Aisaia 63 - Nobonob Baibel

Yawe Nug nukka ban eɗidtte

¹ Laa nug Edomnu uɗitte am aun? Nug Bosranu, lamen kokoɗnab laittak ele uɗitte, amge nug am aun? Nuhig lamen am enanagnab, me nug am aun? Nug danab ɠagattag okkai naɗi ele, amu nug huana tappa uɗitte. Danab amu nug nukka, nug am aun daattenu am inam atte. “Imu da, da aɗi madittem amu, nai amuam genab tutukkuib. Da danab ah padal memananu ehanadkkulnu ɠagattag elelenab ele,” awa atte.

² Ge laa nug atte. “Amge aɗinu lamen nahip am kokoɗnab aakku? Aɗinu nahip lamen am danab laa nug leppu aokkunu grep meu tappebeb, grep leppu ta, lamen nuhig qataqette, amubia daatte?”

³ Amu laa nug uɗitte amu, nug nob ma atte. “Da danab nug nukka grep meu tappa leppu awaknu abenppa grep meu tabatte bia, da dakka kekeɗ ele ban hemut. Wan atu ohppanu laa nug da ehaniɗkkunu laa ii dayom. Laa ehaniɗkkunu iitta amunu, da dakka hemi. Da ool nauhehe, da kekeɗ tappaladmi. Ao, da oppoɗil beebe, da tappalatti neppig. Da anam heiyi, ag tiilag lamen dahilppa ta, qataqeum. Dahil lamen oh am tiig amu laittak ele.

⁴ Aɗinu da anam hemi? Danab aun aɗi ag eheɗ heppig ele amu, ahilag nob tutukku mattaknu deɗ uɗia malom. Ao, da danab ah ⌊dahilad⌋ qagaiettakppanu eɗua uhuqak hein madakkulnu haen aakku ba malom.

⁵ Da neegmi, amge laa nug da ehaniɗkkunu iitta. Ao, laa nug da ehanittak meɗakkunu ii dayom amunu, da elele iinab doomi. Anam dayom amunu, da dakka, da dahil ɠagattagppa danab ah padal memananu ehanadmi. Ao, anam dayom amunu, dahil oppoɗi bak ehaniɗe, da amu hemi.

⁶ Da ool nauhehe, da wan atu laihppan huu tabatti neppig. Ao, da oppoɗil beebe, da hei, ag nena qeppig. Da ag tiilag wanppa gokkaɗmi.” Laa uɗiom ele nug anam aum.

⁷ Yawe Nug ig Juda, Nug ihinignu oo mauhaknab doya, Nug keeke ena kuɗum, ig keeke amunu Nug binag mekkunignu daatte amu, Nug amu heum. Nug kobol ena kuɗumnab ig Israel, ihinignu haaha, Nug ihinignu oo gai-iitta doya, oo mekka ehanikkom. Nug ihinignu oo mauha, anamib daatte amunu, da amunu laa amelagppa madikkul.

⁸ Yawe Nug nuhikkud danab ah dilagnu, Nug aum. “Genab, danab ah imuam dahilad. Ag am da bekkalad, ag da ii buppuiɗmana,” awa aum. Nug anam aum amunu, Nug ahilag Padal ii maknu ehanittak beum.

⁹ Haen ag uug nau dooppig amu, Nug ele uug nau doya he, laa nugatoppa daatteb amu, nug ehanatte, padal ii meppig. Nug ahilagnu oo mauhak doya, ag dabmatta, oo gai-iitta doya oo metta ehanittak kobol ele dim lamittom amunu, haen kuɗum ag nau doyegeg, Nug amunu qagaiettakppanu eɗua uhuqak heum. Anukka, haen amuppa, maɗ kuɗum ukkom amu, Nug danab laa nid nakok laa ehanitta awa maotte, amubia ag ehanattom. ⌊Yawe Nug nukka amu oh ahilagnu heum.⌋

¹⁰ Nug anam heum, amge ag Nug waappa daaglagnu uun, nuhig nai tappaeg ne, ag nuhig Ouɗi Oppiaawak Ele, ag Nug uug nau medappig. Ag anam heppig amunu, Nug eɗua, ahilag kekeɗ dayom. Nugnab aakku ag ele ban heppig.

