Aisaia 51 - Nobonob Baibel

Yawe Nug heeb, Juda ag oo mak aoglag

¹ Yawe Nug atte. “Ag laa, ag genab tutukku hak kobol dim lamidna oiglagnu hetteb, ag da, Yawe, ag da aniɗna dim lamiɗkkulagnu mattiɗtteb ele amu, ag dahil nai doyeg! Men naunau kuɗum men okkai laippuppanu netteb, amubia ag alalti Abraham, Sarah ele aa am ahilag men okkai bia daaeheh, ag ahilahppanu uɗippig daatteb. Anam amunu, ag men laa, ag amuppanu neppig oitteb ele, ag men amu eɗun neekkitteg! Ao, ag men kuɗum awak aben, ag amuppanu uɗippig oitteb ele, ag amu eɗun neegna antteg!

² Ag ag mamelag Abraham neegna antteg! Ag Sarah, nug ag alalag ah tatamnu, nuhigppanu ag doppig amu, ag neegna nug atteg! Aɗinu? Da Abraham onigppa emi, haen amuppa amu nug nukka laippu dayom, amge da nug ititten hei, nug buɗub kuɗum beppig,” awa atte.

³ ⌊Yawe Nug Abrahamnu anam heum⌋ amunu, genab Nug heeb, danab ag Sion eɗun bappaidppeg, ag Juda ag oolag mekku. Yo, Nug Sion nauhom antta heeb, danab ag Sion bappaidkkulag. Nug heeb, Juda wanppa aben laala atu taɗak beppig daatteb amu, aben amuam Iden dayom bia daaglag. Ao, Nug heeb, Juda wanppa aben wan meu waknu nakokib elele amu, ag am Yawenu dad bia daaglag. Danab ah ag Sion appa, Juda wanppa ele daaglag amu, ag oolag gamag ahebeb, ag, Yawe amegppa, “Ena hen mekkame,” doon anan, ahi ettaglag.

⁴ Amu Yawe Nug atte. “Ag danab ah dahilad amu, ag dahil nai doyeg! Ge, ag huu dahil amu, ag daulag human, dahil nai doyeg! Aɗinu? Da heppi, danab ah ag ɗo dahil dooglag. Ao, da heppi, dahil nai doya mala hettoɗia epeɗia elele mettak kobol am danab ah oh dilag amahlak daakku.

⁵ Da dahil genab tutukku hak kobol dim lamitten ehanadkkulnu haen am miagib daatte. Ao, da danab ah ehanadppi padal ii memananu haen am miag uɗiom daatte. Da dahil ɠagattagppa heppi, danab ag lailkad ele ag nai doya mala hettoɗia epeɗia elele mettak kobol dim lamidna oiglag. Danab ah ag wan miagnu, wan umanu ele, ag dahil ɠagattag, ag amuppa ehanittak aoglagnu dabmak aɗan daan, amel metteb.

⁶ Ag danab ah ag amelag human, hab anidna, ag honap wan ele antteg! Aɗinu? Qinob dimppa hab nug aab kah iitta mette bia iitta mekku. Ao, wan ele am alag ma, iitta mekku. Ge, danab ah wanppa daatteb amu, ag qabuttid mauhtteb bia mauhkkulag. Keeke oh anam iitta mekku, amge dahil danab ehanatte, padal ii metteb kobol amu, kobol amuam hanhan daakku. Ao, genab tutukku hak kobol dahil am iitta ii mema.

⁷ Ag danab ah dahilad, ag kobol tutukku dootteb, ag dahil ɗo ag oolagppa daatte amu, ag dahil nai doyeg! Ag danab dilag nai haknu aib baɗappig. Ao, ag awa awa qettak nai naunab ahilagnu atteb amu, ag amunu baɗak eheɗ nau aib dooppig.

⁸ Aɗinu? Danab ag ahilagnu nai hetteb, ag aon aon aqadtteb ele, ag dittuɗ lamen he nauhak daatte, danab amu ag nauhak amubia nauhkkulag. Ao, dittuɗ nug wul he nauhak daatte, nauhak amubia ag nauhkkulag. Ag anam nauhkkulag, amge dahil genab tutukku hak kobol am hanhan daakku. Ao, dahil danab ehanatte, ag padal ii metteb kobol amu, kobol amuam iitta ii mema, hanhan daakku.” Yawe Nug anam atte.

⁹ O Yawe, na ahan, nahip ɠagattag amuppa ehanigkkutnu oɗ medattem! Na anukka, haen laappa ehanigme, amubia ehanigkkutnu oɗ medattem! Na Rahap iite eɗidna, tuqae neum? Yo, na doɗ okkai nau ele amu iite qeme?

¹⁰ Na hee ⌊ib daakkunu⌋, yu okkai, umanab noa ukkak ele, yu ⌊aben amuppa⌋ iite qaɗaiettom. Na amu hena, na danab ah nahipad ag qagaiettakppanu eɗua uhuqak hena mattame ele, na ag laih gokkulagnu na ib laa, yu amu gamagppa iite bappaidme?

