Aisaia 65 - Nobonob Baibel

Yawe Nug heeb, danab ah oh ag nuhignu dooglag

¹ Yawe Nug atte. “Danab laa ag dahilnu oɗmak ii heppig amu, da ahilagppa miag atiak tule bemi. Ao, danab laa ag da aniɗkkulagnu uɗat ii heppig ele, ag am da aniɗppig. Amu wanppan wan laihnu danab ag da ii unuqilppig amu, da ag amelagppa, ‘Da iikku daattem, da iikku daattem,’ ami.

² Da amu hein, amu da deɗ oh amun tuqan ele danab ah ag ahilag dabmak ɠagattag eppak daatte, da ag ehanadkkulnu heinne daami. Danab ah amu ag ib eheɗppa oitteb; ag akka ahilag dabmak dim lamidtteb.

³ Danab ah amu ag am hanhan da noolppanab eheɗ henana, ag datta appa doɗ main, kayak hambuppuak mattanna, ag qaɗab brikppa hak kalu danab ile muttuɗig enanag bette ele main, ahilkad kayak hambuppuak mattanna heeg, da oppoɗil bette.

⁴ Danab ah amu ag matmatppa danab boumattak oolagppa daatteb. Ao, ag tuqan danab ah mauhppig ele ag nai madippeg dooglagnu dabmattanna daatteb. Da ag bo teppu, doɗ laala ele ii lamananu ami, amge ag bo teppu lanana, ag doɗ laala, doɗ amu ag lamananu aib ami ele, ag amu tebuppa lewa hena, lanan daatteb.

⁵ Ag amu hewona, ag ahan, laa amelagppa, ‘Da am danab enanag, da am Kayaknu oppiaawak ele amunu, na gukkuiɗna aib uɗime!’ ⌊hambuppun⌋ atteb. Aab kah danab noobppa te, eheɗ dootte, amubia da ahilagnu anam doottem. Aab amunppa hanhan ewewe, aab kah taata, anam danab noolagppa hette, amubia da anam doottem.

⁶ ⌊Da ag ehanadkkulnu, da ag eɗue diiadkkulnu ele heine daami, amge⌋ antte! Danab keeke daug atimanu pepappa yaatte, amubia ahilag hipunin da noolppa daatte. Anam daatte amunu, da iinab uupa. Da bu eheɗ hak amunu elele eɗuen madakkul. Da genab ahilag eheɗ hak eleleppa ag nob nau madakkul.

⁷ Da ahilag hipunin, ag mamelkad aɗi ag hipunin amu heegeg, ag tuɗidna heegeg uɗie, gemu ele hetteb amu, da amu ohnu nob nau elele ag madakkul. Da ag doɗ main, kayak hambuppuak qaukoppa mattanna, ag qauko nakokppa dahil nai tappaeg neene, ⌊appa ele ag doɗ main, kayak hambuppuak madappig⌋ amunu, da bu eheɗ ahilag hak eleleppa ag madakkul.” Yawe Nug anam atte.

⁸ Amu Yawe Nug atte. “Danab ag grep meunu leppu aonna, ag grep meu aɗa auta awak laa, meu amunu leppu oh ii awak anidna, ‘Leppu ina daatte amunu, ig keeke ena imu, keeke ena iitta ele oh laippu, hamu buɗipput ukka nauhkkunu ii hemata,’ atteb, amubia da Juda danab ah, ag am dahilad maɗi nid maɗi ah ele amu, da ahilagnu anam hekkul. Da ahilagnu dabmeine, da ag ohnab, hadappi ii nauhmana.

⁹ Da heppi, Jakop buɗub, amuppanu danab kuɗum bekkulag. Ao, Juda buɗub, amuppanu danab kuɗum dona, ag wan dahilppa daan oiglag. Danab ah da ag tituanadmi ele, ag dahil wanppa daan oiglag. Ao, dahilad maɗi nid maɗi ah ele ag aguppa daaglag.

¹⁰ Danab ah dahilad ag da dim lamiɗkkulagnu oolag hette amu, da ahilagnu dabmein heppi, dahil wan ooppa laih onig Saron am sipsip dilag ee lanak aben enanag daakku. Ao, Akornu oolnu noak aben amuppa makau ag wana, hik aon daaglagnu aben daakku.

¹¹ Da dahilad danab ah dilagnu anam hekkul, amge ag laa, ag da, Yawe, ag da dimeɗan, da dim lamiɗkkulagnu uutteb, ag dahil qauko, qauko amuam dahilnu tituanak daatte amu, ag appa gona dahil mettid hekkulagnu daulag atitte, ag kayak hambuppuak onig Gad noobppa dup nona binag mekkulagnu henana, nug onigppa hobul hena, ag kayak hambuppuak onig Meni noobppa dup nona binag mekkulagnu ag nuhignu wain digdig kabolina, tappiɗ okkaippa inatteb ele amu, da ag hettebnu dabmekkul.

¹² Da ag hettebnu dabmein, da heppi, laa ag uɗin qep elabppa aqadppeg mauhkkulag. Ao, ag gomelppeg, laa qep elabppa aqadppeg mauhkkulag. Aɗinu? Da ag onilagppa emi, amge ag da baal dooglagnu uuppig. Da ag amelagppa nai mattimi, amge ag dooglagnu uuppig. Ag da amelppa kobol nau heppig. Ao, keeke digdig da ag amu hekkulagnu ool ii daatte ele, ag hekkulagnu dabmenan heppig.” Yawe Nug anam atte.

