Aisaia 47 - Nobonob Baibel

Yawe Nug heeb, Babilon nauhkku

¹ Yawe Nug atte. “Ag Babilon danab ah ag enub danabnab aɗeg, ah makkun, uug nuhigppa be, nug aben enanag nuhig uua, wan qaɗeppa gappudppa heɗep na daatte, amubia ag ahilag aben enanag uun nona, gappudppa dayeg! Genab, ag Babilon danab ah, ag ah makkun laa, mameg am en naɗi okkai ele, nuhigppa uug be, gemu nug sia enanagppa ii daatte, nug noa wanppa hamu daatte, ag amubia wanppa dayeg! Aɗinu? Laa ag tatam ah makkun amu anidna, nuhignu, ‘Nug iɗu tuqaknab, uɗat laa hekkunu iinab daatte,’ appig, amge gemu nug nauhom daatte amunu, ag anam ii atteb, amubia ag Babilon danab ah, ahilagnu ele anamib bekku.

^2-3 Ah makkun amu, nuhigppa uug be, laa nug he, gemu nug uɗat uug naunab nau haaha dayeye, okkai nuhig nug uɗat hekkunu duttunitta he, nug uɗat amu hekkunu elele daakkunu nug iɗu tonaknu lamen uɗa, lamen elab ele aɗe te, baeg miag dayeye, uɗatppa gokkunu le naunau mataɗadtte, amubia laa ag heppeg, ag Babilon danab ah ag beɗulag miag daakku. Ao, ag Babilon danab ah, laa ag heppeg, ag lamen elele iittanu uɗalag nekku. Da Yawe, da ag Babilon danab ah, da ag eheɗ hak ahilagnu nob tutukku madakkul. Ao, da laa uug amu eɗidmanu heppi, uug amu eɗittaknu ippu am keldoak daakku.” Yawe Nug anam atte.

⁴ Laa Nug ig Israel, ihinig qagaiettakppanu eɗua uhuqaknu ehanittak daatte, Nug onig am Yawe Nukka Ɠagattag Oh Ele. Nug am ig Israel, ihinig Kayak Oppiaawak Ele.

⁵ Amu Yawe Nug tuɗitta atte. “Ag Babilon danab ah, ag toettan dayeg! Ag gatatuppa dayeg! Aɗinu? Danab ah oh ahilagnu baula, ‘Wan oh dilag okkai aakku,’ ii amana.

⁶ Da dahilad danab ah, ag hipunin heppig amunu, da ahilagnu ool nauhe, da hei, Babilon ag wana, ahilag wan aon, ahilag daakkunu aɗappig. Da hei, Israel danab ah ag, ag Babilon eppelagppa daappig, amge ag Babilon ag Israel dilagnu oo gai-iitta doya oo metta ehanittak laa iinab heppig. Iitta. Ag nid bau dilag eheɗ hadappig, amge amuib iitta. Iitta. Ag ele ahilag eheɗ hak tuɗidna, wagai mena, ag Israel danab ah kaino dilag eheɗ hattanna, uɗat nau, uug ele ag madappig.

⁷ Ag Babilon ag kuin laa nug nukka nuhignu, ‘Da hanhan kuin daakkul,’ atte, amubia ag Babilon ag, ‘Ig hanhan wan oh dilag okkai daagnig,’ appig. Ag anam appig, amge ag eheɗ hak ahilag, ag amunu nob nau ii dabmeppig. Ag eheɗ hak ahilag, ag amunu nob nau ahilagppa bekkunu elele amu, ag amunu dabmak nakok laa ii aoppig.

⁸ Ag Babilon danab ah ag ah okkai laa bia daatteb. Ah amu nug keeke enaib aokkunu wagai ma hette. Nug uug laa nuhigppa bekkunu dab-ii-maama, nug nukka nuhignu, ‘Da dakka okkai daattem. Laa nug okkai da bia ii daatte. Laa nug danab dahil heeb nauhkkunu ib iitta. Laa nug nid naunau dahilad hatteb nauhkkulagnu, o diin gokkulagnu ele, elele iitta,’ atte. Ag Babilon ag anam daan dabmena, ag kobol eheɗ henana, dabmak eheɗ ele aotteb, amge ag gemu ag dahil nai imu doyeg!

