Aisaia 59 - Nobonob Baibel

Aisaia nug hipunin digdig Israel danab ah heppig elenu daulag batom

¹ Antteg! Yawe Nug ɠagattag daatte. Nuhig ɠagattag amuppa Nug danab ah padal memananu ehanadtte amu, ɠagattag amu ii iitta meum. Amu Nug danab dilag unuqittak dookkunu ele elele daatte

² ⌊Anam amu Yawe Nug ehanadkkunu elele daatte, amge Nug ii ehanadttenu diig laala am ag Juda,⌋ ag hipunin heegeg, hipunin amu ag heeg, ag Kayak ele ouqak ii daatteb. Ao, ag hipunin heegeg, hipunin amu he, Kayak Nug ag ena ii neekkadtte amunu, Nug ahilag unuqittak ii dootte.

³ Ag danab aqaeg mauheg, ag tiilag ag eppelagppa qataqak daatte. Ao, hipunin ag eppelag doɗoppa qataqak daatte. Ag oɗelagppa hambuppuak nai maditteb. Ge! Ag nai laa, nau hak danab nai nau digdig maditte, ag nai nau amubia maditteb.

⁴ Hettoɗiakppa ag oolagppan laa nug nai tutukku ii maditte. Ge, hettoɗiakppa ag oolagppan laa nug nai genabib ii maditte. Juda danab ah ag oh nai meu iitta, nai hamu, ag nai amu hambuppuna mattinna, ag nai amu ehanadkkunu dabmetteb. Danab wau ele aa oiyya, ah nug nid ele daya, nid menutte, amubia ag uug bekkulagnu heeg beeg, kobol eheɗ ele betteb.

⁵ Mat nau oppalkad makkuleg, mat nau betteb, amubia Israel danab ag heeg, kobol eheɗ kuɗum betteb. Danab laa nug mat nau amu oppa laa lakkunu haaha, oppa oppate, mat nau ba emale mauhtte. Ge, laa nug oppa amu oppate, mat nau aakku bette. Danab amu ag goɗim nug nuhig teɗ bappaidtte, amubia danab amu ag hambuppuak nai maditteb.

⁶ Danab ah ag goɗim teɗ aon, lamen hekkulagnu elele iitta. Ao, danab nug goɗim teɗnu muɗippa lamen ha, beɗu tonakkunu elele iitta bia amu, Juda danab ag ahilag hak nauppa ehanittak aoglagnu elele iitta. Ag ahilag hak am nau. Ag eppelagppa laa guittak nau mauhnoak madatteb.

⁷ Ag nau hekkulagnu qaiettan gotteb. Ao, ag danab eheɗ laa ii heum qeppeg mauhkkunu pahaettak daatteb. Ag hanhan kobol nau hekkulagnu dabmenan oitteb. Ag aɗi aɗi hetteb ele amu, ag amuppa keeke heeg nauhtte, ag heeg, keeke ena dayom am gemu nauhak daatte.

⁸ Ag laa ele, maɗoɗ ele daaglagnu oolag ii maidtte. Ag aɗi aɗi hetteb ele amu, ag amu henana, ag nai doya mala hettoɗia epeɗia elele mettak kobol iinab dim lamidtteb. Ag ib kaliak ele aon oitteb. Auntai nug ag ele oitteb amu, nug maɗoɗ nakoknab laa iinab anidmana.

Israel ag hipunin anam heppig amunu, uug ahilagppa beum

⁹ Ig Juda ig hipunin anam hemut amunu, ig nai doya mala hettoɗia epeɗia elele mettak kobol ii anidttem. Ao, genab tutukku hak kobol ihinigppa ii daatte. Ig amahlak anidkkunignu neegttem, amge ig gatatu aakkuib anidttem. Ao, ig amahlak okkai anidkkunignu neegttem, amge ig lokko gatatu ele ooppa oittem.

¹⁰ Ig danab ameg gaɗuak ele, nug gilil eppegppa aɗaɗa gotte, ig amubia hettem. Ao, ig danab ameg nauhom ele, nug eppegppa keeke aɗaɗa gotte, ig amubia hettem. Ig danab ameg ena iitta tuebnab keeke ii andatta, tappa taataɗ qette amu, ig amubia aam anigppa hettem. Danab ɠagattag oolagppa amu, ig danab mauhom bia daattem.

¹¹ Ig doɗ naɗi onig bea, nug ⌊eheɗ doyaya⌋ guɗumtte, ig amubia hettem. Ig uppuɗil beɗulag nakok nug oo doyak ele gaatte amu, ig amubia gaattem. Ig nai doya mala hettoɗia epeɗia elele mettak kobol ig oonigppa bekkunu dabmetat oittem, amge kobol amu nakok laa be ii anidttem. Ao, ig laa eppelagppa ii daamtanu dabmetat oittem, amge ig ehanittak amu iinab anidttem.

¹² Aɗinu ig amu ii anidttem. Ig hipunin kuɗumnab hetat oitut, na, Yawe, na hipunin amu oh anadttem. Ao, danab hettoɗiakppa layag eheɗ heumnu atte amu, ihinig hipunin ag ihinignu na amenppa anam bia hetteb. Eheɗ hak ihinig am laa nug he ii iitta meppig; amu ihinigppa ina daatteb. Ao, ig hipunin digdig hemut amu, ig amu aakku doottem.