¹³ Ag nau amu hetteb amunu, Naɗi Yawe Nug inam atte. “Dahilad danab ah, ag am dahilad maɗi nid maɗi ah ele amu, ag ee lakkulag, amge ag nau hetteb ele, ag enug aqakku. Dahilad danab ah ag le oug lakkulag, amge ag nau hetteb ele, ag le baalag diikku. Dahilad danab ah ag oolag gamag ahakku, amge ag nau hetteb ele, ag uɗalag nekku.

¹⁴ Dahilad danab ah ag oolagppa oo gamag ahak ele doon, ag ahi ettaglag, amge ag nau hetteb ele, ag oolagppa guittak nau doon, ag eheɗ gaaglag. Ag eheɗ nau doon, ag mahiak okkainab hekkulag.

¹⁵ Ag ahilag hak nau, diig amuppa ag bu eheɗ amu aoppeg, dahilad danab ah ag ag onilag diin, anen anen laa amegppa, ‘Yawe Nug amu dilag bu mattom bia, nahip eheɗ laa awaknu anak waappa dayak am amubia daakkunu ool daatte,’ akkulag.” Yawe Nug anam atte. Amu Naɗi Yawe Nug heeb, ag nau hetteb ag mauhkkulag, amge Nug nuhikkud danab ah onig laa matteb ⌊ag enaib daaglag⌋.

¹⁶ Aun laa nug Juda wanppa laanu, “Nahip-ppa enaib bekkunu ool daatte,” akku amu, nug Kayak doyak diig genabib ohnu diig daatte onigppaib amu hekku. Ao, laa nug Juda wanppa nuhig nai ɠagattag qedakkunu hette amu, nug Kayak doyak diig genabib ohnu diig daatte onigppaib amu hekku. Nug amu hekkunu diig am, Yawe Nug heeb, uug tatam daappig ohnab am iitta mekku; iinab daamna. Yawe Nug amunu, “Tumainu uug amu, da heppi ii daama,” akku.

Yawe Nug heeb, keeke oh bau bekku

¹⁷ Yawe Nug atte. “Aɗinu ⌊am anam bekku⌋? Antteg! Da heppi, hab bau, wan bau ele daaglah. Tumainu keeke am laanu dabmakppa ii daama, laa nug amu dab iinab mema.

¹⁸ Amu da heppi, Jerusalem am danab ah oh enanagnab dooglagnu daakku. Da heppi, Jerusalem danab ah ag laa dilagppa gamag ahak mattaglagnu daaglag. Anam amunu, dahilad danab ah ag da aɗi aɗi hekkul, ag amunu hanhan oolag gamag ahaɗ!

¹⁹ Da Jerusalemnu ool gamag ahakku. Ao, da dahilad danab ah dilagnu enanagnab dookkul. Amu da heppi, dahilad danab ah ag baula ii gaamna, ag ele ii mahimna. Amuam baula ii daamna. Iitta!

²⁰ Haen amuppa da heppi, nid laa doa, haen tutuib dayaya, ii mauhma. Ge, ⌊gemu laa hetteb amubia⌋ danab laa nug kaino ii meum ii mauhma. Amu laa nug maɗ 100 dayaya mauhlo amu, laa ag nuhignu, ‘Nid bau aakku mauhom,’ dabmelob. Genab, laa nug maɗ 100 ii aolo dayeb amu, laa ag nuhignu, ‘Nug hipunin he, Kayak he, nug mauhom,’ alob.

²¹ Dahilad danab ah ag laulkad buuadna, ag aguppa daaglag. Ge! Dahilad danab ah ag grep eppalattona, ag amunu meu lakkulag.

²² ⌊Gemu haen kuɗum kekeɗ ag uɗin, ahilag keeke aotteb, amge⌋ haen amuppa da heppi, ag laulkad buuppeg, laa ag uɗin amuppa ii daamna. Da heppi, ag keeke ebappeg, laa ag uɗin ii lamana. Aɗinu? ⌊Da ag ehanadkkul.⌋ Amu dahilad danab ah ag ad haen elab daatteb bia daaglag. Ao, danab ah da ag tituanadmi amu, ag aɗi keeke ag eppelagppa hetteb ele amu, ag uɗat amunu meunu haen elabnab oolag gamag ahakku.

²³ Ag uɗat hamu ii hemana; am meu okku. Ag nid ahilkad uugppa daaglagnu ii menuadmana. Aɗinu? Da Yawe, da itadkkul. Da ag, ag buɗulkad dimppanu ele, da ahilagnu ele anam hekkul.

²⁴ Am inam bekku. Ag unuqiɗkkulagnu ii digmeppig haenppa da ehanadkkul. Ao, ag unuqiɗppeppeg doyen, ehanadkkul.

²⁵ Haen amuppa da heppi, doɗ wulp, sipsip nag ele aa laippu daayya, ee lakkulah. Doɗ laion, makau gikkiɗah latte bia gikkiɗah lakku. Mat ag baula danab ah guittak ii mattamna. Dahil qauko, qauko amuam dahilnu tituanak daatte amu, qauko amuppa amu laa nug guittak iinab mettama. Laa nug keeke laa iinab heeb nauhma!” Yawe Nug anam atte.