Aisaia 49 - Nobonob Baibel

Yawenu Maɗi Nid

¹ Danab ah wan miagnu, wan umanu ele, ag nai dahil doyeg! Ao, ag danab ah wan atu umanu, ag doyeg! Anai da ii menuiɗom haenppa, Yawe Nug da onilppa eum. Ao, da anai ooppa niiiyi, Yawe Nug da onil diiom.

² Yawe Nug he, dahil nai am qep aeg elenab bia dayom; Nug keeke enanag laa danab eppegppa dayeye atognotte, Nug amubianab da atognoiɗom. Ao, Yawe Nug heiɗe, da lat doɗo aeg uɗat haknu babaittak daatte, da amubianab nuhig uɗat hekkulnu babaittak daaiyi, danab nug lat aeg nuhig abenppa ma atognotte bia, Nug da atognoiɗtte.

³ Yawe Nug da amelppa aum. “Na am dahil maɗi nid; Israel ⌊daalob bia, na⌋ daattem. Da heppi, danab ah laa ag nahip hak anidnana, ag da binal humaglag,” awa aum.

⁴ Amge da ami. “Da uɗat hemi amu, amuppa aɗitai laa ena ii beum. Yo, da uɗat hei, dahil ɠagattag iitta meum, amge uɗat amu oh hamu ukkom. Anam daatte, amge uɗat da hemi, amuppa da nob ena aokkulnu daatte, amuam Yawe eppegppa daatte. Yo, da uɗat hemi, amuppa nob aokkul ele amu, amuam Kayak toppa daatte.”

⁵ Yawe Nug da anil ooppa, Nug da nuhig maɗi nid meiɗa, Nug da Jakop buɗub, ag nuhigppa eɗue diie uɗikkulnu heiɗom. Yo, Nug da Israel danab ah ehanadppi, ag eɗun, nuhigppa uɗiglagnu heiɗom. Yawe Nug da binag okkai meɗatte. Ao, dahil Kayak Nug ɠagattag meɗatte.

⁶ Amu gemu Yawe Nug inam atte. “Na dahil maɗi nid daanna, na Israel diippe, ag eɗun, dahilppa uɗiglag, amuam uɗat nakokib. Ao, na huu imu da gumatte, ehanatti ii padal meppig ele diippe, ag eɗun, dahilppa uɗiglag, amuam uɗat nakokib. Anam amu, da na uɗat okkai laa ele hekkutnu, da uɗat amu nahipnu uumi daatte. ‘Da na iitta aɗi, ag gatatuppa daatteb, na ag ele ehanadppe, ag ib anidkkulagnu amahlak madakkutnu otidmi. Ao, na iitta aɗi ehanadppe, ag oolag eɗueb Kayak danab ah wan atu ohppanu amu eɗua diiadkku,’ ” awa atte.

Yawe Nug nuhikkud danab ah ehanatteb, padal ii memana

⁷ Yawe, Nug am Israel, ahilag qagaiettakppanu eɗua uhuqaknu ehanittak daatte, Nug Israel dilag Kayak Oppiaawak Ele amu, Nug nuhig maɗi nid, laa ag nuhig danab amunu oolagppa ena iinab dootteb, nuhig danab amu Nug wanppan okkai dilag maɗi nid daatte amu, Nug nug amegppa atte. “King ag na anidna, ag ahaglag. Danab okkai laa ag na anidna, ag dup nona, gomelna daaglag,” awa atte Ag amu hekkulagnu diig am, Yawe Nug nuhig diignu oo metta ii uuak kobol dim lamidtte; Nug aɗi hekkunu atte amu, Nug hette, ag amu anidkkulag. Ao, ag amu hekkulagnu diig am, ag Yawe, Nug Israel, ahilag Kayak Oppiaawak Ele, ag Nug na tituanittom amu, ag Nug anam heum anidkkulag.

⁸ Amu Yawe Nug atte. “Haen da ii helom bia me, da na ehanidkkulnu ena doyeye, da nahip unuqittak doyen ehanidkkul. Ao, ehanitteb, padal ii mak haenppa amu, da na ehanidkkul. Da na nena qemananu ehanitten, da heppi, na gamag danab daappe, da danab ah ele nai qakkagnig. Nai qakkak amuppa amu, da nahip-ppa ag ehanadppi, Juda danab ag eɗun, ahilag wan hele-ettak daakku amu, ag bappaidkkulag. Amu nai qakkak amuppa ele amu, da nahip-ppa heppi, wan maha maha oh am mamelkad eppelkadppa eɗun daaglag. Ao, aun nug wan anen anen mameg daappig amu, ag buɗulkad ag eɗun anam daaglag.