¹³ Hipunin ig hemut am, Ig Yawe waappa daagnignu uut, ig nuhig nai tappaut neum. Ig Nug dim lamidkkunignu amut, amge ig uut, ib laappa gomut. Ig ihinig Kayak dimettamut. Ig danab ah laa ele eheɗ hadata, uug kuɗum mattata, ig laa ag ele amu hekkulagnu eeɗadmut. Ig Kayak waappa daagnignu uut, ig laa ag ig gumigkkulagnu maattom ele amu, ig ag lamadtata, ig laa ag anam hekkulagnu eeɗadmut. Ig oonigppa hambuppuak nai dabmetat, ig amu oɗenigib mattimut.

¹⁴ Nai doya mala hettoɗia epeɗia elele mettak kobol am uma ukkom daatte. Ao, genab tutukku hak kobol am miag iitta, am umaib daatte. Aɗinu? Doyak diig genabibppanu mattiaknu, dim lamittaknu ele, kobol amuam na qeum, ihinigppa ii daatte. Ge, doyak diig genabibppanu mattiak kobol, dim lamittak kobol ele ihinigppa ii daattep.

¹⁵ Doyak diig genabib anttaknu am, laa anam hekkunu elele iitta. Amu auntai nug nau hekkunu uutte amu, laa ag doɗ qeppeg mauhkkunu hetteb bia danab amu qekkulagnu hetteb. Anam daatte amu, Yawe Nug neekka, danab ah oh ag nai doya mala hettoɗia epeɗia elele mettak kobol iinab dim lamidtteb anttom amunu, Nug ena ii doyom.

¹⁶ Yawe Nug danab ah ehanatteb, padal ii memananu laa ii daye anttom. Ao, Nug laa danab ah ehanatteb, padal ii memananu ii daye antta, Nug eheɗ nau doyom. Nug anam doyom amunu, Nug nukka nuhig ɠagattagppa Nug danab ah ehanatteb padal ii memananu heum. Ao, Nug genab tutukku hak kobol dim lamidtte amu, nug amuppa ɠagattag awa, amu heum.

¹⁷ Amu ban danab nug kekeɗ ele ban hekkunu, nug guppiɗ laa qahaɗ bia momoppa pale dayeye, nug igippa aen hat mewowa, bannu lamen ele tagatte amu, amubia Yawe Nug nuhig kekeɗ ele ban hekkulagnu keeke oh babaitta malom. Nuhig guppiɗ qahaɗ bia am genab tutukku hak kobol. Nuhig aen hat igippanu am ehanatteb, padal ii memananu kobol. Beɗuppanu lamen nuhig am kekeɗ ag eheɗ heppignu nob tutukku madakkunu dabmak aakku. Aria, nuhig lamen, lamen laa qaɗeppa daakkunu, amuam uɗat hekkunu daatte yag-nab-bak doyak aakku.

¹⁸ Nug nuhig kekeɗ, ag kobol aɗi aɗi heppig amu, Nug amu andatta amunu, bu elele madakku. Nug danab ah ag nuhig kekeɗ daan oitteb ele, Nug amu dilagnu oppoɗi beebeb, bu madakku. Ao, Nug laa ag nuhignu, “Ihinig kekeɗ,” dootteb amu, Nug ahilagnu ag eheɗ heppignu dabmaama, bu madakku. Nug danab ah wan miagnu, wan umanu ele, Nug ag nob atten awaknu daatteb amu, nug anamib madakku.

¹⁹ Nug ɠagattagnab, gu huanaknab neene, le ui eheɗ oowo, ulah huanak ele dim lamitta le duttuntte bia haaha, bu madakku. Anam amunu, danab ah ag aam nodeppa daatteb, ag Yawenu ebehilag oh bodoetta le mekku. Ao, aam bedeppanu danab ah ag Yawe, Nug binag amahlak oppiaawak ele, ag amu doon, nuhignu ebehilag oh bodoetta le mekku.

²⁰ Yawe atte. “Amu laa, Nug danab ah qagaiettakppanu eɗua uhuqaknu ehanittak hette ele amu, nug Sion uɗikku. Ao, laa uɗikku ele, Nug Jakop buɗub oolagppanu aun aɗi ag oolag eɗueb, hipunin ahilag dimettaglag amu, Nug ag ehanadkkunu uɗikku.” Yawe Nug anam awa atte.

²¹ Amu Yawe Nug atte. “⌊Danab ah ag oolag eɗuom ele⌋, da, ge da, da ag ele imu hekkunignu nug tituana nai qakkak hettem. Da dahil Ouɗi, Nug ahilagppa daatte, amu da heppi, Nug ag, ag bekkalkad aɗelkad ele, amu ag bekkalkad aɗelkad ele amu, Nug ag oh ele gemu, hanhan ele anam daaglag. Laa, dahil nai, ag oɗelagppa daatte amu, da heppi, nai amuam ag oɗelagppa, ag bekkalkad aɗelkad ele oɗelagppa, amu ag bekkalkad aɗelkad buɗulkad oɗelagppa ele gemu, hanhan ele anam daakku.” Yawe Nug anam atte.