Aisaia 6 - Nobonob Baibel

Aisaia nug propet daakkunu Kayak aum

¹ Aria haen King Usia mauhom, maɗ amuppa amu da Naɗi Nug nuhig sia kingppa dayeye anidmi. Sia king nuhig am attannab dayeye, Nug amuppa dayom. Am Naɗi Nug lamen beɗuppa meum am elabnab, lamen elab nuhig amu ukka, nuhig mettid lag ohppa elele mette dayom.

² Nug anam dayeye, engel-serep ag hippaidna, Nug talilidna daappig. Am engel-serep oh anen anen ag haulag eblaih laippu ele. Am ag oh haulag aɗit laa amuppa iɗulag hautona, haulag aɗit laappa ag beɗulag hautona, haulag aɗit laa, amuppa ag hagagaɗtteb.

³ Amu engel-serep amu ag oh anen anen, ag laa anen anen ag agakka nug amegppa ag inam aon enana daappig. “Yawe Nukka Ɠagattag Oh Ele, Nug oppiaawak, Nug oppiaawak, Nug oppiaawak. Yawe Nukka Ɠagattag Oh Ele, Nug oppiaawak ele. Nuhig binag amahlak oppiaawak ele am wan oh elele mettom daatte,” aon enan daappig.

⁴ Haen engel ag anam eegeg, mettid lag amuppa kahug ambeebe, men okkai okkai, ag amuppa lag heppig ele amu, men amu uɗalppig.

⁵ Amu oh be, da inam emi. “Dahilnu am gadonnab gadon! Da aakku nauhmi daattem! Aɗinu? Da am danab oppiak ele iitta, amu danab ah da ag oolagppa daattem ele, ag am danab ah oppiak ele iitta, amge da king, Nug Yawe Nukka Ɠagattag Oh Ele, da Nug anidmi,” awe emi.

⁶ Da anam ei, engel-serep oolagppan laa nug qaɗabppa aab eotte amu, nug aab aɗu amuppanu aab ottag laa ewewe hoqap-ppa aɗe, hoqap-ppa daye, nug amu aɗa, hagagɗa awa, da gumiɗa uɗiom.

⁷ Nug awa uɗia, aab ottag amu da ottilppa nakokib ma, nug da amelppa inam aum. “Antte, da aab ottag na ottinppa memi. Gemu na beɗunppa aab laa iitta. Gemu ⌊Naɗi Nug⌋ nahip hipuninnu nob nau nuhig uɗat naɗippa iitta mekkunu ha malom,” awa aum.

⁸ Aakku Naɗi Nug inam oɗmak heehe baag doomi. Nug inam aum. “Am da aun geha meppi gokku? Am aun nug geha ihinig nai awa gokku?” awa aum. Awa a amu, da ami. “Da iikku; na appe, da gokkul,” ami.

⁹ Da anam ai amu, Naɗi Nug da amelppa aum. “⌊Ena,⌋ na gona, danab ah dahilad imu amelagppa nai imu appe doyeg! ‘Ag nai daulagppa doon doon daaglag, amge nai meu am tutukku ii doomna. Ao, ag neegna neegna daaglag, amge ag diig tutukku ii anidmana.’ Na anam aon a!” awa aum.

¹⁰ Naɗi Nug anam ana, Nug da amelppa nai tuɗitta aum. “Heppe, danab ah imu ag oolag ɠagattag eppaɗ! Heppe, ag daulag nai dookkunu elele iitta dayaɗ! Heppe, ag amelag amuhak dayaɗ! Amu iitta daalo, ag amelagppa keeke anidna, daulagppa nai doonna, ag nai diig oolagppa tutukku doona, ag eɗun dahilppa dokkulagtai. Ag anam hekkulag dayeb amu, da heppi, ag ena daaglag,” awa aum.

¹¹ Naɗi Nug anam a amu, da Nug inam oɗ mettami. “Naɗi, da anam heppi, haen gane laa ele ukkeb, da batakkul?” ami. Da ai amu, Nug inam da amelppa aum. “Geha aab okkai oh nauhppeg, wan ele nauhppeg, aab, lag ele hamu daappeg, danab ah aab, lag ele amuppa laa ii daappeg, na batakkut.

¹² Da Yawe, da geha danab ah imu oh lamadppi, ag atu uma gona daappeg, wan imu hamu, danab ah iitta bia dayebeb, na batakkut.

¹³ Am danab ah laib laib laa wan imuppa daaglag, amge da baula heppi, wan imu eɗua baula nauhaknab daakku. Amge amu dimugppa danab ah dahilad oppiaawak ele laippu laippunab, ag ad laa oeg qiiom, diig daatte, ag amubia daaglag. Ag ad terebint laa, o ad ok laa ele oeg, diig dayaya, ita bette amu, danab ah dahilad ag amubia hekkulag,” awa aum.