Aisaia 7 - Nobonob Baibel

Aisaia Nug King Ahas amegppa nug ooppa genab doya, amuppa ɠagattag daakkunu aum

¹ Haen Jotam bekka Ahas, nug am Usia alag, nug Juda dilag king dayeye, Resin, Aram dilag king, amu Remalia bekka Peka, Israel dilag king ele, aa Jerusalem teya, ban hepiɗ. Aa ban hepiɗ, amge aa aab okkai amu eɗidya aoglahnu elele iitta.

² ⌊Amu king aɗit amu aa qagmeeh, haen amuppa⌋ laa Juda dilag king Ahas, nuhikkudppan ele nai laa aeg dooppig. Amu ag inam appig. “Aram ban danab ag Israel ele oh qagmeppig,” aon appig. Ahas nug nai amu doye, nug, nuhikkud danab ah ele ag baɗan, eheɗ hahaɗppig.

³ Ag anam heegeg, Yawe Nug Aisaia amegppa inam aum. “Na bekkat Searjasup aoppe goya, aa King Ahas antteɗ! Anidkkulahnu amu aa goya, le laa onig ‘Le Gottu Attan,’ atteb, aa le aben amunu gappad naɗi batakppa, aben amuam ib okkai lamen hetteb guguittak, aa goya, aben amuppa teya, king anidkkulah.

⁴ Aria aa goya teya, na King Ahas amegppa inam appe doyaɗ! ‘Aram dilag king Resen, amu Israel dilag king Peka ele aa am aab ewa ukka, qauhkkunu ha, kahugib ahatte, aa amubia daattep amunu, na doye! Na ahilahnu aib ottaime! Ahilahnu aib baɗame! Ahilahnu na ebehin aib bodoettom! Laa amu, Aram danab, ahilag King Resin, amu Remalia bekka Peka ele, ag Juda, ahilagnu oo nauhak huanaknab doon oitteb, amge na doye! Na oo nauhak huanaknab ahilagnu aib ottaime! Oo nauhak huanaknab ahilagnu na aib baɗame! Oo nauhak huanaknab ahilagnu na ebehin aib bodoettom!

⁵ Aram danab, Israel danab, amu Remalia bekka Peka ele ag nau heppeg, ag Juda ag nauhkkulagnu nai qakkan inam appig.

⁶ “Ig gota, Juda wanppa teta, ban hepput, Juda ag nena qeppeg, ig wan amu ihinig daakkunu aotu! Ig amu hewota, ig hepput, Tabel bekka nug wan amu dilag king daakku.” Ag anam appig.

⁷ ⌊Aram danab, Israel ele ag nau anam hekkulagnu dabmenan appig⌋ amunu, Naɗi Yawe Nug inam awa atte. “Aram, Israel ele ag keeke hekkulagnu dabmenan appig amu, keeke amu ii bema. Ag anam ii hemana.

^8-9 Aɗinu? ⌊Aram, Israel ele ag am genab ɠagattagnab iitta.⌋ Aram dilag aab ikki am aab okkai onig Damaskus aakkuib. Amu Damaskus ikki am Resin aakkuib. ⌊Amu aa oh am ɠagattagnab iitta.⌋ Israel dilag aab ikki am aab okkai onig Samaria aakkuib. Amu Samaria ikki am Remalia bekka Peka aakkuib. ⌊Amu aa oh am ɠagattagnab iitta.⌋ Anam amu, Aram, Israel ele ag ɠagattag ii daan, nena qekkulag. Ge! Maɗ 65 ii ukkak, Israel ag nena qena, huu laippu ii daamna. Amu Juda ag nai dahilnu oolagppa genab ɠagattag ii dooglag dayeb, ag nena qekkulag; ag hippaidna ii daamna.” ’ ” Naɗi Yawe Nug anam awa aum.

¹⁰ Aria Yawe Nug eɗua, nai laa Aisaia oɗeppa Ahas amegppa inam aum.

¹¹ “Na Yawe, nahip Kayak, Nug na aɗinab at laa na ippunidkkunu oot daatte amu, na amunu Nug oɗ mette! At amuam wan unuqagppanute oot daatte, o iitta habppanute, o iitta adeppanu na oot daatte amu, na oɗib meppe, geha Kayak Nug nukka na at amu ippunidkku,” awa aum.

¹² Aisaia nug anam Ahas amegppa aum, amge Ahas nug aum. “Iitta. Da at laa anidkkulnu ii oɗ medapa. Da Yawe ma anttak ii medapa. Da amu hekkulnu dab-ii-mettem,” awa aum.

¹³ Anam a amu ⌊Aisaia⌋ nug aum. “King Dawit buɗub ag, ag gemu tutukku doyeg! Ag kobol ahilag amunu amu, danab ah ag ahilagnu bahilag yaatte amunu, gemu ag heppeg, dahil Kayak Nug ele ahilagnu bahi yaakkute?