¹¹ Anam amu, danab ah Yawe Nug ehanatte, ag qagaiettakppa ii daatteb ele, ag eɗun uɗiglag. Ag eɗun uɗin, gamag ahak, amu maɗoɗppan gamag ahak ele Sion tena, hanhan oo gamag ahak amu doon daaglag. Oo gamag ahak amu ahilagppa ambak dayebeb, uugnu oo doyak, oo uug mettak ele amu, ahilagppa nakok laa iinab daama.

¹² Amu Yawe Nug atte. “Da, ge da, da oo mak madattem. Danab am keeke gai-iitta, oh mauhtteb amunu, aɗinu ag danabnu baɗadtteb? Ao, aɗinu ag danab bekkalkad, ag gikkiɗah bia paha nauhtteb ele amu, aɗinu ag ag baɗadtteb?

¹³ Aɗinu ag anam baɗadna, ag da Yawe, da ag hattami amu, ag dahilnu daulag atitte? Da hab hein, da wan ele hemi. Aɗinu ag danab ag ahilagnu oppoɗi bak nau doon, ag ag waalagppa daaglagnu wagai mena, ag hadappeg nauhkkulagnu dabmetteb ele amu, aɗinu ag amu dilag hanhan deɗ oh eheɗ nau baɗan oitteb? Ag anam baɗan oitteb, amge amu dilagnu ag gemu adeppa daatteb?

¹⁴ Da heppi, danab ag uug nau ele maniguittakppa daatteb amu, ag uhuqak paha aoglag. Ag maniguittak nau gatatu ele, ag amuppa ii mauhmana, eenu ele tutu ii memana.

¹⁵ Da am Yawe, da am ahilag Kayak. Da hei, yu eheɗnab koɗkoɗ qette,” awa atte. ⌊Laa anam maditte amu,⌋ Nug onig am Yawe Nukka Ɠagattag Oh Ele.

¹⁶ ⌊Amu Yawe Nug ele atte.⌋ “Da dahil nai ag oɗelagppa mekkul. Da ag atognoadkkulnu, da eppelppa ag tonadkkul. Da, da hab hein, wan ele hemi, amu gemu da ag Juda danab ah, da ag amelagppa attem. ‘Ag am danab ah dahilaɗ.’ ” Yawe Nug anam atte.

Juda dabmekkulagnu nai

¹⁷ Juda danab ah, ag ahan dayeg! Ag aheg! Ag eheɗ heeg, Yawe oppoɗi be, bu mattom. Amu ahilag bu Nug eppegppanu amu, bu amuam wain nau kap-ppa daatte, amubia daye, ag wain amu aakku lana malappig. Ao, wain nau amu, wain amuam danab he nauhtte ele amu, ag amu ohnab lana malappig.

¹⁸ Gadon, ag bekkalkad oolagppan laa nug ag ulum madakkunu ii daatte. Ao, nid danab ag ehanatteg, ena meppig ele amu, ag oolagppan laa nug ag eppelag aɗa, ehanadkkunu ii daatte.

¹⁹ Uug naunab laippuib ahilagppa ii beum. Iitta! Aɗit bepiɗ amunu, aun nug oo mak madakkunu elele? Uug naunab aɗit ahilagppa bepiɗ laa am, kekeɗ ag uɗin, hatteg nauhppig. Laa am, enug haen nau na he, ag nauhppig amunu, aun nug ehanatteb, ag oolag mekkunu laa iitta.

²⁰ Ahilkad nid danab ag gai-iitta daatteb. Ag ib oɗatleppa doɗ pelemppa teum daatte bia niitteb. Yawe Nug oppoɗi bak doyeye, ag eheɗ aotteb. Ao, ag Israel, ahilag Kayaknu oppoɗi bak ahilkad nid dilagppa ambak daatte.

²¹ Anam amunu, ag Juda danab ah, ag danab wain la ukke, kaaka qe, eheɗ kuɗum aotte, ag amubia daatteb, amge ahilag eheɗ awak am le ɠagattag lanakppan iitta. Iitta. Ag hipunin heeg, Yawe Nug bu mattom amunu, ag Juda danab ah, ag nai imu doyeg!

²² Naɗi Yawe, ahilag Kayak, Nug hettoɗiakppa ahilag ehanittak daatte amu, Nug atte. “Antteg! Da kap laa, wain kap amuppa daatte, wain amu he, danab nauhtte ele amu, da kap amu ag eppelagppanu eɗue aomi. Ag eheɗ heeg, da oppoɗil be, bu mattami, amu bu mattak amuam wain nau kap-ppa daatte bia, amge ag baula wain amu ii lamana. Am malak.

²³ Da kap wain nau ele, amuam ag Israel, ahilag bu mattak ippunigtte amu, da kap amu ahilag kekeɗ eppelagppa memi. Kekeɗ amu ag guittak nau madappig. Ag ag amelagppa, ‘Ig ag beɗulag qaɗeppa ib mattata oignignu amu, ag wanppa niieg!’ appig. Ag heeg, ag Juda ag wanppa niin, gomelag matteg, wan bia dayeye, ag aguppa tappan goppig. Ao, ag heeg, ag Juda ag wanppa niin, ag beɗulag mattaeg ib bia dayeye, ag aguppa oippig,” awa atte.