Aisaia 54 - Nobonob Baibel

Yawenu danab ah ag Babilon ukkak dimppa kuɗumnab daaglag

¹ Yawe Nug atte. “Ah na oot keldoak, na nid menuaknu laa iitta, na ahi ette! Ao, ah na nid awaknu guittak deɗ laa ii doome ele, na ahi ettan, ootppa gamag ahak doon, na e! Aɗinu? Ah gemu nukkanab daatte, Nug am nid kuɗumnab, ebqak ahilag am ah gamu ele, nid ahilti dilag ebqak eɗittak ele daakku!

² Ag dahilad, ag ahilag peh lagnu aben heppeg, okkai maɗ! Ag peh lagnu lamen tuɗidppeg, elab maɗ! Ag amu hekkulagnu aib uuppig! Ag peh lag qappak daakkunu muɗi heppeg, elab maɗ! Ag pin elab, aguppa ag peh lagnu muɗi taietta qakkak daakkunu ele amu, ag pin amu ɠagattag ele bappalatteg!

³ Aɗinu? Ag appatna, ag aben eleleppa daaglagnu ag laih laih gona daaglag. Ao, ag buɗulkad ag wan laalappan danab ah lamadna, ahilag wan aona, ag ahilkad aab okkai, hele-ettak daaglag amu, ag aab amu aon daan oiglag.

⁴ Ag baula uɗa nak ii doomna amunu, ag aib baɗappig. Ao, danab laa ag baula heppeg, ag laa noolagppa uɗa nak nau guittak ele ii doomna amunu, ag dabmak kuɗum aib aoppig. Aɗinu? Yawe Nug heeb, uɗa nak ag nid, nid ahin bau daan, kobol kobol heppignu dootteb amu, ag uɗa nak amu daulag atikku. Ao, Yawe Nug heeb, ag ah laa, gamu mauhe, daɗek nau dayaya oiye, danab laa nuhignu nai nau appig, amubia laa ag ahilagnu madippig amu, ag nai amu baula dab-ii-memana,” awa atte.

⁵ Aɗinu ag amu hekkulagnu elele daaglag? Laa Nug ag hattom ele, Nug ag gamulag daatte. Nug onig am Yawe Nukka Ɠagattag Oh Ele. Ao, aɗinu ag amu hekkulagnu elele daaglag? Am, Israel dilag Kayak Oppiaawak Ele, Nug ag Juda, ag laa eppelagppa dayaknu qagaiettakppanu eɗua uhuqak ha madatte. Nug wan oh dilag Kayak daatte.

⁶ Amu danab nug wau ⌊eheɗ he,⌋ uuitte, wau nug nukka laih oo uug nau elenab dayeye, gamu nug onigppa e, eɗua do, ewau daattep, amubia Yawe Nug ag Juda, ag onilagppa ekku. Ao, ah makkunnab gamu awa, ⌊eheɗ heum⌋ amunu, gamu uuitte, ah ukke, nukka dayeye, gamu nug onigppa e, eɗua do, ewau daattep, amubia Yawe Nug ag onilagppa ekku. Amu ahilag Kayak Nug atte.

⁷ “Haen tutunab aakkuib da uuatten, laih daami, amge da ool huana matten, ehanatten heppi, ag eɗun dahilppa dokkulag.

⁸ Ag eheɗ heppig amunu, da ool huana haen tutuib nauhe, da dimatten ii ehanadmi, amge da oo mauhaknab kobol dahil alet daatte dim lamittette, da ool matten ehanadkkul.” Yawe, Nug ag laa eppelagppa dayaknu qagaiettakppanu eɗua uhuqak hette ele, Nug anam atte.

⁹ Amu Yawe Nug atte. “Amu dahil dabmakppa, da gemunu keeke am anukka Noa haenppan keeke bia anidttem. Anukka, haen amuppa da dahil nai ɠagattag qetten, da Noa amegppa, ‘Da hei, gu ne, le wan oh tone, wan nauhom amu, da baula leppa anam ii hepa,’ ami amu, amubia da gemu dahil nai ɠagattag qette, ‘Da ag Juda, da baula ahilagnu oo nauhak ii doopa. Da baula bu ii madapa,’ attem.

