Aisaia 60 - Nobonob Baibel

Yawe Nug heeb, Juda danab ah ag binag amahlak oppiaawak ele daaglag

¹ Jerusalem danab ah, Juda danab ah ele, ahilag amahlak uɗiom. Ao, Yawenu binag amahlak oppiaawak ele amu, amuam ahilagppa beum daatte. Anam amunu, ag ahan, aam danab ah amahlak madatte bia, ag danab ah laa oh Yawenu amahlak matteg!

² Aɗinu? Antteg! Gatatu wan atu laa oh tonom niitte. Ao, gatatu teppu ele danab ah oh tonattom niitte. Gatatu ag tonattom niitte, amge Yawe Nug ag Juda gumatta uɗiom daatte. Ao, nuhig binag amahlak oppiaawak ele am amahlak bia ahilagppa honaɗtte.

³ Juda danab ah, amahlak Yawenu ahilagppa uɗitte amu, wanppan wan ohppan danab ag ahilag amahlak, amuppa uɗiglag. Ao, king ag aam buttua ba, wan atu oh amahlak medatte, amubia king ag amahlak okkai ahilag am anidkkulagnu uɗiglag.

⁴ Juda danab ah, ag amelag human, laih laih neekkeg! Ahilkad laa ag qagmena, ag gukkuadna uɗiglag. Ag bekkalkad umanabnu uɗiglag. Laa ag aɗelkad eppelagppa mawadna uɗiglag.

⁵ Ag amu anidna amu, ag oolag gamag eheɗ ahakku. Ao, ag gamag ahak naɗinab dooglag. Aɗinu? Wan laappan danab ag Yawe binag mekkulagnu yu qaɗeppa uɗina, en kuɗum aon uɗiglag. Ao, wan laappan danab ag Yawe binag mekkulagnu en okkai mawadna uɗiglag.

⁶ Wan laappan danab ag en mawadna uɗiglagnu ag kamel bau kuɗumnab qaɗelagppa maadna uɗippeg, ahilag kamel am ag Juda, ahilag wan tonaglag. Danab amu ag Midian wanppanu, Epa wanppanu ele uɗiglag. Seba danab ag gol, prankinsens ele aon uɗinna, ag Yawe binag mekkulag.

⁷ Kedar danab ag ahilkad sipsip, meeme ele manan Yawe mettaknu aon uɗiglag. Ao, Nebaiot danab ag sipsip dawai amunu aon uɗiglag. Ag aon uɗiglag amu, Yawe Nug amunu atte. “Ag aon uɗippeg, ag main meɗappeg, da oolppa ena, elele dookkul. Ag amu heppeg, da heppi, danab amu ag dahil mettid lag binag amahlak oppiaawak ele, ag appan bala bia daaglag,” awa atte.

⁸ ⌊Uub okkai umu uɗitteb amu,⌋ ag lombig ulah yeeye, paha paha laih gotte, o uppuɗil beɗulag nakok nug eɗua teɗppa tutukku gotte, ag amubia gotteb amu, ⌊uub⌋ amuam attemun?

⁹ ⌊Yawe atte, amubia uub amuam ag wan umanabnu danab ah aon uɗitteb.⌋ Nug atte. “Danab ah wan miagnu, wan umanu ele ag da aniɗna, ehanittak aoglagnu oolag huana hette,” awa atte. Uub tatam uɗitteb amu, ag Tarsisnu. Ag, ag Juda, ag bekkalkad umanabnu aon uɗinna, ag laih appanu danab dilag silwa, gol ele, ag amu ele aon uɗitteb. Ag Yawe, Nug ag Israel, ahilag Kayak Oppiaawak Ele, Nug ag Israel binalag okkainab meum ele amu, ag diig amunu ag silwa, gol amu ele aon uɗin, Nug binag mekkulagnu hetteb.

¹⁰ Amu Yawe Nug atte. “⌊Haen amuppa⌋ wan laihnu danab ag Jerusalemnu aɗ eɗun bappaidkkulag. Amu wan laappan danab dilag king ag, ag Juda danab ah dilag maɗi nid bia daaglag. ⌊Keeke aɗit amu bekkulah,⌋ amunu diig am, ag Juda danab ah ag hipunin heeg, da ool nauhom amunu, da ag bu madakkul, amge da ag ool matte, da ii helom bia me, da ag ehanadkkul.

¹¹ Wan laappan danab ag en ahilag aon, ag Juda mattaglagnu, ag Juda ag danab amu dilag king aab ooppa omalna gokkulagnu ele amu, Jerusalem aɗnu od am hanhan matulakib daaglag. Danab ag od amu amun, tuqan ele ii manadmana.

¹² Amunu diig am wan laappan danab huu atten ag, ag Juda waappa daanna, ehanadkkulagnu uuglag dayeb amu, da Yawe, da heppi, ag padal mena, iitta mekkulag.

