Aisaia 57 - Nobonob Baibel

Deɗ laala danab ah Yawe dim lamidtteb ele, ag guittak aotteb

¹ Genab tutukku hak danab ag mauhegeg, laa ag amu diignu ii dabmetteb. Ao, laa ag Yawenu oo metta ii uuak kobol dim lamidtteb ele amu, laa ag diia ugekke, danab ah laa ag amu anidna, ag amu diignu doyak tutukku ii aotteb. Kobol amunu diig am, Yawe Nug genab tutukku hak danab amu, ag uug naunab ahilag haenppa bekku, ag uug amu anidmananu Nug ag diia gotte.

² Danab ah ag oolagppa kaliak laa iitta ele oitteb, ag Kayaknu nai dim lamidtteb amu, ag maɗoɗ aotteb. Ag mauhna, ag maɗoɗ tutukku aon niitteb.

³ Yawe Nug atte, “Ag danab ah eheɗ hetteb ele, ag uɗin, dahil nai doyeg! Ag emaɗ hak ah bekkod bia daatteb. Ag danab ag ahilkad ah uuadna ah laa ele oitteb aɗelkad bekkalkad bia daatteb. Ag am ib baag ah ele aɗelkad bekkalkad bia daatteb.

⁴ Ag danab eheɗ hetteb ele, ag ⌊danab Kayak dim lamidtteb⌋ anadna, ag aon aon aqadtteb. Ag ⌊danab Kayak dim lamidtteb⌋ anadna, ag ahilagnu nai nau atteb. Ag danab eheɗ hetteb ele, ag ⌊danab Kayak dim lamidtteb⌋ anadna, ag kalemlem aqadtteb. Ag Yawe waappa daaglagnu uun, nuhig nai tappaeg nette. Ag hambuppuak danab buɗulkad.

⁵ Ag eheɗ hetteb ele amu, ag ahilag kayak hambuppuak noolagppa dup nona binalag mekkulagnu, ag oo hak nau ahilag dim lamidna, ag kayak hambuppuak amu ad ok waalkadppa ag noolagppa dup nona binalag metteb. Ag amu heegeg, ag ib baag ah kayak hambuppuak amu noolagppa dup nona binalag metteb ele, ag ag ele kobol eheɗ hetteb. Ao, ag ad okkai eppelkad bahia ukkak ele oh waalkadppa ag anam hetteb. Ag ele nid ahilkad diin gona, oolnu noakppa, ag appa ahilkad nid manadna, ahilag kayak hambuppuak madatteb. Ao, ag nid ahilkad diin gona, men gukka waappa ag anam hetteb.

⁶ Ag ahilkad kayak hambuppuak dottolkad akkan, men enanag oolnu noakppa daatteb, ag aguppa maatteg daaegeg, kayak hambuppuak amu dim lamadna oitteb. Da ag aulag bia daalom, amge ag uun heeg, kayak hambuppuak dottolkad amu, ag, ge ag, ag am ag aulag daatteb. Ag wain gokkaɗaknu ofa aon gona, kayak hambuppuak madatteb. Ag ee aegnu ofa aon gona manan, ahilkad kayak hambuppuak madatteb. Ag amu hetteb amu da, Yawe, da hamu bia doyeye, bu laa ii madakkul am enate? Iitta!

⁷ Ag qauko attan ikkilkadppa tena, doɗ keeke main, ahilkad kayak hambuppuak mattanna, appa bappaidppigppa ag ib baag ah kayak hambuppuak amu noolagppa dup nona binalag metteb ele, ag ag ele kobol eheɗ hetteb.

⁸ Ag kayak hambuppuak ahilkad dilag at ag laulkad ooppa, od ukku ele ouqena dimugppa meppig. Aɗinu? Ag da uuiɗppig. Ag ah laa nug gamu uuitta ukka, danab laa ele oittep, ag amubia da uuiɗna, ag kayak hambuppuak ahilkad noolagppa dup nona binalag metteb. Ag ah laa, nug danab laala, gamud iitta, nug ag ele niiglagnu oo huana he, amu hekkunu babaitta auta autanab awa, danab digdig ele ag uɗin, nug ele niiglagnu nai qakka, danab amu beɗu miagib daya anadtte, amubia ag ahilkad kayak hambuppuak noobppa dup nona binag metteb.

⁹ Ag danab ah eheɗ hetteb ele, ag kayak hambuppuak onig Molek, ag nuhig neekkakppa ena daaglagnu ag olip goɗen gaɗalag laaidna, leppu muttuɗig enanag ele huanaknab laaidna, ag gona, nug noobppa dup nona binag metteb. Ag kayak hambuppuak laa ele anadna, noolagppa dup nona binalag mekkulagnu ag heeg, nai awa ukkak danab ahilkad ag umanab gona mattiadppig; ag mauhak abenppa batak amu hekkulagnu heppig.