⁹ Na danab ah maniguittakppa daatteb amelagppa, ‘Dimittim doig!’ appe dooglag. Ao, na laa, ag maniguittak gatatu eleppa daaglag amelagppa, ‘Ag baula maniguadppeg, gatatuppa aib daappig!’ appe dooglag. Na anam heppe, ag eɗun wanelagppa gobeppeg, da heppi, ag ib daugppa ee elele anidna, ag qauko nakok, ee ii daatteppa ele ee anidkkulag.

¹⁰ Ag gobeppeg, enug ii aqama; le baalag ele ii diima. Atu taɗaknu aam gakkaɗak ele ii aqama. Aɗinu? Laa ag oo madatte amu, Nug ag ulum madatta, Nug ag le qeppuɗia betteppa omalatta gokku.

¹¹ Da heppi, qauko ag eɗun aon, ib daaglag, amu ib da bappaidttem ele, amu oh am ib enaib daaglag.

¹² Antteg! Dahilad danab ah ag umanabnu uɗiglag. Laa ag yawalti uɗitteppanu uɗiglag, laa ag qaban uɗitteppanu uɗiglag, laa ag yau uɗitteppanu, Aswan appanu uɗiglag.” Yawe Nug anam atte.

¹³ Yawe Nug danab ah nuhikkud oo mak madatte, Nug nuhikkud danab ah bu okkai aoppig dilagnu oo bodoetta le mak dootte amunu, ag hab daup, ag oo gamag ahak doon, baalag okkaippa eig! Yawe Nug anam hette amunu, danab ag oo gamag ahak dootteb, amubia keeke oh wanppa daatteb, ag oolag gamag ahaɗ! Nug anam hette amunu, danab ag oo gamag ahak doon, ahi ettaladtteb, amubia ag qauko, ag oo gamag ahak doon ahan, ahi etteg!

¹⁴ Yawe Nug anam hette, amge Juda danab ah ag atteb. “Yawe Nug uuikka ii dabmegatte. Ao, Naɗi Nug ihinignu daug atiom,” aon atteb.

¹⁵ Ag Juda ag anam aon atteb, amge Yawe Nug ag amelagppa atte. “Ah nid awa, nid amu huh medatte amu, ah amu nug nid amu daug atikkunu elelete? Nug nid amu oo ii metta, daug atie, nid nug menuom ele amu ii bekkidkkunu elelete? Iittabia amge, gadon, deɗ laippu laippu ah laa nug anam hekku bia, amge da laa nug anam hette bia amu, da ii hepa. Da ahilagnu daul iinab atima.

¹⁶ Antteg! Da ag onilkad da eppelppa yen malai daatteb. Da Juda danab ah, danab nug Jerusalemnu aɗ guguittak dayaya, hanhan andatta dabmette, amubia da ahilagnu hanhan dabmettem.

¹⁷ ⌊Anam amu, haen da ag eɗuen diiadkkul, am inam daakku.⌋ Ag bekkalkad, laa ag diin goppig ele amu, ag paha eɗun, ahilagppa uɗiglag. Huu laa ag uɗin heeg nauhppig ele amu, huu amu ag ahan, uuadna gokkulag.

¹⁸ Ag Juda, ag amelag human, laih laih neegna, ag bekkalkad oh ag qagmena, eɗun ahilagppa uɗippeg anadkkulag! Da Yawe, da attem. Da genab bau daattem, genab amubia amu, nid ahilkad ag ah nug bala enanag me, beɗunu neekkak enanag daatte amu, nid ahilkad ag ahilagppa amubia daaglag. Ao, ah nug danab aokkunu haaha, beɗu bappaidtte amu, nid naunau ag ahilagppa bala anam bia daaglag.

