Aisaia 58 - Nobonob Baibel

Yawe Nug danab attem ha, ee ohnu kud ma dayak kobol genab dim lamidkkunu ɗo meum

¹ Yawe Nug atte. “Ag laa, ag dahil nai mattiglagnu daatteb, ag Israel danab ah ag dahil nai dooglagnu nai amu huana eppeg doyeg! Ag qinonob aib madippig! Trampet huana gaatte bia eppeg doyeg! Ag dahilad danab ah, ag da waalppa daaglagnu uun, dahil nai tappaeg neene oitteb, ag amunu appeg doyeg! Ao, ag Jakop buɗub, ag hipunin digdig henan oitteb amu, ag amunu appeg doyeg!

² Deɗ oh Israel danab ag ⌊gaɗalagppaib⌋ da aniɗna dim lamiɗkkulagnu mattiɗtteb, ag dahil nai dooglagnu hetteb bia hetteb, ⌊amge ag keeke amu oh ag oolagppa ele ii hetteb⌋. Ag huu laa kobol tutukku dim lamidtteb, dahil ɗo di-ii-mettan oitteb, ag huu amu, ag kobol amu genab hetteb bia ⌊dimittimnuib⌋ hetteb. Ag anam heegeg, laa anadna, ‘Danab ah umu ag genab Kayaknu ib dim lamidkkulagnu oolag hette,’ atteb, amge iitta! Ag da, Kayak, ag da hettoɗiakppa nai doya mala hettoɗia epeɗia elele mettak kobol dim lamidkkulnu anana, ag da Kayak, ag dahilnu, ‘Nug ig guguikka uɗikkunu oonig hette,’ ele atteb ⌊amge ag amu oh am gaɗalkadppaib hetteb. Oolagppa ele ii hetteb⌋.

³ Ag amu henana, ag da amelppa atteb. ‘Aɗinu ig ee ohnu kud meta daattem, amge na ii anigttem? Ao, aɗinu ig ikka, ig oninig qeut nette, amge na amunu dabmak nakok laa ii aottem?’ Ag, ag anam atteb, amge ⌊gadon, ag kaliak nau hetteb. Deɗ ag ee ohnu kud mena daatteb amu, deɗ amuppa ag dimittimnuib, da anidkkulnu hetteb⌋. Ag ee oh lamananu genab kud daatteb, amge keeke laa ag oolag hette ele, ag amu hetteb. Ag amu henana, ag ahilkad maɗi nid maɗi ah ele eheɗ hattana, uɗat huanak madatteb.

⁴ Haen ag ee ohnu kud mena daatteb amu, haen amuppa ag nai aeg ona, aeg do, ag akka akka nug qenana, ag eppelag bitakkan, nau henana, nug makkuɗak, nug qak uɗat ele hetteb. Ag attem hena, ag ee ohnu kud mena daanna, kobol nau amu oh ele henana, da ahilag unuqittaknu dabmekkulnu dabmetteb?

⁵ Ee lanak kud waappa dayaknu deɗ am beɗu dimittimnuib danab nug nukka onig qe naknu deɗte? Deɗ amuam danab nug qao bia duug qiieb nob, lamen heɗiag ele, amu uhuɗ ele attan niikkunu deɗ aakkuibte? Danab nug anam hette amu, kud mak amuam kud mak genabte? Da Yawe, da kud mak deɗ laippu anamnu ool hettete? Iitta!

⁶ Da kobol anamnuib amu, da ool ii hette. Kud ma dayaknu da ool hette ele am inam. Danab nug eheɗ laa ii heum, amge nug hippalak daatte amu, ag danab laa baegppanu sen uhuqeg, hamu daatte, amubia ag uhuqppeg, hamu dayaɗ! Amu doɗnu duugppan tuqai makau aɗit duultippa qakkak daatte, danab ag muɗi amu uhuqtteb, ag amubia danab ah uhuqatteg! Amu ag danab ag laa eppelagppa daan, uug dootteb amu, ag ehanadna, danab ag doɗnu duugppan tuqai qiialatteg netteb, ag amubia uugppanu uhuqatteg!

⁷ Amu ele, ag danab ag ee iitta, enug daatteb amu, ag ee mattanna, laa lag keeke iitta, qati qati oitteb amu, ag amuppa daaglagnu aben matteg! Amu haen ag laa nug lamen iitta dayeb anidna, ag nug lamen metteg! Ag lailkadnab dilagnu aib daulag atiom! Ag keekenu tutu meppeg amu ehanadna matteg!” Yawe Nug anam atte.

