Aisaia 9 - Nobonob Baibel

Kayak Nug king ena bau laa king abenppa ma heeb, danab ah gamalag okkai ahakku

¹ ⌊Uug naɗi anam daakku amge, hanhan anam ii daama.⌋ Aɗinu? Laa ag uug nau waappa daappig amu, ag tuɗidna anam ii daamna. Haen tatam Yawe Nug he, Seblon wan, am Naptali wan ele aa onilah qe nak ele daapiɗ, amge haen laa dimppa Kayak Nug aa binalah okkai matakku. Naptali wan, Seblon wan ele aa ib laa yuppa ukkak amu, ib amuam aa oppatata gotte. Aa Jodan leppanu qaban uɗitteppanu daattep. Aa am Galili wan, aa oolahppa danab laihnu uɗiak kuɗum daatteb.

² Danab ah ag gatatu naɗi ooppa daan oippig amu, ag amahlak okkai anidkkulag. Ao, danab ah ag gatatu abenppa daan oippig amu, amahlak ahilagppa amahalkku.

³ O Kayak, na heppe, nahipad danab ah ag huan apatkkulag. Ao, na heppe, ag gamalag huan ahakku. Ahilag gamag ahak amu, ag na noomppa na ippunidkkulag. Ao, datta ee oɗuom awak haenppa danab ah ag aonna, gamalag ahehe aotteb, ag amubia hekkulag. O iitta ban danab ag ban hena, ag ban eɗittona, keeke ag aoppig am otin aona, gamalag ahatte, amubia ag gamalag ahakku.

⁴ Aɗinu ⌊ag anam gamalag ahakku⌋? Anukka na Midian ebehilag tappae ne, Midian danab ag Israel baula ii gumanna, baula uug laa ii madappig, amubia na kekeɗ ag aɗi keekeppa uug madappig, aɗi keekeppa guittak madappig amu, na keeke amu oh maduduɗna, tabappe nob, kekeɗ ag baula danab ah nahipad eheɗ iinab hattamna. Diig amunu ag anam gamalag ahakku.

⁵ Amu ban danab dilag keeke beɗulagppa mena gona, ban hetteb ele, amu oh geha aab eokku. Baeg gaɗa okkai okkai ahilkad, am bannu danab dilag lamen, tiilag laittak ele, amu oh geha aab eweb, iitta mekku.

⁶ Aɗinu? Ihinigppa ah laa nid danab menukku. Ge, nid amu Yawe Nug ihinignu meeb uɗikku. Nug ihinig king daakku. Nug onig anaknu laala inam: Ulum Ena Mettaknu Danab Enanagnab, Kayak Nukka Ɠagattag Ele, Mamenig Hanhannu, King Maɗoɗ Ele.

⁷ Nug am King Dawit ou, Nug geha Dawitnu sia kingppa dayaya, danab ah gumadkku. Gumak uɗat pehettak hekkunu ɠagattag, maɗoɗ ele am haen oh okkai meebeb gokku. Nug Dawit ou daya, Dawitnu sia kingppa dayaya, Nug kobol genab tutukku ele, amu nai doya mala hettoɗia epeɗia elele mettak kobol ele dim lamittebeb, gumak nuhig am okkai, ɠagattag ele beebeb ukkeb, anamib hanhan daakku. Yawe Nukka Ɠagattag Oh Ele, Nugib amunu yag-nab-bak doya heeb, anam bekku.

Yawe Nug Israel dilag kobolnu oo nauhak doyom

⁸ Am Naɗi Nug Jakop buɗub uug madakkunu aum. Ge, Nug geha Israel danab ah uug madakkunu aum.

⁹ Amu Naɗi Nug anam heeb, geha Israel danab ah oh, amuam Israel, Samaria danab ah oh, ⌊ag geha “Kayak Nug nukka he, uug imu beum,”⌋ dooglag. Danab amu, ag dada danab. Ag beɗuppa tak danab. Amu ⌊ag uug amu beeb, ag⌋ inam akkulag.

¹⁰ “Kekeɗ ag ihinig brik lag amu loppaɗeg nena qeppig, ⌊amge ig amunu uug ii iqatte; am keeke hamu⌋. Geha ig men otaɗa babaittak aot, men enanag amuppa lag ɠagattag bau buuadkkunig. Ao, kekeɗ ag ad sikamo ihinkad ele oadppig ⌊amge ig amunu uug ii iqatte; am keeke hamu⌋. Ad sikamo daappig abenlagppa amu, appa ig ad sida eppaladkkunig,” aon akkulag.

