Aisaia 50 - Nobonob Baibel

Israel, Yawenu danab ah, ag hipunin heppig amunu, ag bu aoppig

¹ Yawe Nug atte. “Danab laa nug wau nuhigppa eheɗ heum doya he, aha gotte amu, da amubia hemi amunu, ag gona, wan laappa maɗi nid daattebte? Iitta! O iitta, danab laa nug laa eppegppanu lon awa, eɗua medakkunu elele iitta amunu, lon mameg nug danab lon awom wau, bekkod ele laanu maɗi nid daaglagnu me, daden mette ele amu, da anam bia hemi amunu, laa ag Juda, ag ag diiadna goppigte? Iitta! Amu ohnu am iittanab iitta! Ag hipunin heppig amunu, ag laa eppegppa daatteb. Ag hipunin heppig amunu, ag gona, diia ukka laih me dayak danab ah wan laappa daatteb.

² Da uɗien, ag onilagppa emi, amge ag oolagppan laa nug nai dahil ii awom. Ao, da ag onilagppa emi, amge laa nug nob laa ii meɗom. Dahil ɠagattag tutu meum amunu, da ag qagaiettakppanu ehanittak okkaippa uhuqadkkulnu elele iittate? Iitta! Ge, da ɠagattag iitta amunu da ag ehanadppi, ag qagaiettakppa ii daamnanu elele iittate? Iitta. Dahil ɠagattag am elele. Ao, da oɗelppaib nai matti, yu qaɗaiedatte. Da hei, le gottomppa am atu taɗak daatte. Yo, da anam hei, kakai ag mauheg, beɗulag beɗatteb.

³ Da hei, hab hinqak daatte. Ao, da hei, hab lamen teppu eleppa tonak bia daatte ⌊amunu, da ag ehanadkkulnu elele⌋.” Yawe Nug anam atte.

Israel ag hipunin heppig, amge Yawenu maɗi nid Nug enaib heum

⁴ Naɗi Yawe Nug da oɗel ehanitte, da nai ena madikkulnu elele amunu, da nai enappa danab ah ag uug nau doon oitteb ele, da ag ehanadkkulnu elele daattem. Deɗ oh buttua Nug maɗeɗile, da ahattem. Nug da maɗeɗile ahai, Nug he, da daul hume, Nug aɗi atte amu, da dim lamidkkulnu dabmein aute awe daattem.

⁵ Naɗi Yawe Nug da daul matule, da nai nuhig dookkulnu elele daattem. Da daul matule, da Nug waappa daakkulnu ii uuen, nuhig nai laa ii tappai neum. Yo, da nuhig nai ii dimettami.

⁶ Haen danab ag da gomel mataɗppig amu, da gomel ag mattami. Yo, ag da akkaɗil hiɗaegeg, da ag iɗul mattami. Ge, ag da eheɗ aon aon iunna, hunu iuppig amu, da iɗul ii lokkummi.

⁷ ⌊Amge⌋ Naɗi Yawe Nug ehaniɗtte amunu, ⌊gog tak haenppa⌋ auntai laa dahilnu nai eheɗ laa aabob, da uɗa nak nau guittak ele ii doopa. Ge, Naɗi Yawe Nug ehaniɗeb, da uɗa nak nau guittak ele ii doopa amunu, da nuhig nai dim lamidkkulnu dabmak ɠagattagnab awe daattem; amu diig amunu ⌊gog tak haenppa⌋ da uɗa nak laa ii aopanu doottem.

⁸ Yawe, Nug da eheɗ laa ii hemi danab ah oh ippunadtte amu, Nug da gukkuiɗa daatte amunu, laa nug da eheɗ hemi dahilnu akkunu elelete? Laa nug anam dahilnu anam akku dayeb amu, i hettoɗiakppa goɗa, bappaidɗu! Ao, nug nai amuppa da yaaiɗkku dayeb amu, i hettoɗiakppa elele mettagnih.

⁹ Naɗi Yawe Nug hettoɗiakppa nai ena dahilnu atte amunu, aun laa nai nauppa da yaaiɗkku? Laa ag anam hekkulagnu hekkulag dayeb amu, ag am lamen alag ma ukka nauhtte bia hekkulag. Ao, ag am lamen alag laa dittuɗ lappig, amubia daaglag.

¹⁰ Danab ah oh oolagppanu aun nug Yawenu ebehi oh bodoetta le mette, nug nuhig maɗi nidnu nai dim lamidtte ele amu, danab amu nug deɗ laa gatatuppa oiyaya, nug amahlak laa ii anidtte dayeb amu, nug Yawenu ooppa genab doyaɗ! Nug Kayakib dim lamittaɗ; laa aib dim lamittom!

¹¹ Amge ag laa ag akka ag aab ilatteb, ag amahlak amuppa ahan oiyeg! Ao, ag laa ag akka ag hul amot-tteb ele amu, ag amunu amahlakppa oiyeg! Amge ag amu hebeppeg, ⌊Yawenu nai imu ahilagnu am anamib bekku. Nug atte.⌋ “Ag da eppelppa inam aoglag. Ag uug naunab, danab oɗe naɗinab awa, qaɗaqaɗppa niitte, ag uug amubia aoglag,” awa atte.