Aisaia 5 - Nobonob Baibel

Muɗi grep dadnu ahi

¹ Gemu da ahi laa mapitten edakkulnu hettem. Ahi imuam da layal, nuhig muɗi grep dadnu ele dilah kaya. Qauko nakok laappa wan laih ittag ele amuppa amu, da layal nug muɗi grep dad nuhig heum.

² Nug wan buue be, men oh akke ukke, muɗi grep eppeg enaib epeɗia eppom. Dad amu gamagppa nug neekkeb ukkeb, aɗi uɗitte anttaknu lag attan ta ukkak menppa hak laa heum. Amu nug dad ooppa nug grep meu tappa leppu awaknu aben laa heum. Nug keeke amu oh ha malowa, nug “Muɗi grep dahil imu geha meulag ena, ubuhi ele daaglag,” dabmeum. Nug anam dabmeum, amge anam iitta. Muɗi grep amu meu ena ii oppig, meulag doɗo naunau oppig; lanaknu am mua ele, ena iitta.

³ ⌊Anam dayom amunu, da layal nug inam aum.⌋ “Ag danab ah Jerusalem daatteb, ag Juda danab ag Juda wanppa laih laih daatteb ele amu, ag appeg da doyei! Uug imu beum amu, aun nug eheɗ heum amunu uug amu beum? Date eheɗ hemi, o iitta dahil grep dad nug nukka eheɗ heumtai? Ag epeɗieg!

⁴ Amu muɗi grep nug geha ba, meu ena okkunu da uɗat ena hemi, amge aɗinu muɗi grep ag meulag, meu doɗo naunau ona, lanaknu ena iitta, mua ele oppig? Am keeke laa haknu dayomtai, da keeke amu iite hemi?

⁵ ⌊Iitta! Da amu oh elele hemi⌋ amunu, gemu da muɗi grep dad dahilppa keeke laa hekkulnu dabmemi amu, da ag amelagppa akkul. Gemu da dadnu aɗ keeke qaun ele eppak amu oadppi ukkeb, muɗi grep dad dahil am, doɗ ag wana, ee lanan daaglagnu aben daakku. Ao, da dadnu men aɗ aoɗppi neeb, doɗ ag dad ooppa nona, tappanna, ⌊ee lanan daaglag⌋,” awa aum.

⁶ Dad mameg nug anam anana amu, nug tuɗitta aum. “Geha da wan amu heppi, wan meu waknu nakokib elele bia dayebeb, appa danab nug muɗi grep babaittak uɗat, wan buuak uɗat laa ele ii hema. Uud keeke qaun ele bena dad tonappeg, da geha gu ele dad amuppa nemanu, da ɗo mekkul,” awa aum.

⁷ Aɗinu? Israel buɗub ag am Yawe Nukka Ɠagattag Oh Ele, ag nuhig muɗi grep dad bia. Ao, Juda buɗub ag am muɗi grep, Yawe eppa, muɗi grep amunu enanagnab doyom bia. ⌊Yawe Nug ag ena atognoattatta,⌋ Nug danab ah amu ag nai doya mala hettoɗia epeɗia elele mettak kobol dim lamidkkulagnu dabmeum, amge iitta! Ag danab aqaeg mauhtteb! Ao, Nug ag anen anen, ag genab tutukku hak kobol danab ah laa dilagppa hekkulagnu dabmeum, amge iitta! Ag danab ah laa dilagppa kobol nau heegeg, danab ah ag uug nau doon gaatteb!

Kobol nau danab ah ag hetteb

⁸ O gadonnab gadon, ag danab ag lag kuɗum, wan kuɗum ele aonna, ahilagnu qagmetteb. Ag anam hetteb, amu geha ag wan oh aoppeg, danab laa ag daaglagnu aben laa ii daama. Ag akka, ⌊Kayak anamnu ii aum bia,⌋ agib appa daaglag.

⁹ Am Yawe Nukka Ɠagattag Oh Ele, Nug nuhig nai ɠagattag qetta, da amelppa inam aum. “Genabnab genab, gemu lag kuɗum daatteb, geha danab ag lag amuppa laa ii daamna; hele-ettak daaglag. Ao, gemu lag okkai okkai ena ena daatteb, amuppa danab ii daamna. Iitta!

¹⁰ Haen amuppa muɗi grepnu dad okkai am geha grep meulkad huanak, kuɗum ii oma amunu, geha wain nakokib aoglag. Ag ee aeg battam 10 eppaglag, am geha ee aeg meu ob, ag battam laippu inaglag,” awa aum.

