Amos 2 - Nobonob Baibel

Yawe Nug Moap bu madakku

¹ Yawe Nug inam atte. “Moap danab ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil heppi, iitta ii mema. Hipunin laa ag heppig am, ag ⌊oo doyak ii doon, ag naunab hena, ag⌋ Edom dilag king ebehiud aon, manaeg ewa, kalu ka bia dayom.

² Moap danab ag anam heppig amunu, da heppi, Moap wan eweb; Kirotnu aab aɗ ɠagattagnab ele, aab amu ele ewatteb, iitta mekkulag. Kekeɗ ag ban hebeppeg, muttub okkai naɗi dayebeb, Moap na qekku. Ge, ban haenppan ewak huanak dayebeb, trampet ele gayebeb, Moap na qekku.

³ Da heppi, kekeɗ ag Moapnu okkai qeppeg mauheb; ag nuhikkud ehanittak anuqak danab ele aqappeg mauhkkulag.” Yawe Nug anam atte.

Yawe Nug Juda bu madakku

⁴ Yawe Nug inam atte. “Juda danab ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil heppi, iitta ii mema. Hipunin laa ag heppig am, ag da, Yawe, ag dahil ɗo dimedappig. Ao, ag dahil ɗo dim ii lamidppig. Ag amu henana, ag kayak hambuppuak dim lamadkkulagnu eeɗak doon, dim lamadppig; kayak hambuppuak amuam ag mamelkad aɗi kayak hambuppuak dim lamadppig, am kayak amuib.

⁵ Juda danab ag anam heppig amunu, da heppi, Juda wan eweb; Jerusalemnu aab aɗ ɠagattagnab, aab amu ele ewatteb, iitta mekkulag.” Yawe anam awa atte.

Yawe Nug Israel bu madakku

⁶ Yawe Nug inam atte. “Israel danab ag hipunin kuɗum heppig amunu, da ool nauhtte. Da ool nauhtte amunu, da bu madakkul. Da oppoɗi bak dahil heppi, iitta ii mema. Hipunin laa ag hetteb am, ag genab tutukku hak danab aɗualadna, genab tutukku hak danab ag laa dilag maɗi nid daaglagnu maatteg, laa ag silwa men doɗoppa daden metteb. Ao, Israel ag daɗek danab aɗualadna, daɗek danab ag laa dilag maɗi nid daaglagnu maatteg, laa ag baeg gaɗappa, men doɗo iittappa, baeg gaɗappaib daden metteb.

⁷ Israel ag daɗek danab ah dilagnu keeke hamunab, gappud bia doon, uug nau madatteb. Ge, ag laa ag danab okkai eppelagppa eheɗ hattak aotteb ele, ag amu dilag hettoɗiak abenppa nai doya mala hettoɗia epeɗia elele mettak kobol ii dim lamidtteb. Israel laa, nug bekka ele aa oh nid ahin laippu ele oitteb; kobol amuppa ag da onil, oppiaawak daatte, ag heeg, da onil laa dilag neekkakppa hamu bia daatte.

⁸ Ag laa dilag lamen, lamen amuam keeke lonnu onig awak daatte, ag tueb eɗun, mameg mettalob amu, ag lamen amuppa niitteb. Ag ahilkad kayak hambuppuak binalag menana, ahilkad qaɗab oh daugppa amu hetteb. Ao, ag danab hettoɗiakppa mena, ag eppelagppanu men doɗo aon, ag men doɗo amuppa wain aon, ag ahilkad kayak hambuppuak laulkadppa wain amu latteb.

⁹ O Israel danab ah ⌊ag dabmeig!⌋ Ag wan ag daattebppa daaglagnu heegeg amu, Amo danab ag wan amuppa daappig. Amo ag amuppa daaegeg, da hei, Amo ag nauhppig. Amo danab ag am ɠagattagnab. Ag ad sida attannab tak bia daappig. O, iitta, ag ad ok ɠagattagnab, ag ad amubia daappig. Ag anam daappig, amge da hei, ag nauhna autna aoppig. Danab nug meu ad eppegppa daye he nauhtte, da amubia hemi. Ge, danab nug ad diɗi wanppa daye he, ad nauhtte amu, amubia da hei, Amo danab ag nauhppig.

¹⁰ O Israel danab, da Yawe, da Amo dilag wan ag madakkulnu, da ag Isipnu diie bein, da atu taɗakppa maɗ 40 ag omalatte oimi.

¹¹ Da ele hei, ag bekkalkad laa ag dahil propet danab bena daappig. Ao, da hei, ag bekkalkad laa ag dahilad danab, Nasarait atteb, ag anam daappig. O Israel danab ah, da genab iite attem?” Yawe Nug anam atte.

¹² Yawe Nug anam anan, Nug inam ele atte. “Anam amu, dahilad danab, Nasarait danab atteb, da ag wain lamananu ami. Da anam ami, amge ag Israel laa ag wagai men heeg, dahilad danab, Nasarait atteb, ag wain lappig. Yo, ag ele propet danab dahilad ag propet nai mattimnanu haknunab nai anan, ‘Aib!’ appig.

¹³ Ag Israel ag nau amu oh henan daaegeg uɗie, gemu ele hetteb amunu, karis ee aeg ineg ambe, uug naunab daatte, karis amu keeke laa tappe, aduduɗa autanab awa nauhtte, amubia da heppi, ag nauhkkulag.

¹⁴ Uug naunab amu beebeb, danab nug huan qaiedakkunu elele amu, nug uug amu ii qe-eɗidma. Danab ɠagattag ele nug ebehi bodoetteb, gai-iitta daakku. Ban danab ele nug ɠagattag haaha, bau ii daama.

¹⁵ Ban danab nug lat ette ele amu, nug bittumttum gokku. Ban danab nug baegppa qaietta gotte ele amu, nug kekeɗ ii eɗadma. Ban danab hos attan ban haaha oitte ele amu, nug ele oola, bau ii daama.

¹⁶ Ban danab laa oh ag oolagppa ɠagattag doyak iitta, ag oh oolkkulag, amge amuib iitta. Iitta! Ban danab nug ooppa ɠagattagnab doyak ele, laa oh eɗattak, nug ele oolkku. Nug lamen uɗa, beɗu miag oolkku.” Yawe Nug anam atte.