Ag qaɗab amu oh qeqeɗilag okkuladppeg, wanppa nena qekkulag.

¹⁵ Amu da heppi, Israel ag laulkad oug haennu, gakkaɗak haennu ele, lag amu oh am nauhkkulag. Lag bala enanag, aivorippa hak amu, kekeɗ ag lag amu hadappeg nauhppeg; lag ena ena laa oh ele kekeɗ ag hadappeg nauhkkulag.” Yawe Nug anam awa atte.