¹⁹ Amu ag Israel, ag ahilkad kekeɗ ag uɗin heeg, ahilag wan am nauhak, hele-ettak daatte. Ge, ag heeg, ahilag wan am nauhakib daatte. Amu da heppi, ahilag wan eɗua, ena dayebeb, ag Israel ag appa ambak daaglag. Wan amuam nakok dayebeb, ag huanak daaglag. Amu laa ag heeg nauhppig ele amu, ag uma daaglag.

²⁰ Haen amuppa da heppi, kekeɗ ag anukka ag Israel, ag eɗadna diin ukkaeg, ag laih daappig amu, ag eɗun uɗin daaglag. Amu ag laih daanna, nid menuadppig, ag ele oh uɗin daaglag. Amu haen amuppa ag bekkalkad amu ag ag amelagppa inam akkulag. ‘Wan imuam hogogdoak, nakok daatte. Ig wan baula aognignu daattem,’ aon akkulag.

²¹ Haen amuppa ag Israel, ag akka akka oolagppa ag akkulag. ‘Aun nid imu oh dahilad menuattom? Da uug naunab nauppa dayeye, ah gamu iitta bia daami. Da am diia ukka, laih me dayak danab piɗe, wan laappa daami, laa oh dahilnu, “Am nau,” dooppig. Aun he, nid imu oh ena meppig? Da piɗe dakkanab daami amunu, imu amu, ag adeppan uɗippig?’ aon akkulag.” Yawe Nug anam atte.

²² Ag anam akkulag, amge Naɗi Yawe, Nug atte. “Antteg! Da danab laa nug layag keeke dookkunu eppegppa hette, amubia da iitta aɗi ag nid naunau ahilkad diin uɗiglagnu heppi dooglag. Ao, da danab nug laa antta, keeke dookkunu pilak ad attan humatte, amubia da wan laa ohppan danab ag ahilkad nid naunau diin uɗiglagnu pilak humappi dooglag. Da amu heppi, ag ag bekkalkad diin uɗinna, ag ag aɗelkad ele diin uɗiglag.

²³ Ag Juda amu, king laala ag ag mamelkad daaglag. Kuin laala ag anig nid huh medatte, ag ahilagnu anambia daaglag. King aɗi amu, ag Juda ahilagnu okkai doon, ag ag noolagppa gatelag qaun ona, gomelna ag iɗulag wanppa mekkulag. Ag ag baelagppa dup nona binalag mekkulag. Ag amu hekkulag amunu, ag Juda, ag da am Yawe doon, laa ag da amel metteb ele, ag uɗa nak ii doomna ele dooglag.” Yawe Nug anam atte.

²⁴ ⌊Amge laa ag inam akkulag.⌋ “Laa nug aha, keeke ban danab ɠagattag laa awe, eppegppa daatte amu, laa nug amu eppegppanu aɗitta aokkunu elelete? Ge, ban danab ɠagattagnab, nug ban huana hette ele, laa nug aha, danab laa ban danab amu aɗe, nug eppegppa daatte amu, laa nug ehanitteb, eppegppa qagaiettak daatteppa ii daamanu elelete?” aon akkulag.

²⁵ ⌊Amunu nob am iitta, amge haen imuppa nob laa daakku.⌋ Aɗinu? Yawe Nug inam atte. “Da heppi, danab ah ban danab ɠagattag aɗualatteg, ag ag eppelagppa daatteb amu, laa ag eɗun aɗadna diiglag. Ge! Da heppi, keeke ban danab nug ban huana hette ele eppegppa daatte amu, laa ag amu eɗun aoglag. Da laa, ag Juda ahilagnu ban hetteb ele amu, da ag ele ban hekkunig. Ao, da ag Israel, da ag bekkalkad aɗi ehanadppi, padal ii memana.

²⁶ Laa ag Juda ahilagnu eheɗ hetteb ele amu, da heppi, ag akka akka ag teppulag lakkulag. Da heppi, ag akka akka ag tiilag lawona, danab nug wain la, kaaka qette bia daaglag. Da anam hekkul amunu, danab laa oh ag da Yawe, ag dahilnu, da am ag Juda, ahilag padal memananu ehanittak danab dayeye, da ahilag qagaiettakppanu eɗua uhuqaknu ehanittak dayeye, da am Yawe, da Laa Ɠagattag Okkai Ele, Jakop da binal meum ele amu, da anam daattem dooglag.” Yawe Nug anam atte.