¹¹ Amu danab ag le ɠagattag digdig lakkulagnu guittak doon, lakkulagnu buttuanab ahatteb amu, ahilagnu gadonnab gadon. Ge, laa ag tueb ukke tugmag mette ele, ag wain lanan, kaaka eheɗ aqadtte amu, ahilagnu gadonnab gadon.

¹² Ag hobul hena, hobulppa wain lanana, ag harp, laia, tambarin, amu dumuttum eleppa musik digdignu hetteb. ⌊Ag keeke amu hekkulagnu doon autna aotteb⌋, amge ag Yawe Nug aɗi keeke hette amu, ag amunu dab-ii-metteb. Ao, ag Yawe Nug eppegppa aɗi aɗi hette amu, ag amu iinab anidna dabmetteb.

¹³ Anam amunu, genabnab genab geha kekeɗ ag uɗin, ag dahilad danab ah, ag Yawe ɗonu, nuhig kobolnu ele doyak pehettak iitta amu, diig amunu kekeɗ ag ag diin, uma goppeg, ag diia ukka laih me dayak danab ah, wan laappa anam daaglag. Danab okkai okkai enugnu mauhkkulag. Danab ah laa ag le ele iitta daappeg, ag lemaɗulag qaɗaiedakku.

¹⁴ Diig amunu amu, mauhaknu aben nug oɗe aaheum daatte. Ge, mauhaknu aben nug nuhig oɗe okkainab, huanak aaha daatte. ⌊Mauhaknu aben anam daatte⌋, amu Jerusalemnu danab okkai aɗi, amu Juda danab ah laa kuɗumnab ele, ag mauhak abenppa nokkulag. Ao, Juda danab ah ag gemu gamalag ahehe, hobul henana, muttub qetteb ele amu, ag am geha mauhak abenppa nokkulag.

¹⁵ ⌊Haen amuppa amu, Yawe Nug heeb,⌋ wanppan danab ah, ag gomelkkulag. Ao, ag onilag qe nak ele oiglag. Amu beɗuppa tak danab ah ag beɗuppa tak danab dilag neekkak bia ii neegmana. Iitta. Ag onilag qe nak ele oiglag.

¹⁶ ⌊Ag anam aakku daaglag⌋, amge Yawe Nukka Ɠagattag Oh Ele, Nug geha nai doya mala hettoɗia epeɗia elele mettak kobol nuhigppanu binag okkai aokku. Ao, Kayak Oppiaawak Ele, Nug genab tutukku hak kobolib dim lamidtte, Nug kobol amuppa heeb, danab ah ag nuhig oppiaawak dayak anidkkulag.

¹⁷ Nug anam heeb, sipsip, meeme ele ag ⌊Israel danab daappigppa⌋, ag appa ag abenlagppanab bia daanna, ag gikkiɗah lakkulag. Ao, laihnu uɗiak danab ag, ag enub danab laulkad nauhppig ele, amuppa ee lanan daaglag.

¹⁸ Danab ah aun aɗi ag hipunin hekkulagnu ib digdig maditteb ele, ahilagnu am gadonnab gadon! Ao, danab ah aun aɗi ag nau hekkulagnu wagai men oitteb amu, ahilagnu am gadonnab! ⌊Ag padal mekkulag.⌋

¹⁹ Laa ag, “Ig nuhig uɗat anidkkunignu Israel dilag Kayak Nug keeke laa ihinignu dabmette ele amu, keeke amu Nug paha haɗ!” atteb amu, ahilagnu am gadonnab gadon. Ao, laa ag, “Ig amu doognignu, Israel dilag Kayak Oppiaawak Ele Nug aɗi keeke hekkunu maittak awom amu, Nug amu heeb baɗ!” aon atteb amu, ahilagnu am gadonnab gadon. ⌊Ag padal mekkulag.⌋

²⁰ Danab ah aun aɗi, ag nau hak kobolnu, “Am kobol ena,” atteb, ag kobol enanu, “Amuam nau hak kobol,” aon atteb, ag gatatunu, “amahlak,” atteb, amahlaknu amu ag, “gatatu,” atteb, ag keeke oɗenig mua qette ele amu, ag amunu, “Ubuhi ena ele,” atteb, keeke ubuhi ena ele amu, ag amunu, “Am mua ele,” atteb, ahilagnu amu gadonnab gadon. ⌊Ag padal mekkulag.⌋

²¹ Danab ah aun aɗi ag inam anana, “Ig amu, ig doyak dabmak ena ele,” atteb, ahilagnu am gadonnab gadon. Ao, aun aɗi ag inam anana, “Ihinig dabmak ignab ehanigkkunu elele,” dabmetteb amu, ahilagnu am gadonnab gadon. ⌊Ag padal mekkulag.⌋

