Aisaia 8 - Nobonob Baibel

Aisaia nug nid danab nuhig onig ataɗom

¹ Am Yawe Nug da amelppa inam aum. “Na yaaknu buk itoɗiak ele okkai laa aon, na pen laa, danab oh ag pen amubiappa haen oh nai yaatteb ele amu, na amu ele aon, amuppa na pepa qaɗeppa nai imu yaakkut, ‘Maher Salal Has Baz.’

² Aria, na nai yaakkut amu, ⌊na nai amu tatam yaame, dimppa nai amunu meu bekku haenppa, doyak amu miagib daakkunu na⌋ danab ena aɗit, aa am aɗi keeke anidpiɗnu mattiak danab genab dahil amu, na aa diiatna heppe, aa, aa onilah pepa amuppa yeiɗ! Danab aɗit amunu laa am mana mettak danab Uraia, laa am Jeberekia bekka Sekaraia ele,” awa aum.

³ Am dimppa da ukkai, ⌊ah dahil, nug am⌋ propet ah amu, da nug ele niiɗa, nug oo ele daya, nid danab menuom. Menue amu, Yawe Nug da amelppa aum. “Na nid amu onig Maher Salal Has Baz ataɗe!

⁴ Aɗinu? Haen nid amu nug oɗe oppateb, ‘Mama, anai,’ ii aabob amu, Asiria dilag king, nuhikkud daup ele ag uɗin, aab okkai Damaskusnu keeke ena oh akkan aon, aab okkai Samarianu ele akkan aon gokkulag,” awa aum.

⁵ Am Yawe Nug bau laa da amelppa inam aum.

⁶ “Danab ah imu ag da geɗilna, ag King Resin, Israel dilag king, Remalia bekka Pekanu, ele baɗan, ⌊ag da ehanadkkulnu oɗ ii meɗan, ag Asiria dilag king ehanadkkunu oɗ medappig⌋

^7-8 amunu, genabnab da Naɗi, da geha Asiria dilag king awe uɗikkulnu heppi, nug nuhig ɠagattag amuppa ag oɗoɗadkku. Am Asiria dilag king nug nuhikkud ban danab ele, ahilag ɠagattag am Yupretisnu le uinu ɠagattag, ebehi ele na, le titiɗa, atu oh tona gotte, ag amubia hena uɗiglag. Ag uɗin, Yupretis le nug ui wa, le ihi daug laih laih oh tonatte, amubia ag uɗin, Juda wan oh bia tonaglag. Amge ag wan amu ohnab ii aomna. Ge, Asiria ag wan amu ohnab ii aomna, amge oh bia aon tonan, elele mettan daaglag,” awa aum. O Imanuel, ⌊na ig ehanigkkutnu oɗ medattem⌋!

^9-10 Ag wan atu ohppan danab, ag ban hekkulagnu babaitteg! Amge ⌊Yawe Nug heeb,⌋ ag nauhkkulag. Ag danab ah oh wan uma umanu amu, ag oh ag daulag human, dabmetteg! Ag wan atu ohppan danab, ag ban hekkulagnu keeke oh babaitteg! Amge ⌊Yawe heeb,⌋ ag nauhna autna aoglag. Ao, ag wan atu ohppan danab, ag ban hekkulagnu keeke oh babaitteg! Amge ⌊Yawe heeb,⌋ ag nauhna autna aoglag. Ag ahan, ⌊Juda ele⌋ ban hekkulagnu dabmak naɗi aweg! Amge ⌊Yawe Nug heeb,⌋ ag nauhna autna aoglag. Ao, ag ahan ⌊Juda ele⌋ ban hekkulagnu maittak aon, ag nug ippunitteg! Amge ⌊Yawe Nug heeb,⌋ ag nauhna autna aoglag. Aɗinu? Kayak ig ele daattem.

Yawe Nug Aisaia nug nuhignuib ooppa genab dookkunu aum

¹¹ Amu Yawe Nug da ɠagattagnab aɗaila, da nau aopanu nai meɗaɗa, da ⌊Juda⌋ danab ah ⌊kuɗum laa⌋ dim lamadpanu Nug da amelppa inam aum.

¹² “Haen danab ah imu ag, ‘Danab ah laa umu ag eheɗ hekkulagnu nai qagappig,’ aon atteb amu, na paha aib nai amunu genab doome. Amu haen danab ah ag nai amunu baɗan oitteb amu, na amunu aib baɗan oime. Ao, na amunu baɗak okkai aib aome!” awa aum.