⁸ Amu ag anam heppeg amu, amahlak ahilagppa pahanab buttua amahlak uɗitte bia uɗikku. Yawe Nug heeb, ag paha eɗun ena daaglag. Amu ele, Yawe Nug ahilag genab tutukku hak kobolnu diig daatte, Nug geha ag noolag awa, anuqa ugakka, atognoadkku. Yo, Yawe Nug binag amahlak oppiaawak ele, Nug ag dim lamattatta, atognoadkku.

⁹ Ag anam hena, ag geha Yawe onigppa eppeg amu, Nug ag oɗelagppa aokku. Yo, ag geha Nug onigppa ehanadkkunu eppeg amu, Nug ag oɗelagppa awa, “Da iikku daattem”, akku. Ag laa ɠagattag iitta ele eheɗ ii hattaglag dayeb, ag laa dilagnu, “Ag am nau, keeke hamu,” ii dooglag dayeb, ag naippa laa guittak ii mattaglag dayeb,

¹⁰ ag laa enug aqadtte ele ee mattaglag dayeb, ag laa ag ɠagattag iitta daaeg, laa ag eheɗ hadatteb ehanadkkulag dayeb amu, Yawe Nug heeb, ag danab nug gatatuppa padal mekkunu oiyeye, laa amahlak mette, ena oitte, ag amubia ena daaglag. Ao, Nug heeb, ag danab nug gatatuppa padal mekkunu oiyeye, laa he, amahlak okkainab, amun bia be, ena oitte, amubia ag ena daaglag.

¹¹ Ag amu hekkulagnu dayeb amu, Yawe Nug ulum matta, atu taɗak gakkaɗak nau eleppa Nug le, ee keeke, ag bau daaglagnu laa ele madakku. Nug ag beɗulag ele ɠagattag madakku. Nug amu heeb, ag dad le elelenab aotte bia daaglag. Ag le qeppuɗia bette, deɗ laa ii qaɗaiedatte amu, ag le amubia daaglag.

¹² Ag tutukku anam oiglag dayeb amu, Yawe Nug heeb, ag buɗulkad ag aab, lag keeke, laa ag anukkanab heeg nauhom, ag amu eɗun bappaidkkulag. Ao, aab, lag keeke, ag men ukku heeg nauhom amu, ag eɗun bappaidkkulag. Ag amu hebeppeg, laa ag ahilagnu, “Danab amu ag gilil he nauhak daatteb babaittak danab,” akkulag. Ao, ag amu hebeppeg, laa ag ahilagnu, “Danab amu ag ib, lag ele babaittak danab,” aon akkulag.

¹³ Amu Yawe Nug atte. “Ag Sabatppa ɗo dahil dim lamidkkulag dayeb, ao, ag dahil deɗ, deɗ amuam dahilnu tituanak daatte, ag deɗ amuppa aɗi keeke ag amu hekkulagnu amelag qette, amge da ag amu hekkulagnu ii ami, ag amu hekkulagnu uuglag dayeb, ag Sabatnu, ‘Deɗ enanagnab, ehanigtte ele,’ dooglag dayeb, ao, ag da, Yawe, ag dahil deɗ, dahilnu tituanak daatte amu, ag deɗ amunu, ‘Deɗ imuam deɗ binag ele,’ dooglag dayeb, ag ahilag dabmak ii dim lamidna, amuppa ag dahil deɗ binag mekkulag dayeb, ao, ag dahil Sabatppa ele aɗi keeke hekkulagnu oolag hette, amge da ag amu hekkulagnu ii ami amu, ag amu ii hekkulag dayeb, ag deɗ amuppa nai hamu hamu ele ii mattiglag dayeb,

¹⁴ ag da, Yawe, ag da ele daagnignu oo gamag ahak dooglag. Ag amu oh hekkulag dayeb amu, da heppi, wan laappan danab ah ag ahilagnu, ‘Ag binalag ele,’ dooglag. Ag amu hekkulag dayeb amu, da heppi, ag mamelag Jakopnu wanppa daanna, wan amuam nug aug amu, ag wan amuppa ee ena, okkai ele aon lanan daaglag,” awa aum. Yawe Nug anam mattiom daatte amunu, am anam bekku.