Aisaia 61 - Nobonob Baibel

Yawe Nug heeb, nuhig Ouɗi Nug nuhig maɗi nid, nuhigppa daakku

^1-3 Yawenu maɗi nid nug inam atte. “Yawe Nug da daɗek dilagppa nai ena mehuqkkulnu goɗen gokkaɗakppa tituaniɗom, diig amunu Naɗi Yawe Nug nuhig Ouɗi dahilppa daatte. Nug da laa ag oolagppa uug okkai ele dootteb ehanadppi, ag oolag uug iitta ele dooglagnu, Laa, ag laa aɗalatteg, ag eppelagppa daatteb amu, da appi, ag uhuqak aoglagnu, Da appi, laa ag maniguittak nau gatatu eleppa daatteb, ag uhuqak aoglagnu, Nug danab ah, ahilagnu ii helo bia me, Nug ag ehanatta, oo mak haen madakku amu, Nug da ag amelagppa amunu akkulnu, Nug danab ah eheɗ hetteb ele, ahilagnu eheɗ haknu nob tutukku madakku haennu akkulnu, Nug danab ah ag oolagppa uug dootteb amu heeb, ag oolag mekkunu madikkulnu, Nug da laa ag Sion appa oolagppa uug doon gaatteb amu, da ag ehanadkkulnu, Nug da heppi, laa ag uug anam doon, ikkilkadppa uhuɗ metteb amu, ag eɗun, ena daan, uhuɗ amu ihappeg ukkeb, igippan haɗ neekkak enanag ele ag anen anen ag ikkilkadppa daaglagnu, da heppi, laa ag oolagppa mahiak dootteb ele amu, ag eɗun, enaib daan, danab nug king daakkunu laa nug igippa goɗen gokkaɗe, gamag ahak dootte, amubia danab ah imu ag gamag ahak dooglagnu, da heppi, laa ag oolagppa uug dootteb, ag ouɗilag na qekkunu hette bia doon, lamen ena ii tagatteb, ag oolagppa oo gamag ahak doona, ag Kayak binag mena, ag lamen ena takkaglagnu meiɗe uɗimi. Ehanittak dahil amuppa ag ad ok Yawe Nug eppom bia bena, genab tutukku hak danab ah daaglag. Ag anam bia daappeg, danab ah laa ag, ag anadna, ag Yawenu binag amahlak oppiaawak ele anidna, ag Nug humidkkulag.

⁴ Danab ah amu ag geha eɗun lag keeke anukka heeg nauhadppig buualadkkulag. Yo, ag geha eɗun, lag, amu keeke laa ele, laa ag anukkanab loppaɗatteg nauhppig ele amu, ag heppeg, ena daaglag. Ag geha eɗun, aab okkai anukka laa ag heeg nauhom amu heppeg, ena daaglag. Yo, ag geha eɗun, aab okkai anukka laa ag loppaɗatteg nauhadppig ele, ag amu heppeg, ena daaglag.

⁵ O dahilad danab ah, wan laihnu danab ah ag geha, ag dahilad danab ah, ag ahilkad sipsip gumadkkulag. Ao, wan laihnu danab ah ag, ag geha dad ahilkadppa uɗat henana, amu grep dad ele gumadkkulag.

⁶ Ag geha anam henana, ag ag, dahilad danab ah, ag ahilagnu akkulag. ‘Imu, ag am Yawenu ɗo maɗoɗnu maɗi nid daatteb,’ akkulag. Ao, ag geha ag dahilad danab ah ag ahilagnu, ‘Ag am ahilag Kayak, nuhig maɗi nid,’ akkulag. ⌊Danab ah laihnu ag geha ag Israel, ahilagnu anam doona,⌋ ag keeke ena ena ahilkad amu akkan uɗina, ag madappeg, ag amu diina, ag geha ena daaglag. Ao, wanppan wan laala, appan danab ag geha ahilag en okkai ag madappeg, ag gamag ahak okkai dooglag.

⁷ Danab ah dahilad ag uɗa nak nau dooppig, amge Yawe Nug ehanatteb, ag enaib daaglag. Ao, danab ah dahilad uɗa nak nau guittak ele dooppig, amge dahilad danab ah ag keeke Yawe eppegppan aoglag, amuam ag aulag amu, ag amunu oo gamag ahak okkai dooglag. Yawe Nug anam ehanadkku amunu, ag ahilag wanppa daanna, Nug eppegppan keeke okkai okkai, tatam awak huan eɗittak aonna, ag hanhan oo gamag ahak doon oiglag,” awa atte.

⁸ Yawe Nug atte. “⌊Da ahilagnu anam hekkul.⌋ Aɗinu? Da, da Yawe, da nai doya mala hettoɗia epeɗia elele mettak kobolnu ool mauhtte. Ao, am anam, amge, da yab awak, hipunin hak laa ohnu ele amu da eheɗ nau ninig ele doottem. Da ⌊dahilad danab ah ag da tutukku dim lamiɗtteb ele,⌋ da Yawe, da oo metta ii uuak kobol dim lamitten, ag nob ena madakkul. Da nob ena matten heppi, da ag ele ig nug tituana nai qakkak hanhannu hekkunig.

⁹ Wan atu ohnu danab ah ag dahilad danab ah buɗulkad dooglag. Ge, wan atu ohnu danab ah ag dahilad danab ah dilag menuattak dooglag. Ag amu dooppeg, aun aɗi ag dahilad danab ah buɗulkad anadna amu, ag inam dooglag. ‘Danab amu ag Yawenu danab ah. Yawe ag itittak ena mattom.’ ” Yawe Nug anam atte.

¹⁰ Da padal mepanu Yawe Nug ehaniɗom, amuam Nug lamen ena da beɗulppa melo, amubia daatte. Ge! Kayak he, da genab tutukku hak danab daattem, amuam Nug lamen elab enanag da beɗulppa melo, amubia daatte. Nug anam heum amunu, da nuhignu enanagnab doottem. Ge! Da nuhignu oo gamag ahak okkai doottem. Lamen Nug dahilppa meum amu, amuam danab nug ah aokkunu haaha, nug igippa lamen enanag, mana mettak danab mette bia mette amu, lamen dahilppa meum am amubia. Yo, ah nug danab aokkunu haaha, nug bala enanag beɗuppa mette amu, lamen dahilppa meum am amubia.

¹¹ Anam amunu, ee tumu wanppanu genab digma ba, okkai mette, o dattanu keeke genab bette, amubia Naɗi Yawe Nug heeb, genab tutukku hak kobol wan atu ohppa okkai meeb, danab ah ag Nug binag mekkulag.