Aisaia 46 - Nobonob Baibel

Babilon dilag kayak am keeke hamu

¹ Babilon dilag kayak onig Bel, nug genab daalo, nug dup nolo. Babilon dilag kayak laa onig Nebo, nug genab daalo, nug gomela daalo. Danab ag dottolti aon, laih gokkulagnu uɗatnu doɗ gomeppa maatteg daattep. Danab ag kayak hambuppuak aɗit amu dottolti, ag keeke amu doɗ bahilag yaatte ele gomelagppa meeg maotteb.

² Bel, Nebo ele aa genab daalop, aa oh gomelya, dup noya daalop. Aa aya aa dottolti ehanadpeɗ, ag qagaiettakppa ii daamnanu elele iitta. Aa dottolti aakku wan laappa, danab laa eppelagppa daatteb bia, ag appa laa eppelagppa daaglagnu aakku gotteb.

³ Amu Yawe Nug atte. “O Jakop buɗub, ag dahil nai doyeg! Ao, ag Israel buɗub ii mauhppig, gemu daatteb ele amu, ag dahil nai doyeg! Nid nug digma, anig ooppa daye, anig atognotte, amubia ag Israel, ag digmena, huu laa daappig, haen amuppan uɗie, gemu ele da ag atognoadmi. Ao, anig nug nid menua, atognotte bia, da ag huu piɗe daaglagnu digmak haenppanu gemu ele, da ag mawattette bekkadttem.

⁴ Amu da hemi bia da tuɗitten heppi ukkeb, ag kaino iitta, ag ikkilag uɗug umimi iitta daappeg ukkeb, ag kainonab daanna, ag ikkilag uɗug umimi ele, haen amuppa ele da ag ehanadkkul. Laa amu hette am daib, laa iitta. Da ag huu laippu daaglagnu hemi amu, da ag mawadkkul. Da ɠagattag matten, uug haenppa da ag ehanadppi, ag qagaiettakppa ii daamna.

⁵ Ag laa anidna, ‘Yawe Nug nug bia daatte, aa oh anamib, aa elele elele,’ akkulagnu elelete? Iitta! Ao, ag laa anidna, ‘Nug Yawe ele aa laippu bia daattep, aa piɗe piɗe iitta,’ akkulagnu elelete? Iitta!

⁶ ⌊Amge amubia hekkulagnu⌋ laa ag ahilag bek battamppanu gol gokkaɗeg no, ag silwa skelppa tituanna meeg daatte. Dayeye amu, ag keeke golppa hak danab nug gol, silwa ele amuppa kayak hambuppuak dottog hekkunu men doɗo mettaeg hette. Nug ha male, ag dottog amu noobppa dup nona binag metteb.

⁷ Ag heeg, danab nug dottog amu ha male, ag human, gukkalagppa maon gotteb. Ao, ag aben nug daakkunu bappaidppig ele, ag aguppa meeg daatte. Dottog amu nug laih laih gokkunu elele iitta. Nug aguppaib daatte. Laa nug dottog amu unuqidtte dayeb amu, nug noob ii mette. Dottog amu danab uug eɗidmanu ehanitteb, uugppa ii daamanu elele iitta.

⁸ ⌊Kayak hambuppuak ag anam daatteb, amge da am anam iitta amunu,⌋ ag danab ah ag da waalppa ii daan, dahil nai tappaeg ne oitteb ele, ag imu daulagppa dob, ag aɗan, tutukku dabmenan oiyeg!

⁹ Ge! Ag anukkan keeke, keeke ag anukkanunab dooppig ele, keeke amu ag daulagppa doaɗ! Aɗinu? Da am Kayak. Kayak laa ii daatte. Da am Kayak, laa nug da bia ii daatte.

¹⁰ Da digmak haenppa keeke laanu gogppa tak haenppa bekku amu hei, miag atitte. Da anukkanab aɗi keeke butti aɗi bekku ai dooppig. Da attem. ‘Da aɗi keeke dabmein attem amu, da hei bette. Da aɗi oh hekkulnu hettem amu, da hekkul.’

¹¹ Da danab laa ⌊Sairus,⌋ aam bedeppanu, ⌊nug ban haknu danab⌋ ai doɗ qe mauhe latte, nug amubia hekku amu, da nug onigppa ettem. Ao, da wan umanabnu danab laa nug dahil dabmak dim lamitta, dahil oo hak heeb bekkunu onigppa ettem. Da aɗi heppi bekkunu ami am, ana bekku. Ao, da aɗi kobol bekkunu maittak aomi amu, da heppi bekku.

¹² Da anam hettem amunu, ag danab ah ahilag dabmak ɠagattag eppom, ag genab tutukku hak kobol ii dim lamidtteb ele amu, ag dahil nai doyeg!

¹³ Da hei, danab nug da noolppa genab tutukku daakkunu kobol aakku miag uɗiom daatte; am uma ii daatte. Ao, dahil padal ii memanu ehanittak am paha uɗikku; laa nug heeb, ib am keldoak ii daama. Da danab ah Sion daatteb ehanadppi, ag padal iinab memana; da heppi, dahil binag amahlak oppiaawak ele am okkainab Israel oolagppanu miag atikku.” Yawe Nug anam atte.