¹⁴ Na atnu oɗmak hekkutnu uume amunu, Naɗi Nug nukka geha at laa na ippunidkku. At amuam inam. Ah makkun laa nug oo ele daya, geha nug nid danab menua, nid onig Imanuel ataɗkku.

¹⁵ Ataɗeb ukkeb, tatam nid amu nug nakok ena ma, haen nug dabmak ele dayaya, nug kobol aɗi am kobol genab tutukku ele, kobol aɗi am kobol nau ele doya, aria dimppa nug uppuh leppu, sis huhppa hak amu lakku.

¹⁶ Nug onig Imanuel ataɗkkunu diig am, nid nakok amu, nug okkai ii ma, kobol aɗi am kobol genab tutukku, kobol aɗi am kobol nau ele, nug amu ii doyebeb, haen amuppa king aɗit, Israel dilag king, am Aram dilag king ele, Ahas na king aɗit amu dilahnu gemu baɗak okkai doottem amu, geha haen amuppa wan ahilah nauhaknab, hamu daaglah.

¹⁷ Anam bekku, amge ⌊ag oolag ii eɗutte amunu,⌋ geha Yawe Nug heeb, haen nau nahip-ppa, am nahipad danab ah dilagppa, am na baenadppa dilagppa ele uɗikku. Uug bekkunu daatte ele, amuam naunab, anukka uug beppig eɗattak, uug amu bekku. Haen Israel ag oppatna, Juda uun goppig ele, haen amuppa digmak uɗie, gemu batak uug nau bekkunu daatte amubia laa ii beum. Uug nau bekkunu amuam iikku. Yawe Nug geha Asiria dilag king awa uɗieb, ⌊Juda aqa oɗoɗadkku⌋,” awa aum.

¹⁸ Aria, haen amuppa am inam bekku. Yawe Nug geha Isip onilagppa hiwalakppa heeb, Isip ban danab Isip ohppanu ahan, qabuttid ameg naɗi uɗiak bia uɗiglag. Uɗippeg, Yawe Nug Asiria onilagppa hiwalakppa heeb, Asiria ag am geha uppuh ameg naɗi uɗiak bia uɗiglag.

¹⁹ Geha ag uɗin, Juda wanppa ag aben ohppa itun ambekkulag. Ag aben nauppa ele ambena, men oɗeppa ele nona ambena, le qagmette, amuppa ele ambena, aben ad naunau qaun ele, amuppa ele ambekkulag.

²⁰ Am haen amuppa Naɗi Nug geha Asiria dilag king, ⌊ag nug ehanatteb, padal ii memananu dabmena, ɗo naɗi nug medappig,⌋ Nug nug le Yupretis heqo laihppanu awa heeb, nug geha Naɗinu resa bia dayaya, Juda beɗulkad uɗig hoikku. Nug ikkilag uɗug hoya, akkaɗilag hoya, baelag uɗig ele oh hoikku.

²¹ Haen amuppa geha inam bekku. ⌊Kekeɗ Asirianu, ag doɗ makau, sipsip, meeme keeke, am ohbia aqaglag, amge⌋ danab laippu laa nug nuhig makau balat laippu, am meeme aɗit laa ele nug heeb, ag daaglag.

²² Am inam ele daakku. Doɗ amu ag mamelag huh huanak mettaglag amunu, danab amu nug huh amu awa, sis ha, sis lakku. Ge, anam daakku amunu, danab laippu laippu oh haen amuppa Juda wanppa daaglag amu, ag sis, uppuh leppu ele lakkulag.

²³ Keeke laa bekku am geha, haen amuppa, ahilkad grep dad oh nauhkkulag. Muɗi grep dad ahilkad anen anenppa, ahilkad muɗi grep 1,000 ele, ahilag nob am 11.5 kilogram silwa elele, amge dad amu ohppa uud keeke qaun ele, keeke amu bena, dad ena amu oh teguadkkulag.

²⁴ Aben amuppa uud keeke qaun ele amu teguadna daappeg, ⌊doɗ nau abenlag daakku⌋ amunu, danab ⌊ag appa hamu ii oimna;⌋ ag geha lat tanig, lat doɗo ele aɗanna, appa gokkulag.

²⁵ Aria, danab ag gemu ee eppaglagnu wan qauko nakok ele amuppa dad hena, ee ebatteb, amge uud keeke qaun ele amu bena, dad amu tonappeg, danab ag geha qaunnu baɗan, appa gona, dad ii hemana. Iitta. Aben amu oh am doɗ makau, sipsip ele dilag gikkiɗah lanaknu aben beppeg, ag appa oina, ee mattin, lanan oiglag.