¹³ Danab ag Lebanon binag aon uɗin, ag mattaglag. Amuam ad pain, ad fir, ad saiprus ele. Ag ad amu dahil lag neekkak enanag daakkunu aon uɗiglag. Ag aon uɗin, dahil lag, da aguppa daattem ele amu, da heppi, laa ag ad amuppa heppeg, dahil mettid lag am neekkaknu enanag daakku.

¹⁴ Juda danab ah, danab ag eheɗ hadappig ele, danab amu buɗulkad ag uɗin, ag noolagppa dup nona, ikkilag wan yaakku. Ao, laa ag ahilagnu ena iinab dooppig, ag ag noolagppa gatelag qaun ona, ikkilag wan yaakku. Ag anam hena, ag Jerusalemnu, ‘Yawenu Aab Okkai,’ akkulag. Ag, ‘Israel dilag Kayak Oppiaawak Ele, Nug Sion appa ana daatte,’ akkulag.

¹⁵ Am genab, da hei, laa ag ahilagnu nau ninig ele doon, ag uɗin heeg nauheg, laa nug laih gokkunu ippa uɗia, haen tutu dayaya ii ukkom. Iitta. Ib laa awa, laih ukkom. Anam, amge da heppi, Jerusalem babaittak dayeb, danab ah ag Jerusalemnu enanagnab, aab bala enanag dooglag. Ag Jerusalemnu oo gamag ahak okkai hanhan dooglag.

¹⁶ Ag Juda, ag nid nug anignu huh latte, amubia ag wan atu laihnu keekeppa ena daaglag. Ao, nid nug anig huhugppa huh latte amu, amubia laa ag ena daaglagnu keeke mattaglag. Ag amu hekkulag amunu, ag imu dooglag. Da, da am Yawe. Amu laa nug ag ehanatte, ag padal ii metteb amu, amuam da. Laa nug ag qagaiettakppanu eɗua uhuqak ha madatte amu, amuam da. Da am Laa Ɠagattag Okkai ele, Jakop da binal meum ele.

¹⁷ Da heppi, danab ag keeke onig brans aon uɗin, ii mattamna. Iitta. Ag gol aon uɗin mattaglag. Da heppi, danab ag aen aon uɗin, ii mattamna. Iitta. Ag silwa aon uɗin mattaglag. Da heppi, danab ag ad aon uɗin, ii mattamna. Iitta. Ag brans aon uɗin mattaglag. Da heppi, danab ag men aon uɗin, ii mattamna. Iitta. Ag aen aon uɗin mattaglag. Da heppi, maɗoɗ kobol ag Juda, ahilag gawana daakku. Ao, da heppi, genab tutukku hak kobol am ahilag okkai daakku.

¹⁸ Da amu heppi, ag wanelagppa laa nug layag eheɗ ii hetama. Ao, laa nug ag oolagppa danab, o keeke laa heeb ii nauhma. Amu ii daama, kobol enaib daakku. Ag aab okkainu aɗ onig, ‘Yawe Nug ehanikke, ig padal ii memut,’ ataɗkkulag. Amu ag aɗnu od onig, ‘Ig Yawe binag metu!’ ataɗkkulag.” Yawe Nug anam atte.

¹⁹ “Ag baula amunppa aamnu amahlak aoglagnu ii daamna. Tuqanppa amu, ag kalam enanagnu amahlak aoglagnu ii dabmemana. Am inam daakku. Yawe Nug ahilag amahlak hanhannu daakku. Ao, ahilag Kayak Nug heeb, ag binag amahlak oppiaawak ele daaglag.

²⁰ Amu gemu aam no, gatatu manatte amu, ag haen amuppa anambia ii anidmana. Kalam gemu ele gatatu manatte amu, ag haen amuppa anambia ii anidmana. Aɗinu? Yawe Nug ahilag amahlak hanhannu daakku. Ao, Nug heeb, ag baula uug, oo doyak keeke iinab anidmana.

²¹ Ag Juda danab ah oh ag genab tutukku hak kobolib dim lamidnana, ag ahilag wan aon, amuppa hanhan daaglag. Laa ag ahilag wan baula ii gumamna. Danab nug ee eppe, qaɗu ba okkai me, nuhig daatte, amubia ag Juda ag dahil daaglag. Danab keeke eppegppa he, nuhig daatte, amubia ag dahil daaglag. Da danab ah laa oh ag dahil binag amahlak oppiaawak ele anidkkulagnu da hak anam hekkul.

²² Ag Juda ag oolagppanu aab ikki laa, aab ikki amuam danab kuɗum iitta amu, ag dahil ehanittakppa appatna, kuɗumnab daaglag. Ao, aab ikki nakoknab, aab ikki laa oh aab ikki amu eɗidtteb amu, aab ikki amuam appatppeg, huu naɗinab, ɠagattag ele daakku. Da am Yawe. Da keeke imu bekkunu haen uɗieb amu, da paha heppi bekku.” Yawe Nug anam atte.