Aisaia 56 - Nobonob Baibel

Kayaknu danab ah amu danab ah huu ohnu ele oohona daaglag

¹ Yawe inam atte. “Danab ah padal memananu ehanittak kobol dahilnu amu, ehanittak amunu haen am miagnab doum daatte; am uma iitta. Ge, dahil genab tutukku hak kobolnu amu, kobol dahil amu miag atiak daakkunu haen miag uɗiom daatte amunu, ag nai doya mala hettoɗia epeɗia elele mettak kobol dim lamitteg! Ao, ag kobol tutukkuib dim lamitteg!

² Danab nug dahil Sabatnu ɗonu am keeke hamu bia ii doyaya, nug ɗo amu ɠagattag aɗa dim lamidtte amu, nug itittak ena awom daatte. Ao, danab nug eheɗ laa ii hette amu, nug itittak ena awom daatte.” Yawe Nug anam atte.

³ Amu wan laihnu danab laa, nug Yawe dim lamittatta, nug Kayak noobppa dup noa, genab binag mette amu, nug, “Yawe Nug da nuhikkud danab oolagppa daakkulnu genab uukku,” aib aum. Amu danab laa, nug hipab qak daatte amu, nug, “Da nid ele daakkulnu elele iitta amunu, Yawe Nug dahilnu oo ii hema,” aib aum.

⁴ Danab anam ag amu ii dabmemananu diig am, Yawe Nug inam atte. “Laa ag hipab qak daatteb, ag Sabatnu ɗo da memi ele dim lamidna, ag kobol laala, da kobol amunu ool hette, ag kobol amu dim lamidna, nug tituana nai qakkak dahil ele dim lamidtteb amu, da ahilagnu inam attem.

⁵ Ag nid ele daalob, nid amu ag daappeg ukkeb, ag buɗulkad, ahilkad nid oolagppan dokkulag amu, ag ahilagnu daulag atikku. Ag anam helob, amge kobol da hekkul amu, ag nid ag anam aolob, am kobol amu eɗidkku. Amuam da onig okkai madappi, danab mettid lag dahilppa uɗat hetteb, dahilad danab ah laa oh ele ag ahilagnu daulag ii atima. Onig da ag madakkul amu, onig amuam hanhan daakku; laa ii tuqa aoma,” awa atte.

⁶ Amu nai imuam Yawe Nug wan laihnu danab ah ag nuhignu oolag mauhtte, ag nuhig maɗi nid daanna, Nug oɗe dim lamidtteb, ag Sabatnu am keeke hamu bia ii doon, amunu ɗo tutukku dim lamidna, ag Kayak he, Nug ag ele nug tituanna nai qagappig, ag nai qakkak amunu nai elele dim lamidna, maha nakok laa ii okkultteb ele amu, Nug ahilagnu atte.

⁷ “Da geha danab ah aben laalappanu diie, qauko dahilnu tituanak daatte, da ag qauko dahil amuppa, ⌊Jerusalem aabppa,⌋ daaglagnu omalatten uɗien heppi, ag dahil unuqittak lag ooppa, ag oo gamag ahak naɗi aoglag. Danab ah amu ⌊ag da oɗel doon dim lamidkkulag,⌋ ag manaknu ofa, mana mettak laala ele meɗaglag amu, da ahilagnu ool enaib dookkul. Aɗinu? Danab ag da laul am wanppan wan ohppanu danab ah dilag unuqiɗak lag daatte dooglag,” awa atte.

⁸ Amu Naɗi Yawe Nug nuhikkud danab ah Israelnu wan laalappan qagmatta, omalatteb, ahilag wanppa uɗiglag ele amu, Nug geha danab ah huu laalappanu ele diia uɗieb, ag laa daaglag, ag amu ele oh daaglag.

Yawe Nug Israel dilag ikki danab bu madakkunu aum

⁹ Atuppan doɗ, atu taɗakppan doɗ ele ag doɗ laala aqan latteb bia, ag Juda dilag kekeɗ ag ahan uɗin, ag Juda dilag okkai heppeg nauheg!

¹⁰ Israel dilag okkai ag danab ameg gaɗuom bia daatteb. Ag doyak iitta. Ag oh am qai baag nauhom bia daatteb. Ag oh am qai gaamɗu qekkunu elele iitta bia daatteb. Ag niinna, tul ele niitteb. Ag niiglagnu oolag mauhtte.

¹¹ Israel dilag okkai ag qai nug ee lakkunuib dabmaama oitte, ag amubia daatteb. Ag keeke aotteb, amge ag gane aonna, ag, “Aakku elele,” ii atteb. Iitta. Ag baubau aoglagnuib hetteb. Ag sipsip gumak danab doyak iitta ele amunu, nug eheɗ hette, ag amubia daatteb. Ag oh ahilag dabmak dim lamidkkulagnu hetteb. Ag oh anen anen en okkai qagmekkulagnu hetteb.

¹² Ag akka akka nug amegppa mattin atteb. “Ahappeg! Ig gota, wain aotu! Ao, ig gota, bia aot lapput ukkeb, oonig didikku. Ig amu hetata oipput, butti am ele deɗ ena, gemu bia daakku, amge gemu bianab ii daama. Iitta! Buttinu oo gamag ahak am gemunu eɗidkku,” aon atteb.