⁹ Uug pahanab, deɗ laippuppa, laippun ahilagppa bekku. Uug amuam laa ag uɗin, ah gamu heeg mauhe, bekkod ele aqaeg mauhtteb, diin ele gotteb, uug amubia ahilagppa bekku. Ag, Babilon, ag uug amu bemanu emaɗ hak digdig henan, baɗ mak uɗat ɠagattag digdig ele hekkulag, amge amuppa ag ehanittak ii aomna. Iitta. Uug amu anam ba, okkai elelenab ma tonadkku.

¹⁰ Ag nau hak kobol ahilag dimugppa, guppiɗ dimugppa dayak bia, ag anam daanna, ag, ‘Laa ii anigtte,’ adappig. Ahilag doyak dabmak ena ele, ahilag doyak ele am eheɗ dayaya he, ag ib ena apiɗidna, eheɗ gonana, ‘Igib danabnab daattem. Laa oh am hamu. Ig bia laa ii daatteb,’ appig.

¹¹ Amge uug naunab ahilagppa bekku. Beebeb amu, ag eman hakppa amu bemanu ib keldokkulagnu ib laa ii anidmana. Ao, uug naunab ahilagppa bekku. Beebeb amu, ag en mettakppa qagaiettakppanu uhuqak aoglagnu elele iinab daamna. Ge! Uug naunab, ag amu ii nak haenppa dabmekkulagnu elele iitta amu, uug naunab nau amu ahilagppa laippun, paha bekku.

¹² Anam bekku amunu, ag digmena huu daappig haenppa, ag haen amuppa digmena, baɗ digdig, emaɗ hak digdig ɠagattag aoglagnu henana oippig amu, ag amu hekkulagnu aib uuppig! Ag tuɗidna hekkulag amu, ag ehanittak nakok aoglagtai. Ag amu tuɗidna hekkulag amu, ag heppeg, laa ag eheɗ nau baɗadkkulagtai. ⌊Iitta. Da aɗi heppi bekku am bekku!⌋

¹³ Ag Babilon danab ah, ag ge iitta gonana, eman hak danab, ag hoɗoppai anadnana, aɗi aɗi haknu am ena dabmetteb ele amu, ag ag aɗi aɗi heppeg bekkunu ulum nai appig doon, ag bahilag yom, amge ag ii uuppig. Ukkakib goppig amunu, gemu danab amu, ag hanhan hoɗoppai anadnana, ag kalam anen anenppa ag Babilon danab ah ag aɗi hekkulagnu appig amu, ag ahan ehanatteg! Ag ahan, keeke bekkunu daatte amu, uug naunab amu bemanu ehanadppeg aib beum!

¹⁴ Amge iitta! Danab amu ag wit keeke gumu qaɗaiettak, aab paha ewe iitta mette, ag amubia daan, paha nauhkkulag. Ag agakka ehanadna ena daaglagnu elele iitta; wit keeke gumu nug nukka aab ewakppa ha ena daakkunu elele iitta, amubia. Wit gumu ewak amuam aab gakkaɗaknab. Danab nug aab amu guguittaknab dayaya, beɗu gakkaɗak aokkun am iitta. Aab amuam danab nug uɗikka dayaya, ena daakkunu iitta. Amubia uug ag Babilon ahilagppa bekkun daatte am naunab nau ele.

¹⁵ Ag Babilon ag digmena huu daappig amu, ag haen amuppa danab amu ehanadkkulagnu gumadna godappig, amge uug bekkun daatte amu, uug amu bemanu ag ehanadkkulagnu elele iitta. Danab amu ag anen anen ahilag dabmak eheɗppa oinna hebeppeg, ag ehanittak laa ii aomna. Laa ag oolagppa ag ehanadppeg, padal ii memananu am laa iitta.” Yawe Nug anam atte.