Aisaia 66 - Nobonob Baibel

Yawe Nug wan atu oh danab ah hettoɗiadkku

¹ Yawe Nug atte. “Hab aab am sia king dahil, wan am da bael maknu balal nakok daatte. Anam daatte amunu, ag lag laa, da aguppa daakkulnu hekkulagnu elelete? Ag aben laa da aguppa hik awe daakkulnu hekkulagnu elelete? Iitta.

² Da keeke amu oh hattami amunu, ag beppig daatteb.” Yawe Nug anam atte. Amu Yawe imu ele atte. “Aun laa nug nukka nug onig qe ne, nug nug binag ii mette, nug dahil nai dim lamidkkunu dabmak tippalmanu baɗatte amu, da nuhignu enanagnab doottem.

³ Amge laa nug ⌊dahil nai ii dim lamitta,⌋ nug makau dawai mana, da meɗatte amu, nug am danab layag qe mauhtte bia daatte. Laa nug ⌊dahil nai ii dim lamitta,⌋ nug sipsip nag mana, da meɗatte amu, nug danab nug qai mana, da meɗatte bia daatte. Laa nug ⌊dahil nai ii dim lamitta,⌋ nug ee aegnu ofa da meɗatte amu, nug am danab nug bo tiig awa meɗatte bia daatte. Laa nug ⌊dahil nai ii dim lamitta,⌋ nug kalu danab ile muttuɗig enanag bette ele mana, da meɗatte amu, nug am danab kayak hambuppuak dottolag noolagppa dup noa binalag mette bia daatte. Danab amu ag ahilag dabmakib dim lamidtteb. Ag keeke eheɗ nau, ag amunu oolagppa uuaknab doolob, ag hak amunu enanagnab dootteb.

⁴ Danab amu ag amu heegeg, da ag onilagppa ei, ag nai dahil ii aoppig. Ao, da nai ag amelagppa ami, amge ag dooglagnu uuppig. Ag da noolppa nau heppig. Ao, ag kobol digdig da ool ii hette ele hekkulagnu dabmenan heppig. Ag amu oh heppig amunu, da bu eheɗ madakkulnu dabmein madakkul. Ao, da heppi, ag kobol bemanu baɗatteb ele, kobol amu ahilagppa bekku.” Yawe Nug anam atte.

⁵ Ag laa, ag Yawenu nai doon, ag tippalmananu baɗatteb ele, ag nuhig nai imu doyeg! “Ag lailkad ag ahilagnu nau ninig ele dootteb amu, ag da onilnu geɗadna, inam aon aon aqan, deɗ laala appig. ‘Yawe Nug heeb, ig nuhig ɠagattag anidtu! Nug anam heeb, ag oolag gamag aheb anidtu!’ Ag anam deɗ laala appig, amge da heppi, ag uɗalag nekku.” Yawe Nug anam atte.

⁶ Doyeg! Aab okkai Jerusalemnu oqotti okkai ahatte. Yawenu mettid lagppanu oqotti okkai uɗitte. Am aɗi oqotti? Oqotti amuam Yawe Nug nuhig kekeɗ ag eheɗ heppignu bu elele aakku madatte.

⁷ Ah nug nid aokkunu guittak doyaya, nug nid aotte; guittak ii doyaya aokkunu am iitta. Ao, ah guittette, nid aotte; ii guittebeb aokkunu am iitta.

⁸ Laa nug ah ii guittette nid awomnu nai laa doyomte? Ge laa nug ah ii guittette, nid awe anttomte? Amubia danab ah ag gemu huu laippu ahilag wanppa ii daatteb amu, ag deɗ laippuppa eɗun, huu laippu ahilag wanppa daaglagnu elelete? Ag deɗ laippuppa eɗun, kantri laa bena daaglagte? Amu iitta, amge ⌊anam bekku. Yawe Nug⌋ Sion ⌊ehanidkku⌋ amunu, ah nug digma nakoknabib guittak doyaya, nid aotte, amubia Juda danab ah ag eɗun, huu ahilag wanppa daaglag.

⁹ ⌊Keeke amunu amu,⌋ Yawe Nug atte. “Da ah nid aokkunu dabmein ehanidppi, nid aokkunu haen elele dob, uuppi nid ii aoma hekkulte? Iitta!” Ahilag Kayak, Nug atte. “Ao, da ah nid aokkunu dabmein ehanidppi, nid aokkunu haen dob, ah nug nid aokkunu elele iitta daakkunu hekkulte? Iitta! ⌊Amubia da danab ah dahilad ag eɗun huu laippu ahilag wanppa daaglagnu ehanadppi, anam daaglag,⌋” awa atte.

¹⁰ Ag oh ag Juda danab ah dilagnu oo mauhak dootteb ele, ag ag ele oolag gamag huana ahaɗ! Ao, ag Juda danab ah dilagnu oo doyak doon, mahitteb amu, ag ahappeg, ag ele oo gamag ahak doyeg!

¹¹ Nid yuɗ nug oo gamag ahakppa anignu huh latte, amubia Juda danab ah ag en kuɗum aoppeg, ag ele oh en kuɗum amunu elele dooglag. Ao, Juda danab ah ag en kuɗum awona, ag en naɗi okkai amuppanu ag enanagnab dooglag.

¹² Aɗinu ⌊amu bekku? Keeke amunu⌋ Yawe Nug Juda danab ah amelagppa atte. “Da geha maɗoɗ le ukkakib gotte bia ag madakkul. Yo, danab huu laappan dilag keeke ena le tuɗid tuɗid, ii qaɗaiedatte, ugakkaib daatte, ag eppelagppa uɗikku. Geha ag nid yuɗ laa, anig nug nuhignu oo mauhak doyaya, eppegppa awa oiyaya, begittatta dabmedatte, amubia ag Juda danab ah, ag anam daaglag.