¹¹ Nug anam he, nuhikkud danab ah ag anukka Yawe Nug ag ehanattomnu dabmeppig. Ag Mosesnu haenppa Nug kobol digdig ehanadkkunu heum amu, amuam ag daulagppa doum. Ag amu dabmena, akka akka nug oɗ medappig. “Laa Nug yu gamagppa ib he, ig memetankad aɗi, ahilag okkai Moses ele, ag ib amuppa laih ena goppig amu, Nug gemu adeppa daatte? Laa Nug nuhig Ouɗi Oppiaawak Ele ag oolagppa meum amu, Nug gemu adeppa daatte?

^12-13 Laa nug ɠagattag okkai okkainab nuhigppa Moses ehanittom amu, Nug gemu adeppa daatte? Laa Nug danab ah oh nuhig ɠagattag anidna, daulag ii atimanu Nug he, ig memetankad noolagppa yu obata, laih laih gilil bia dayeye, Nug danab ah nuhikkud ib amuppa yu gamagppa omalatta laih ukkom amu, Nug gemu adeppa daatte?” aon oɗ medappig. ⌊Yawe Nug amu oh heum amu,⌋ Nug nuhikkud danab ah omalatta, le gamagppa ib amuppa ugekke, hos nug uɗem gikkiɗahib daatteppa ugakka, na ii qette, amubia ig memetankad ag ib amuppa oippig.

¹⁴ Makau ag oolnu noak okkai, uɗem ele, ag amuppa nona, le lawona hik aotteb, amubia Yawenu Ouɗi Nug he, danab ah amu ag hik aon daappig. O Yawe, na danab ah oh ag na anidna, na binan amahlak oppiaawak ele dabmekkulagnu na anam henana, na nahipad danab ah omaladna gome.

Aisaia nug Yawe Nug Israel dilagnu oo gai-iitta doya oo matta ehanadkkunu Nug unuqittom

¹⁵ O Yawe, na hab attan daattem. Na daattemppa amu, aben amuam oppiaawak ele, am binag amahlak oppiaawak ele. Amu na neegppe neeb, ⌊uug nau digdig ihinigppa bette⌋ anidkkutnu oɗ medattem. Na anukka nahip ɠagattag okkai eleppa ehanigme amu, gemu na anam ehanigkkutnu yag-nab-bak anukka doome bia iitai doottem? Na anukka ihinignu kobol qinonob hak ele, oo bodoetta le mak kobol eleppa ehanigme, amge gemu na anam bia ii hettem.

¹⁶ Anam, amge o Yawe, na am ig Mamenig. Abraham nug ig ii dooiglo. Ge, Israel nug ihinignu, “Imu, ag am da buɗulad iitta,” alotai. Amge O Yawe, na am ig Mamenig. Na nakka aakkuib, na anukkanu uɗie, gemu ele, na qagaiettakppanu eɗua uhuqaknu ehanittak ihinig daattem.

¹⁷ O Yawe, da ig ib nahip ii ettamtanu, na ib laa oɗe oo ii nettemnu diig dookkulnu ool daatte. Ao, ig ebehinig oh bodoetta le mak kobol nahipnu dim ii lamidtutut, na ib amu oɗe ii oo nettemnu diig dookkulnu ool daatte. Ig am nahipad maɗi nid maɗi ah ele, amu na eɗun ehanigkkutnu oɗ medattem. Ao, ig Israel dilag huu okkai oh, ig am danab ah nahipadnab daattem, amu na eɗun ehanigkkutnu unuqidttem.

¹⁸ Haen tutuib ig nahip aben nahipnu tituanak daatte gumamut Ao, ig gumamut, amge gemu amu, kekeɗ ihinig ag nahip mettid lag heeg nauhom.

¹⁹ Ig danab ah na deɗ laa ig ii gumigme bia bemut daattem. Ao, ig danab ah ag na onin waappa deɗ laa ii daappig, ig amubia daattem.