¹¹ Anam amunu, Yawe Nug ⌊Israel dilagnu oo nauheb⌋ heeb, kekeɗ ag Israel aqaglagnu uɗiglag. Nug heeb, ahilag kekeɗ ag ahan uɗiglag.

¹² Nug heeb, aam nodeppanu danab Pilistianu, ag ahappeg, amu aam bedeppan daup Aramnu, ag ele ahappeg, ag oh Israel aqaglagnu uɗin, ag Israel qena, tabappeg nokku. Anam, amge amuppa Yawe Nug nuhig oo nauhak am iinab bodoettama. Iitta! Nug ⌊bu tuɗitta madakkunu⌋ eppeg huma daakku.

¹³ Anam bekku, amge Israel danab ah ag amu anidna, amuppa oolag eɗueb, laa ag bu madakku ele gumidna iinab gomana. Ag eɗun, Yawe Nukka Ɠagattag Oh Ele, Nug anidna dim lamidkkulagnu ii mattimna.

¹⁴ Ag anam hekkulag amunu, Yawe Nug Israel wan amu heeb, nauha auta aokku. Nug deɗ laippuppa Israel ikki, boob ele oh otaɗkku.

¹⁵ Ikki amuam ahilkad ikki danab, ahilkad danab onilkad ele. Boob amuam propet danab ahilkad, ag nai hambuppuak danab ah amelagppa mehuqtteb ele.

¹⁶ Ikki danab ag ib ena, ib tutukku, amu kobol ena ele danab ah ii ippuanatteb, amuppa danab ah ag ib ena apiɗidna ⌊ag padal metteb⌋.

¹⁷ ⌊Ikki danab aɗi ag anam hetteb,⌋ diig amunu ⌊Israel danab ah oh⌋ ag Kayaknu, nuhig haknu ele uuak doon, ag nau hak kobol henana, nai uɗig wak ele oɗelagppa anan oitteb. Anam amunu, Naɗi Nug Israel dilag nid bau dilagnu gamag ahak laa ii dootte. Diig amunu Nug ah qab, amu nid ag mamelkad mauhppig ele, Nug amu dilagnu ele oo ii madatte. Anam, amge Naɗi Nug nuhig oo nauhak amu iinab bodoettama. Iitta! Nug ⌊bu tuɗitta madakkunu⌋ eppeg huma daakku.

¹⁸ Amu nau hak kobol am aab aɗu bia. Aab aɗu keeke qaɗaiettaknab ele ewawa ukka, atuppan ad, keeke laa oh ele ewewe, aab kah huanaknab tette, ⌊amubia hipunin hak kobol am danab ah heeb nauhna autna aoglag.⌋

¹⁹ Am Yawe Nukka Ɠagattag Oh Ele, Nug oppoɗi beeb, Israel danab ah eheɗ anam madakku. Atu ewa, keeke oh ewa iitta mette, amubia Nug heeb, wan danab ele nauhkkulag. Danab ah ag aab ewaknu aab bia daaglag. Haen amuppa laa nug awag, o amag laa ii ehanidma. Iitta!

²⁰ Danab ah oh anen anen ag henana, mudippan lailkad heqo laih daatteb amu, ag amu dilag keeke aɗualadkkulag, amge ag enug qak doon oiglag. Ag mudippan lailkad laih laa daatteb amu, ag amu dilag keeke aɗadna lakkulag, amge ag oolag iinab aɗama. Ag anam henana, ag anen anen oh ag bekkalkad aɗelkad aɗi aakku lattaglag.

²¹ Manase buɗub ag ahan, Epraim buɗub tappadppeg nokkulagnu hebeppeg, Epraim buɗub ag ahan Manase buɗub tappadppeg nokkulagnu hekkulag. Amu aa oh anam heyaya, aa oh ahai, Juda tabapeɗ nokkunu hekkulah. Anam, amge amuppa Yawe Nug nuhig oo nauhak amu iinab bodoettama. Iitta. Nug ⌊bu tuɗitta madakkunu⌋ eppeg huma daakku.