¹⁰ Aɗinu? Qauko okkai ag uɗalkulagtai; qauko nakok ag daattebppanu ahan gona, laih daaglagtai, amge dahil oo mauhaknab, da ag Juda ahilagnu doottem amu, oo mauhaknab amuam ii iitta mema. Ao, qauko okkai, qauko nakok ele ag anam hekkulagtai, amge da ag Juda, ⌊ag dahil nai dim lamidkkulag dayeb,⌋ da maɗoɗ madakkulnu ag ele nug tituanen nai qakkami amu, da nai amu tuqe ii aopa.” Yawe, Nug ag Juda, ahilagnu oo bodoetta le mak dootte ele, Nug anam atte.

¹¹ Amu Yawe Nug atte. “Aab okkai Jerusalem am danab laa, laa ag guittak medatteb, laa oo mak ii medatte, am amubia daatte. Aab okkai Jerusalem am uub yu qaɗeppa oiyeye, ulah eheɗ uɗia heehe, uub laih ugakka, eɗua laihnu uɗitte, amubia daatte. Jerusalem anam daatte, amge da heppi, laa ag aab okkai amu bappaidkkulag amu, ag aabnu men laa, neekkak enanag onig turkois, amuppa hekkulag. Amu ag aab amu ukku haknu, ag men sapaia, ag amu duqan hekkulag.

¹² Da heppi, ag bannu lag aɗppa daatteb ele, ag amu men enanag onig rubi, ag amuppa hekkulag. Aɗnu od oh am men daden nob okkainab ele, amuppa henana, ag aɗ ele amubia hekkulag,” awa atte.

¹³ Danab ah oh Jerusalem daatteb, Juda laa oh ele amu, Yawe Nug ib tutukku ippuanatteb, ag maɗoɗnab daaglag.

¹⁴ Ag genab tutukku hak kobol dim lamidnana, tutukku, ɠagattag anamib daaglag. Yawe Nug heeb, keeke laa ag baɗaglagnu ii daama amunu, eheɗ hak laa eppelagppanu amu, eheɗ hak amu ahilagppa bekkunu aib dabmeppig. Ao, Yawe Nug heeb, baɗak nau ag gukkuattak ii daama amunu, ag baɗak naunab ahilagppa bekkunu aib dabmeppig!

¹⁵ Amu Yawe Nug atte. “Laa ag ahan, ag Israel ele ban hekkulagnu uɗiglag dayeb amu, ag dahil nai dim lamidna ii hemana. Iitta. Ag akka amu dabmena hekkulag, amu laa ag anam hekkulag dayeb amu, ag Israel, ag eɗadppeg, kekeɗ amu ag ag waalagppa daaglag.

¹⁶ Antteg! Danab nug aab ila, gakkaɗaknab eokkunu iwalala, bannu keeke aab amuppa bappaidtte amu, da Yawe, da danab amu hemi. Da ele daup ag keeke laa hetteb ele, ag keeke amu aon gona, ban henana, danab aqadtteb amu, da daup amu ele hattami.

¹⁷ Da amu oh hettem amunu, da ele heppi, daup ag bannu keeke aɗinab aɗan, ag Israel ele ban hekkulagnu amu, kekeɗ amu ag ag Israel ii eɗadmana. Amu danab ah ag Israel, ahilagnu aɗi hambuppuak nai eheɗ akkulag amu, ag Israel, ag nai amu tabappeg nekku. Ag danab ah, ag da, Yawe, ag dahilad maɗi nid maɗi ah ele daatteb amu, dahil ehanittak amuam ag aulag bia daakkunu madattem. Ao, ag da, Yawe, ag dahilad maɗi nid maɗi ah ele daatteb amu, ehanittak da ag madattem amu, amuppa da hei, tutukku hak ahilag aakku miag atitte.” Yawe Nug anam atte.