Amos 1 - Nobonob Baibel

¹ Nai imuam Amosnu nai. Amos nug sipsip gumak danab aab Tekoanu, nug ag oolagppanu sipsip gumak danab laa. Nug nai imu tuleglegppa anttom. Nug anttom, haen amuppa Usia nug Juda dilag king daye, Jehoas bekka Jeroboam nug Israel dilag king dayom. Nug tulegleg imu antte, maɗ aɗit uue, mim naɗi aakku neum. Nai imuam Israel dilagppa dimppa aɗi bekkunu nai.

² Amos nug inam aum. “Yawe Nug Sion dayaya, laion huana gaatte, amubia Nug baag okkai eleppa nai maditte. Ao, Nug nai baag okkai ele, hakkaɗ oqotti otte, amubia Jerusalem appanu nai maditte. Nug nai mattieye, gikkiɗah dadppa, sipsip gumak danab ag appa sipsip ahilkad gumadtteb ele, dad amuppan gikkiɗah qaɗaiedatte. Yo, gikkiɗah qauko Karmel igippa daatte ele qaɗaietta mauɗtte,” awa aum.

Yawe Nug Aram danab bu madakku

³ Yawe Nug inam atte. “Damaskus, ⌊Aram danab ippunigtte⌋ ag hipunin kuɗum heppig amunu, da ool nauhtte. Da ool nauhtte amunu, da bu madakkul. Da oppoɗi bak dahil amu heppi, iitta ii mema. Hipunin laa ag heppig am, ag Gileat danab ah eheɗ nau hadappig. Aram ag danab ee aeg mumuɗaknu keeke, aeg aenppa hak ele ee aeg mumuɗtte, Aram ag Gileat danab ah eheɗ anambia mumuɗadppig.

⁴ Aram danab ag amu heppig amunu, da heppi, ahilag King Hasael laug aab eweb; aab aɗ ɠagattagnab ele, ahilag king laa Benhadatnu amu, aab amu ele ewatteb, iitta mekkulag.

⁵ Aram dilag aab okkai am Damaskus, amu da heppi, kekeɗ ag aab amunu aɗnu od loppaɗna, aab heppeg nauheb; da heppi, Aram dilag king laa, nug oolnu noak onig Awen, appanu amu, nug nauheb; da ele heppi, Aram dilag king laa Beteden, appanu amu, nug ele nauhkku. Da amu oh hewoya, da heppi, kekeɗ ag Aram danab ah diina, ag diia ukka laih me dayak danab ah daaglagnu gona, Kir maadppeg daaglag.” Yawe Nug anam awa atte.

Yawe Nug Pilistia bu madakku

⁶ Amu Yawe Nug inam atte. “Pilistia danab Gasa daatteb ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil amu heppi, iitta ii mema. Hipunin laa ag heppig am, ag dahilad danab ah dilag aab kuɗum eɗadna, appan danab, ah, nid ele aɗualadna, diin gona, Edom danab dilag maɗi nid daaglagnu maatteg, Edom danab ag daden maadppig.

⁷ Pilistia danab ag amu heppig amunu, da heppi, ahilag aab Gasa am aab eweb; Gasanu aab aɗ ɠagattagnab ele, aab am ele ewatteb, iitta mekkulag.

⁸ Da heppi, Pilistia dilag king laa Asdot appanu amu, nug nauheb; Pilistia dilag king laa Askelon appanu amu, nug ele nauheb; amu Pilistia dilag king Ekron appanu amu, nug ele nauhkku. Da eheɗ hadappi ukkeb ukkeb, Pilistia danab ohnab ag mauhadna malaglag.” Naɗi Yawe Nug anam awa atte.

Yawe Nug Tair bu madakku

⁹ Yawe Nug inam atte. “Tair danab ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil amu heppi, iitta ii mema. Hipunin laa ag heppig am, ag dahilad danab ah ele layam batan, nug tituanna nai qagappig, amge ag nai amu lopaɗna, ag dahilad danab ah dilag aab kuɗum eɗadna, aab amunu danab, ah, nid ele oh aɗualadna, diin gona, Edom danab ah dilag maɗi nid daaglagnu maatteg, Edom danab ag daden maadppig.

¹⁰ Tair danab ag amu heppig amunu, da heppi, ahilag aab Tair am aab eweb; Tairnu aab aɗ ɠagattagnab ele, aab amu ele ewatteb, iitta mekkulag.” Yawe anam awa atte.

Yawe Nug Edom bu madakku

¹¹ Yawe Nug inam atte. “Edom danab ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil heppi, iitta ii mema. Hipunin laa ag heppig am, ag lailkadnab, am Israel danab ah amu, ag ag aqaglagnu qep elab aɗan, lamadna, ag oo bodoetta le mak nakok laa dooglagnu ii doonna uuppig. Ag uueg, ahilag oo nauhak am aab ewawaib daatte bia dayeye; ag lailkadnab dilagnu oppoɗilag be amelag kokoɗ eppa dayom.

¹² Edom danab ag anam heppig amunu, da heppi, Edom dilag aab Teman aab eweb; Bosranu aab aɗ ɠagattagnab ele, aab amu ele ewatteb, iitta mekkulag.” Yawe Nug anam atte.

Yawe Nug Amon bu madakku

¹³ Yawe Nug inam atte. “Amon danab ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil heppi, iitta ii mema. Hipunin laa ag heppig am, ag wan tuɗidna aoglagnu ag Gileatnu ah oolkad ele qep elabppa oolkad oppatattegeg nauhppig.

¹⁴ Amon danab ag anam heppig amunu, da heppi, Amon dilag aab okkai Raba aab eweb; Rabanu aab aɗ ɠagattagnab ele, aab amu ele ewatteb, iitta mekkulag. Kobol amu bekku amu, deɗ amuam bannu deɗ, danab ag ban henana, ban haknu ewak huana hebeppeg, uug mettak deɗ amuppa ulah huanaknab ele uɗikku.

¹⁵ Kekeɗ ag Amon eɗadna, ag king aon, nug wan laappa diia ukka laih me dayak danab daakkunu aon goppeg; nuhikkud ehanittak anuqak ele ag anam gona daaglag.” Yawe Nug anam atte.