Aisaia 64 - Nobonob Baibel

¹ O Yawe, qauko ag na noomppa uɗalkkulagnu, nahip kekeɗ ag na onin dooglagnu, wanppan huu anen anen laih laih daatteb ag na noomppa daan hahaɗkkulagnu, na hab matulna nelom am ena.

² Aab ewewe, ad eppeg naunau genab eotte, o aab ewewe, le genab hipaɗ qette, amubia na heppe, kekeɗ nahipad ag na genab dooidkkulagnu ool daatte. Na anam heppe, nahipad kekeɗ ag hahaɗkkulagnu ool niitte.

³ Tumai aɗi na nena, keeke laala, danab nug amu antta, nug ebehi oh bodoetta le mette ele, na keeke amu, ig na anam hekkutnu dab-ii-memut ele amu, na amu heme. Na amu heme, qauko aakku huanak uɗalppig.

⁴ Amu anukkanab, digmak haenppa uɗie, gemu ele auntai laa na heqonppa kayak laa dayaya, laa ag nug dim lamidtteb ele ehanadtte laa anttomte? Iitta! Laa anam ii daatte. Auntai laa kayak laa, nug laa ag nug dim lamidtteb ele ehanadtte, laa kayak amunu daugppa doyomte? Iitta! Laa iitta.

⁵ Danab ah ag oolag gamag ahe, ib tutukku dim lamidtteb, ag nahip ib daulagppa doowo oitteb ele amu, na ag ehanadkkutnu uɗittem. Amge ig nahip ib uuta, ig tuɗidta, ihinig ib mattat gota, hipunin hemut amunu, na oot nauhom. Amu ig na ippunppa ii gokkunig dayeb amu, attemu ig padal mematanu ehanittak aognig?

⁶ Ig oh am oonigppa dubuttid ele na noomppa bemut daattem Keeke oh ig hetata, ihinig dabmakppa, ig kobol amunu am genab tutukku hak kobol doottem ele, keeke amu oh am lamen qatti dubuttid naunab ele bia na amenppa anidttem. Ig am ad uɗug mauɗna qaɗaiedatteb bia hettem. Ao, ulah ad uɗug bunaɗak iwale gotte, amubia hipunin ihinig he, ig iitta mettem.

⁷ O Yawe, ig hipunin heut, na ig ii ehanigttem. Ig hipunin heut, na he, ig ihinig hipunin waappa daat nauhttem. Ig anam aakku daattem amunu, auntai laa na ii unuqidtte. Yo, ig am anam aakku daattem amunu, auntai laa na tutukku dim lamidkkunu ii hette.

⁸ O Yawe, ig am anam aakku daattem, amge na ig Mamenig daattem. Na waa keeke hak danab bia daattem, ig am wan, waa haknu, ig amubia daattem. Na ig oh heigme.

⁹ O Yawe na oo nauhak okkainab, melemel elele iittappa doomnanu, na hanhan hipunin ihinig dabmenan oimnanu oɗ medattem. O Yawe, ig am nahipad danab ah daattem amunu, na dabmegakkutnu unuqidttem.

¹⁰ Kekeɗ ag nahipad aab okkai, nahipnu tituanak daatteb, ag amu hatteg nauhppig, atu taɗak bia daatteb. Sion ele anamib. Ge! Ag heeg, Jerusalem am nauhakib dayeye, danab ah appa ii daatteb bia.

¹¹ Nahip mettid lag nahipnu tituanak dayom, am binag amahlak oppiaawak ele, lag am ig oonigppa, ihinig dayom, ig mamenkad aɗi aguppa na binan meppig ele, amu kekeɗ ag lag amu manaeg, ewa malom. Keeke laa oh ig amunu, “Keeke enanag,” doomut amu, keeke amu oh am nauhakib daatte.

¹² O Yawe, na amu oh anidna, na ig ehanigkkutnu uukkutte? Na ehanittak laa ii mekkanna, bu megappeppe padal mekkunigte?