Aisaia 62 - Nobonob Baibel

Yawe Nug heeb, Juda danab ah ag ehanittak aon, padal ii memana

¹ Da ⌊Yawe ag ehanatteb,⌋ Sion danab ah ag ena daaglagnu amu, da amunu dabmak anuqak awewe, da oɗel ii qamutpa. Yo, da ⌊Yawe ag ehanatteb,⌋ Jerusalem danab ah ag ena daaglagnu amu, da amunu dabmak anuqak awewe, da ii hik aopa. Da anam heppi ukkeb ukkeb, Sion danab ah ag genab tutukku hak kobol dim lamidppeppeg, genab tutukku hak kobol ahilag amuam amahlak okkai bia dayebeb, da batakkul. Yo, da anamib heppi ukkeb ukkeb, Yawe Nug Jerusalem danab ah ehanatteb, padal ii memana; hul huana ewewe danab miagib anidtteb amu, ehanitta, padal ii mak amuam miag atiaknab amubia ba dayebeb, da batakkul.

² ⌊O Jerusalem danab ah,⌋ anam beeb amu, wan laappan danab ah ag ahilag genab tutukku hak kobol anidkkulag. Yo, wan atu laa oh dilag king ag ag ahilag binag amahlak oppiaawak ele anidkkulag. Amu dimppa Yawe Nug ag onilag bau laa ataɗeb, danab ah ag ag onilag amu diiglag.

³ King nug nuhig king haɗ enanagnab dabmetta auta aotte, amubia Yawe Nug ag dabmatta, atognoatta auta awebeb, ag Nug eppegppa anam daaglag. Yo, king nug nuhig king haɗ men ele, men amuam enanag, daden nob okkainab ele, nug amu atognoa auta aotte, amubia ahilag Kayak Nug ag dabmatta, atognoatta auta awebeb, ag Nug eppegppa anam daaglag.

⁴ Haen amuppa, wan laappan danab ag baula ahilagnu, “Kayak Nug danab ah umu uuattom,” ii amana. Yo, ahilag wanppanu, huu laappan danab ah ag, “Yawe Nug he, danab ah qainqainib daaeg, wan am nauhakib daatte,” anam ii amana. Amu laa ag ahilagnu onig, “Hepsiba,” ataɗkkulag. Yo ag, ag Judanu amu, ag onig, “Biula,” ataɗkkulag. Aɗinu? Yawe Nug ahilagnu enanagnab dookku. Amu Nug heeb, danab ah ewau matulak aoya, enanag daattep, amubia ahilag wan am ena daakku.

⁵ Amu danab bau laa nug ah makkun laa awa atognotte, amubia ag Juda danab ah ag wan ahilag atognokkulag. Yo, danab nug ah awa, oo huana gamag ahatte, amubia Kayak ahilag Nug ahilagnu oo enanag daakku.

⁶ Juda danab ah, aɗi uɗitte anittak danab ag aab okkai Jerusalem ena daakkunu aab amunu aɗppa daan, ehanidnana, maɗi ahilag hetteb amu, amubia da ag ena daaglagnu ahilag ehanittak danab maatti daatteb. Ahilag ehanittak amu ag amunppa, tuqanppa ele toettan ii daamna. Ag Yawe unuqidkkulagnu ii uumna. O danab ah ag Yawe unuqidtteb ele amu, ag hik aon daaglagnu aib heppig!

⁷ Iitta! Ag Yawe unuqidppeg ukkeb ukkeb, Nug heeb, Juda danab ag Jerusalem eɗun kalan, ag eɗun uɗin, ahilag wanppa daappeg, Yawe Nug heeb, wan atu ohppan danab ah ag Juda huu binag mettaglag batak. Yawe Nug hik awa dayaya, amu ii hemanu amu, ag ii daan henan, Nug unuqitteg!

⁸ Yawe Nug nuhig ɠagattagppa nuhig nai ɠagattag qetta, Juda danab ah amelagppa inam aum. “Da heppi, ahilag kekeɗ ag baula uɗin, ahilag ee aeg ii lamana. Ge, da heppi, wan laihnu danab ag baula uɗin wain bau, ag amu aoglagnu uɗat okkai heppig amu, ag baula uɗin, amu ii lamana.

⁹ Amu ag Juda, ag ee meu amu awona, ag lakkulag. Ag lanana, ag Yawe binag mekkulag. Ge, ag Juda, ag grep meu amu aona, dahil mettid lag, amuppa ag lakkulag.” Yawe Nug anam atte.

¹⁰ Ag Juda danab ah ag danab ah ag uɗin, Yawe binag mekkulagnu, ag Jerusalemnu ahan, dimittim gona ehanatteg! Ao, ag Juda danab ah ag danab ah ag Yawe binag mekkulagnu ag ahilag ib babaitteg! Ag men oh agappeg ukkeb! Danab ah ag Jerusalem uɗiaknu ib anidkkulagnu, ag Juda, ag pilak laa, ag amu anidna uɗiglagnu humappeg taɗ!

¹¹ Yawe Nug wan atu ohnab danab ah dooglagnu nai imu mattiom. Nug aum. “Ag Juda danab ah amelagppa appeg doyeg! ‘Antteg! Laa nug ag ehanatteb, ag padal ii memananu uɗitte. Ge, antteg! Nug nuhig en okkai nuhikkud danab ah madakkunu awa uɗitte. Am ⌊genab⌋ Nug nuhig keeke enanag, nuhikkud danab ah madakkunu awa uɗitte, ag anam madippeg doyeg!’ ” Yawe Nug anam aum.

¹² Amu laa ag nuhikkud danab ah dilagnu, “Danab ah Yawenu oppiaawak ele,” akkulag. Ag, “Danab ah umu amu, Yawe Nug ag hipuninnu qagaiettakppanu eɗua uhuqak ha mattom,” akkulag. Ag Jerusalemnu, “Danab ah ag aab okkai amunu oolag hette,” anana, ag, “Aab okkai amu hamu dayom, amge gemu anam ii daatte. Danab ah ag eɗun, appa daatteb,” akkulag.