²² Danab ah aun aɗi, ag danab wain lanaknu onilag ele, ahilagnu gadonnab gadon! Ao, danab ah aun aɗi ag le ɠagattag digdig kabolina, huana latteb ele amu, ahilagnu gadonnab gadon! ⌊Ag padal mekkulag.⌋

²³ Amu hettoɗiak dilag okkai danab ag danab eheɗ heppig ele eppelagppanu lokkumakppa eheɗ haknu ehanittak laa ag aon heeg, laa eheɗ heppig ag hamu gotteb ele, ahilagnu am gadonnab gadon. Ao, hettoɗiak dilag okkai danab ag laa eheɗ heppig amu, ag ii epeɗina heeg, hamu gotteb, amge danab ag eheɗ ii heppig ele, ag nob madatteb, hettoɗiak dilag okkai amu, ahilagnu gadonnab! ⌊Ag padal mekkulag.⌋

²⁴ ⌊Ag anam hetteb⌋ amunu, wit keeke gumu qaɗaiettak ewa iitta mette, amubia ag nauhkkulag. Ao, gikkiɗah qaɗaiettak aab aɗuppa ewa malatte amu, amubia ag nauhkkulag. Amu ad diɗilag beɗaeg, ad bunaɗtte; bala, ⌊uɗulag ele⌋ na qa iitta mette bia amu, ag anam nauhkkulag. Aɗinu? Ag am Yawe Nukka Ɠagattag Oh Ele, ag nuhig ɗo doyaknu uuppig oitteb. Ao, ag Israel dilag Kayak Oppiaawak Ele, ag nuhig nai dimedappig oitteb.

²⁵ Diig amunu amu, Yawe Nug nuhikkud danab ah dilagnu oo nauhak naɗi dootte. Ge! Nug eppeg humom dayeye, Nug makkuɗadtte. Nug eppeg e, qauko oh uɗaltteb. Nug eppeg e, kuɗum mauheg, ag gaɗalkad aab okkainu ibppa kinipan bia niitteb. Anam, amge amuppa Nug nuhig oo nauhak amu iinab bodoettom. Iitta. Nug ⌊bu tuɗitta madakkunu⌋ eppeg humom daatte.

²⁶ Amu Yawe Nug geha wanppanu wan laala umanu ⌊ban danab⌋ ag uɗin, ⌊nuhikkud danab ah eheɗ hattaglagnu⌋ Nug at laa qappeb daakku. Ao, Nug wanppanu wan laala umanabnu dilag ⌊ban danab⌋ ag uɗin, ⌊nuhikkud danab ah eheɗ hattaglagnu⌋ hiwalakppa ag onilagppa ekku. Nug anam heeb, geha ⌊ban danab⌋ ag qaiqaɗ paha uɗiglag.

²⁷ Ban danab ameg amu ag oh ag danab ɠagattag. Oolagppanu laippu laa nug baeg dagteeb ii na qema. Laa ameg ii nema, laa ele ii niima. Ag matagiɗ imualagppa pehettan tagappeg, laa iinab uhuqma; ag baeg gaɗa baelagppa maadkkulag amu, baeg gaɗa amunu muɗi laa pakkuak iinab daama.

²⁸ Ahilag lat aeg am aeg hawaɗnab, ahilag lat am omanak daaglag. Ahilkad hos am ag baelag di ɠagattag, men bia; panakkunu ele iitta. Ahilkad bannu karis am huan, pahanab gokkulag, bannu karisnu wil itoɗiak am ulah kilibob itoɗiaya gotte, amubia itoɗikku.

²⁹ Ban danab amu ag oɗelagppa ena, muttub qena, oqottilag laion gaatteb, baalag oqotti amubia oqotti okku. Ao, ag laion bau gaatteb bia heppeg, oqotti okku. Laion liɗimna, doɗ aɗan qena, maon ukkaeg, laa doɗ amu ehanitteb, qagaiettakppa ii daamanu ii daatte amu, amubia kekeɗ ag anam hekkulag.

³⁰ Amu haen amuppa kekeɗ ag uɗin, geha Juda wan heppeg nauhebeb, ag enan, muttub qekkulag. Amu oqottilag amuam yu duban qaaqa, koɗkoɗ qa uɗia, yu ihippa aoɗaɗa, oqotti otte amubia daakku. Amu danab nug neekkeb, Juda wanppa uɗieb amu, nug gatatu manak, atu nauhak ele anidkku. Ao, nug bud hinqak tona, aamnu amahlak qehakka dayebeb anidkku.