¹⁰ Ag kayak hambuppuak bau anidkkulagnu hik aqeeqe heegeg, bahilag yom, amge ag amu henana, ag, ‘Ig anidkkunignu elele iitta,’ ii appig. Iitta. Ag wagai mena, ɠagattag bau aon, ag tuɗidna, hakib heppig.

¹¹ Amu ag auntai laa eheɗ baɗidppig amunu, ag da dimeɗan, dahilnu daulag atie, ag dahilnu dabmak ele ii aoppig? Ag eheɗ heegeg, haen elabnab uɗie, da bu ag paha ii mattami amunutai, ag bu mettak dahilnu ag ii baɗatteb?

¹² Ag ahilag dabmakppa, ag, ‘Ig genab tutukkuib hettem,’ atteb, amge da heppi, ahilag hak, ahilag dabmak amu ele am miagib daakku. Da anam heppi, ahilag hak amu oh ii ehanadma.

¹³ Ag uug aonna, ag ehanittaknu gaaglag. Ag gaappeg, ahilkad kayak hambuppuak dottolkad ag ahan ehanatteg! Amge iitta! Ag elele iitta. Ulahib am ag iwalatteb, laih gokkulag. Ao, ulah nakokib heeb, ag laih gokkulag. Danab ah eheɗ hetteb, ahilagnu am anam, amge laa nug dahilnu dabmaama, da nuhig padal mak eɗitteb ena dayaknu ehanittak daakkulnu haaha, nug wanppa ena daakku. Ao, nug qauko dahil, qauko amuam dahilnu tituanak daatte, nug amuppa appag diigppa daakku.” Yawe Nug anam awa atte.

Yawe Nug danab ah nuhikkud ehanatteb, padal ii memana

¹⁴ Amu laa Nug ⌊Yawe oɗe awa, inam⌋ akku. “Ag ib babaitteg! Ag ib babaitteg! Ag dahilad danab ah eɗun, ahilag wanppa uɗiglagnu, ag ib oonaknu keeke oh heppeg iitta maɗ!” awa akku.

¹⁵ Aɗinu? Yawe, Nug attannab dayaya, keeke laa ohnab eɗadtte, Nug hanhan daatte, nug onig am oppiaawak ele amu, Nug atte. “Da aben attan, aben oppiaawak ele, da amuppa daattem, amge da danab aun laa, nug nukka nuhignu, ‘Da am danab ena, onil okkai ele,’ ii dabmette, nug nukka nug onig qe nette amu, da danab amu ele daattep. Da danab nug nukka nug onig qe nette amu, da nug ooppa ɠagattag qedakkulnu, da anam hettem. Ao, da danab nug nukka nuhignu, ‘Da am danab ena, onil okkai ele,’ ii dabmette amu, da nug nuhig ouɗippa ɠagattag qedakkulnu, da anam hettem.

¹⁶ Amu da hanhan dahilad danab dilagnu nai ii hepa. Da ahilagnu hanhan oo nauhak ii doopa. Aɗinu? Da hanhan nai helom, da hanhan oo nauhak doolom amu, danab ah dahilad ag gai-iitta daalob. Ao, da hanhan nai helom, da hanhan oppoɗi bak doolom amu, danab ah dahilad ag mauhlob.

¹⁷ Da dahilad danab ag baubau awaknu hik aqeeqe eheɗ heppig amunu, da oppoɗil eheɗ beum. Da amu antten, da oo nauhak doyeye, da bu matten, dimattami. Da amu hemi, amge ag doonna, tuɗidna eheɗ heppig.

¹⁸ Da dahilad danab ah ag attem hena oitteb amu, da antten malami, amge da heppi, ag eɗun, enaib daan oiglag. Da ahilag ulum aɗen, da oo mak ag madakkul.

¹⁹ Da amu heppi, Juda danab ag uug doon gaatteb amu, ag eɗun, ena doon, da onil humaglag. Da heppi, danab ah ag uma daatteb, laa ag guguittak daatteb ele amu, da heppi, ag oh maɗoɗ daaglag. Ge ag maɗoɗnab daan oiglag. Da heppi, ag enaib daan oiglag.” Yawe Nug anam atte.

²⁰ Amu nau hak danab ⌊ag maɗoɗ amubia ele ii daatteb. Iitta.⌋ Ag yu toedakkunu elele iitta, ag amubia daatteb. Ag yu heehe, lekkoh nau, dubuttid ele wanppa bette, ag amubia hetteb.

²¹ “Ge, nau hak danab, ahilagnu amu, maɗoɗ nakok laa ii daatte.” Dahil Kayak, Nug anam atte.