¹³ Amu Yawe Nukka Ɠagattag Oh Ele, na Nugib am oppiaawak ele doye! Na ⌊Nug noobppa eheɗ hemananu, na⌋ nuhignuib baɗak doye! Ao, na nuhignuib ebehin oh bodoetta le maɗ!

¹⁴ Yawe Nug danab ah ⌊ag anambia hetteb ele amu, Nug amu⌋ dilag lokkumak aben ɠagattag bia daakku, amge Israel, Juda ele dilagppa amu, Nug am men laa danab ippulagppa dayeye, danab ag men amuppa baelag qena, nena qetteb bia daakku. Ao, Nug am men laa he, danab ag nena qetteb, amubia daakku. Amu Jerusalem danab ah dilagnu amu, Nug ahilagnu pelem, o uhui bia ag aɗualadkkulnu daakku.

¹⁵ Ao, Nug anam bia dayebeb, ⌊Juda danab ah kuɗum, Jerusalemnu kuɗum ele⌋ ag baelag qena, taataɗ qekkulag. Kuɗum ag nena qena, nauhkkulag. Kuɗum ag pelem amuppa nona nauhkkulag.

Yawe aɗi aum amu, keeke amu bekkunu ameg maknu nai

¹⁶ ⌊Aisaia nug uug naɗi beeb, danab ah ag eɗun, nai Yawe nug mettom dabmekkulagnu nug inam aum.⌋ “Yawenu nai ⌊Nug da oɗelppa danab ah matte,⌋ bukppa yaak niitte amu, ag buk itoɗiak amu ⌊dimppa laa ag kolan anidkkulagnu⌋ qakkeg! Ag Yawenu ɗo nai uɗugppa yaak niitte, ag buk itoɗiak amu qaɗeppa ⌊dimppa kolan anidkkulagnu⌋ at mewona, dahilad ippunittak awak danab matteg!

¹⁷ Yawe, Nug gemu Jakop buɗub dimattowa, ii ehanadtte ele amu, da Nug ameg mebippi, ⌊Nug keeke oh hekkunu aum amu hekku⌋. Da Yawe, nuhignu oolppa genab dookkul.

¹⁸ Aria da, amu nid naunau, Kayak Nug da meɗom ele amu, da ag ele ig iikku daattem. Am Yawe Nukka Ɠagattag Oh Ele, Sion qaukoppa daatte ele, Nug am Yawe, Nug ig otikka, Nug keeke oh Israel danab ah dilagppa hekkunu aum amu, ig amunu at, amunu epponak keeke bia daagnignu meikke daattem,” awa aum.

¹⁹ Anam amunu, danab ah laa ag geha ag laa ⌊Yawe dim lamidtteb ele, ag ag⌋ amelagppa ag gona mauhak ele gamag danab, o mauhak ele mattiak danab anadna, doyaknu oɗ mattaglagnu amelagppa appeg amu, ag amu aib heppig! Ag Kayak toppanu dabmak aweg! Danab ameg amu ag danab kaaka nai maditteb, ag amubia maditteb. Mattiegeg, oɗelagppa oqotti digdig bette. ⌊Antte!⌋ Danab ah mauhppig ag am danab ah bau daatteb dabmak mattaglagnu am ib ena iitta. Aɗinu ag danab mauhppig amu gumadna doyak aoglagnu gotteb? Ag eɗun, Kayak ahilag gumidna ukkeg!

²⁰ Gona, ag Kayaknu dabmak, nuhig ɗo naippa, nuhig nai laappa ele, ag amuppa anidna doyeg! Aun aɗi ag nai maditteb ele, ag Kayak nai bia ii maditteb dayeb, ag ahilagppa amahlak laa iitta.

²¹ ⌊Am genab, danab ah ag ib hambuppuakppa doyak aoglagnu hetteb ele amu,⌋ ag am geha haen nau aoglag. Ag geha oolagppa uug nau doonna, enug aqebeb, wanppa talilin oiglag. Ag anam oinna, ag enug aqakku. Enug amunu ag oppoɗilag beeb, amelag kokoɗ eppeb, ahilag king, amu ahilkad kayak ele ag eheɗ laa awaknu anak waappa daaglagnu nai akkulag. Ag neegppeg habppa teebeb,

²² ag ele neegppeg, honap wanppa gokku, amge geha ag keeke ena laa ii anidmana. Iitta! Geha ag uug nau, uug amunu haen nau ele anidnana, amuib ag aben ohppa gatatu ele anidkkulag. Uug nau amuib aben oh gatatu ele tona dayebeb anidna, baɗaglag. Geha ag uug amu, haen nau amu ele uun, oolna laih gokkulagnu am, ahilagnu ib laa iitta; ⌊laa nug⌋ heeb, ag gatatu nauppaib wana daaglag.