¹³ Ag Juda danab ah amu, geha nid anig nug nuhig nid bekkitta, dabmedatte bia, da Yawe, da anamnab aakku ag dabmadakkul. Da anam aakku dabmatte bekkadppippi, ag Juda danab ah, ag oo mak aoglag,” awa atte.

¹⁴ Yawe Nug ahilagnu keeke oh hekku amu, ag anidna, ag oolag gamag eheɗnab ahakku. Ag am enanag, gikkiɗah ena bia, daaglag. Danab ag amu anidna inam dooglag; Yawe Nug laa ag Nug dim lamidtteb ele, ag am nuhikkud maɗi nid maɗi ah amu, Nug ag ehanadtte, amge Nug kekeɗ nuhikkud dilag amu oppoɗi bette.

¹⁵ Aɗinu ⌊ag amu dooglag⌋? Antteg! Yawe Nug aab aɗu eleppa uɗikku. Nug ban danab bannu karisppa dayaya ulah kilibob gotte bia gotte, Nug anam bia uɗikku. Nug oppoɗi huana beebeb, danab ah eheɗ hetteb ele bu eheɗ madakku. Ao, nuhig oppoɗi bak am aab aɗu bia dayaya, Nug ag bu okkai madakku.

¹⁶ Laa amu, aab aɗu ewewe, dubuttid iitta mette, amu danab okkai ag qep elabppa danab nau aqaegeg, ag iitta metteb, amubia Yawe Nug hettoɗiak tutukku haaha, Nug nuhig ɠagattagppa danab ah bu matteb, danab kuɗum mauhkkulag.

¹⁷ Yawe Nug atte. “Danab ah amu ag kayak hambuppuak binag mekkulagnu ag akka ag kayak hambuppuak amunu neekkakppa elele dayaknu ag oolag meulag oh ⌊kobol hambuppuakppa⌋ bappaidna, ag kayak hambuppuak ⌊amu, ag nuhig ɗo hambuppuak dim lamidna, kobol digdig henan,⌋ nug noobppa elele daanna, ag dad enanagppa kayak hambuppuak binag metteb. Ag kayak hambuppuak laa dim lamidna, dad enanagppa ag nug noobppa bo teppu, tog teppu, doɗ lanaknu gahag bak ele amu, ag doɗ amu laala teppulag ele latteb. Ag amu anam hetteb, amge ag oh padal mekkulag.” Yawe Nug anam atte.

¹⁸ Amu Yawe atte. “Wan imuppan wan ohppan danab ah, amu nai digdigppan ele aɗi henan dabmetteb amu, da doottem. Da amu doottem amunu, da danab ah wan atu ohnu diie, qagmaadppi, ag uɗin, binag amahlak oppiaawak ele dahil anidkkulag. Da ag amu hekkulagnu uɗikkulnu hettem.

¹⁹ Da uɗat naɗi, da heminu at daatte ag oolagppa heppi, ⌊aun laa nug amu antta, da dim lamiɗa amu, nug bau daakku⌋. Laa amu ag bau daaglag amu, da ag oolagppan laala ag maadppi, danab ah huu laa dilagppa gona, ag binag amahlak oppiaawak ele dahilnu ag amelagppa mattiglag. Danab amu ag da onil okkainu nai laanu ii dooppig; ag binag amahlak oppiaawak ele dahil ele ii anidppig daatteb. Danab amu ag am Tarsis, Libia, Lidia, Tubal amu Grik danab, amu nud umanabnu danab ele. Lidia danab ag am lat ewaknu doyak okkai ele.

²⁰ Anam daakku amu, danab ah wan ohppan ag Israel, ag awalkad amalkad aɗi huu ohppanu diin, dahil qauko, qauko amuam dahilnu tituanak daatte amu, ag qauko amuppa, ippa Jerusalem uɗiglag. Danab nug keeke enanag dahil daakkunu da hamu meɗatte, amubia ag ag aon uɗin, da meɗaglag. Geha ag hosppa, oiyaknu karisppa, uɗatnu karisppa, miulppa, amu kamelppa ele diin uɗiglag. Amu Israel danab ah ag wit, tappiɗ da, Yawe, dahil neekkakppa dubuttid iitta ele, ag amuppa mena aon, dahil mettid lakka gotteb, amubia ag Israel danab ah wan laappa daatteb amu diin uɗiglag.

²¹ Ag diin uɗippeg, da amunu laa ag Lewi buɗubppan mana mettak danab daappeg, amu laa ag Lewi buɗubppan mana mettak danab iitta, ag anam daaglagnu otiadkkul,” Yawe Nug anam awa atte.

²² Yawe Nug ele atte. “Amu hab bau, wan bau da hekkul ele amu, keeke aɗit amu hanhan da noolppa daaglah, amubia amu, ag Israel ag onilag am hanhan dayebeb, ag buɗulkad ele am iitta ii memana.

²³ Am inam bekku. Kalam baunu qagmak gamag ahak ele anen anen ohppa, amu Sabat deɗ anen anen ohppa amu, danab ah wanppanu wan ohppanu ag uɗin, da noolppa dup nokkulag.

²⁴ Amu dahilad danab ah ag aab dimittim gona, ag danab ah ag da waalppa daaglagnu uun, dahil nai tappaeg neum ele, ag danab ah amu gaɗalag anadkkulag. Amu ag gaɗalag niiglagppa amu, gawat naunau ag hanhan daatteb, aab aɗu aguppa daatte ele ii qauhtte. Danab ah oh ag gaɗalag amu anidna, ag eheɗ nau, gahag bak bia ele dooglag.” Yawe anam awa atte.