Aisaia 52 - Nobonob Baibel

Yawe Nug Juda danab ah ehanatteb, padal ii memana

¹ Ag Juda danab ah, ag aheg! Ag danab nug niiom aha, bala mette, ag amubia ahan, ɠagattag, lamen bia takkan dayeg! Ao, ag Juda danab ah, ag Yawenu tituanak daatteb amu, ag ahan, ag ah nug aha, lamen enanagnab tagatte bia bala ahilag enanagnab Kayak eppegppanu takkeg! Aɗinu? Danab nau, danab Kayaknu neekkakppa ag oolagppa dubuttid tak ele, ag uɗin, baula eheɗ ii hattamna.

² Ag Juda danab ah, ag gappudppan aheg! Ag ahan, ag abenlagppanab dayeg! Ao, ag Juda danab ah, laa ag aɗalatte, ag nug eppegppa daatteb ele amu, ag sen ag baalagppa qakkak daatte uhuqna, qakkak iitta oiyeg!

³ Aɗinu ag anam hekkulag? Yawe Nug amunu inam atte. “Kekeɗ ag uɗin, ag Juda danab ah hamu diin goppig. Ag men doɗo ii meɗappig. Gemu amu da ele men doɗo kekeɗ amu ii matten, da ag Juda ag kekeɗ eppelagppa dayaknu qagaiettakppanu eɗua uhuqak dayaknu hekkul,” awa atte.

⁴ ⌊Ge, Yawe Nug danab ah nuhikkud laa eppelagppa dayaknu qagaiettakppanu uhuqadkku.⌋ Aɗinu? ⌊Keeke amunu amu,⌋ Naɗi Yawe Nug inam atte. “Anukkanab dahilad danab ah ag Isip wanppa daaglagnu gona daaegeg, Isip ag eheɗ hadappig. Amu dimppa amu, Asiria danab ag ahan heeg, ag ag waalagppa uug nau doon daappig.

⁵ Ag anam daaeg uɗie, gemu attemnab iikku beum daatte? Aɗi beum daatte amunu, wan laappan daup ag ele uɗin, ag dahilad danab ah hamu diin goppig? Ag diin gona heeg, dahilad danab ah ag gumak ahilag waappa daaeg, danab amu ag dahilad danab ah aon aon aqatteg, danab ah kuɗum ag deɗ oh amun tuqan ele dahilnu dabittak nai maditteb.

⁶ Anam amunu da heppi, danab ah dahilad ag ⌊oolag eɗueb, ag da dim lamiɗna,⌋ da onil doon, ⌊ɠagattag daappeg, wanppan danab oh ag amu anidkkulag⌋. Ao, anam amunu da heppi, danab ah dahilad ag ⌊oolag eɗueb, ag da dim lamiɗna,⌋ ag daib, ‘Da iikku daattem,’ attem doon, ag ⌊ɠagattag daappeg, wanppan danab oh ag amu anidkkulag⌋,” awa atte. Yawe Nug anam awa atte.

⁷ Danab laa nug qauko letata uɗia, danab ah amelagppa nai ena maditte, danab ah laa oh dilag neekkakppa amu, danab amu nug enanag hette anidtteb. Ge! Danab nug uɗia, nug nai ena, maɗoɗnu nai, ehanitteb padal ii maknu nai ele mattiaya, nug Juda danab ah amelagppa, “Ahilag Kayak Nug laa oh eɗatta, keeke oh gumatte,” atte amu, danab ah ag ahilag neekkak nuhignu am enaib anidtteb.

⁸ Ag Juda danab ah, ag daulag human doyeg! Ahilag aɗi uɗitte anittak danab ag ⌊laa nai ena awa uɗieb anidna, nuhig nai doon,⌋ ag Yawe Nug eɗua, Sion daakkunu uɗieb, ag amelagppanab anidkkulagnu dooglag. Anam amunu, ahilag aɗi uɗitte anittak danab ag gamag ahak doon, huan ekkulag. Ao, ag gamalag aheb, ag ekkulag.

⁹ O Juda danab ah, ag aab nauhak daatte bia daatteb amu, Yawe Nug oo mak ag madakku. Ao, Yawe Nug ag laa eppelagppa dayaknu qagaiettakppanu eɗua uhuqak ha madakku. Anam amunu, ag laippun ahan, gamag ahaknu ele ahi ettalatteg!

¹⁰ Yawe Oppiaawak Ele Nug nuhig ɠagattag danab ah oh anidkkulagnu heeb, miag atieb daakku. Nug anam heeb amu, danab ah wan atu ohppa daatteb ele, ag ehanitte, padal ii mak Kayak eppegppanu uɗitte anidkkulag.

¹¹ ⌊Haen amuppa amu, Juda danab ah, ag nai imu dooglag.⌋ Ag ahan, ⌊Babilon⌋ uun ukkeg! Ge, ag ahan, ⌊Babilonnu⌋ ukkeg! Ag ahan gonana, ag keeke Kayaknu neekkakppa dubuttid ele aib aɗappig! Ao, ag laa, ag Yawenu tappiɗ keeke, ag keeke amu maon oitteb ele amu, ag ahan, Babilon uun, ag oppiak ele dayeg!

¹² Aɗinu ⌊ag anam hekkulagnu elele daaglag⌋? Yawe Nug ag noolag awa, anuqa gokku. Ao, Israel dilag Kayak, Nug ag dimulagppa oiyaya uɗikku. Anam amunu, ag laa dilag baɗan, oolna ii gomana. Ao, ag oolna ii gomana.

Yawenu maɗi nid nug guittak digdig maokku

¹³ Yawe Nug atte. “Antteg! Dahil maɗi nid nug doyak dabmak okkai ele dim lamitta, nuhig hak hekku. Nug onig okkai, binag okkai ele aokku.

¹⁴ Laa ag heppeg, nug beɗu nauha auttanab aokku. Ag anam heppeg, danab ah laa ele ag nug beɗu am danab beɗu bia ii anidmana. Ao, nug beɗunu anttak am keeke laa bia daakku. Nuhigppa anam bekku amunu, laa kuɗum ag nuhignu, am dabmak huanaknab aoglag.

¹⁵ Ag dabmak huanaknab aoglag, amubia danab ah wan atu kuɗumnu ag ottaikkulag. Anam amu king ag nuhignu oɗelag qamutna, dabmak kuɗum aoglag. Aɗinu? Keeke ag nuhignu ii dooppig amu, ag anidkkulag. Ge, laa ag nuhignu keeke laalanu a ii dooppig ele amu, ag amu doon, ag amu diignu doyak tutukku aɗaglag.” Yawe Nug anam atte.