Aisaia 55 - Nobonob Baibel

Yawe Nug danab ah ag le baalag diitte, enug ele aqatte, ag nuhigppa uɗiglagnu atte

¹ Yawe atte. “Oe! Ag aun aɗi, ag le baalag diitte, ag leppa uɗin le laig! Ao, ag aun aɗi oh ag men doɗo iitta ele, ag amunu aib dabmeppig; ee ippa ina daattede, ag uɗin laig! Ge, ag men doɗo iitta ele, ag uɗin, wain, huh ele hamu aon laig!

² Aɗinu ag ee, ag ɠagattagnab ii madatte ele, ag amuppa men doɗo heeg iitta mette? Ao, ag aɗinu ee ag beɗulagib ehanidtte ele, ag amuib daden metteb? Ag daulag human daappeg, da ag ee ag meulkad oh ehanidkkunu elele amu, da ag ee amu adeppa aoglagnu appi doyeg!

³ ⌊O dahilad danab ah,⌋ ag daulag human, da dooiɗna, ag dahilppa uɗieg! Ag bau daaglagnu amu, ag dahilppa doig! Ag anam heppeg, geha da Yawe, da Dawitnu oo mauhaknab doyen dim lamidkkulnu dahil nai ain qakkami amu, da ahilagnu oo mauhaknab amuib dim lamidkkulnu heppi, da ag ele ig nug tituanta nai qagapput, nai qakkak amuam iitta ii mema.

⁴ Antteg! Da hei, Dawit nug huu digdig dilag gumitta danab dayom. Ib amuppa, da dahil ɠagattag danab ah huu ohppanu amu ippunadmi.

⁵ ⌊O dahilad danab ah,⌋ da Yawe, da am ag Israel, ahilag Kayak; ge, da am ag Israel, ahilag Kayak Oppiaawak Ele. Amu diig amunu amu, ag geha danab ah huu ag ii doyadtteb ele onilagppa eppeg, ag gumadna uɗiglag. Ao, ag huu amu ii doyadtteb, huu amu ele ag ii doyadtteb, amge ag ag onilagppa eppeg, ag qaiqaɗ ahilagppa uɗiglag. Aɗinu? Da ag, dahilad danab ah, da ag ɠagattag onig okkai ele mattami.” Yawe Nug anam atte.

⁶ Gemu ag Yawe anidna dim lamidkkulagnu mattiglagnu elele daatteb amunu, ag Nug anidna dim lamidkkulagnu Nug mattieg! Ao, gemu, Yawe Nug ag gukkuattak daatte amunu, ag Nug unuqitteg!

⁷ Nau hak danab nug hak nau nuhig uuaɗ! Ao, eheɗ hak danab nug dabmak dubuttid ele nuhig uuaɗ! Nug eɗua, Kayak waappa daakkunu anam hekku amu, Yawe Nug nuhignu oo gai-iitta doya oo metta ehanidkku. Ao, danab anam hekku, ihinig Kayak Nug nuhig hipunin genab uhuqa medakku amunu, nau hak danab nug eɗua, Kayak waappa daakkunu anam haɗ!

⁸ ⌊Nau hak danab nug oo eɗueb, hipunin hak uua, Kayak waappa daakku am ena.⌋ Aɗinu? Yawe Nug amunu inam atte. “Ag danab ah, ag da ⌊danab ah uhuqa mettak madakkulnu⌋ dabmettem bia ii dabmetteb. Kobol da hettem bia amu, ag ii hetteb.

⁹ Laa amu, hab wan eɗitta, attannab daatte, amubia dahil hak am hak ahilag eɗidtte; dahil dabmak ele ahilag dabmak anam eɗidtte.

¹⁰ Laa amu, nai dahil am gu, sno ele attannu nettep, amubia daatte. Gu, sno ele aa neya, eɗuya bau laa attan paha ii tettep. Iitta. Aa wan leppu mettaeh, wan elele mette, ee keeke ena beeg, danab ah ag ee tumu eppaknu, amu meu lanaknu ele aotteb.

¹¹ Gu, sno ele aa hettep amubia, dahil nai, da nai amu da oɗelppa madittem amu, nai dahil amuam anam aakku hekku. Dahil nai amu dahilppa hamu eɗua ii uɗima. Aɗinu? Da aɗi keeke, dahil nai nug keeke amu hekkununab daatte dabmettem amu, anam aakku heeb bekku. Ao, dahil nai nug aɗi keeke hekkunu da ool daatte amu, amunab aakku heeb bekku.” Yawe Nug anam atte.

¹² Anam amunu, ag diia ukka laih me dayak danab ah, ag Babilon uuna, ag oo gamag ahak okkai doon gokkulag. Ag maɗoɗ ele gokkulag. Ag gonana, ag qauko okkai, qauko nakok ele dilagnu, “Ag ahi ettaegeg gottem,” dooglag. Ag gonana, ag adnu, “Ag oo gamag ahak doon, eppelag tap qeegeg gottem,” dooglag.

¹³ Ahilag wanppa, wan laih laihppa, ad naunau qaun ele beppigppa amu, ad pain, ag aguppa bekkulag. Ao, wan laih laihppa, keeke qaun ele beppigppa amu, ad mirtel, ag aguppa bekkulag. Ag bena, Yawe Nug heumnu at daanna, anamib daaglag. Laa nug heeb iitta ii mema.