Aisaia 45 - Nobonob Baibel

Yawe Nug Sairus epeɗiom

¹ Yawe Nug Sairus king daakkunu goɗen gokkaɗakppa tituanom. Nug wan laala eɗatta diiaknu, nug king laala dilag ban haknu keeke aɗatta awaknu, nug aab okkainu aɗ od matulattebeb, appa wanaknu ib keldoak daamanu, Yawe Nug nug eppeg naɗiap aɗom daatte. Amu Yawe Nug Sairus amegppa inam atte.

² “Da geha anuqe ukken, na uug nau nittamanu da danab nug laa ag ib laappa oiglagnu ib bappaidtte bia, da ehanitte, nahip ib babaitte medakkul. Amu danab laa, aab okkai, o iitta lag laa ooppa nokkunu od brasppa hattak, o manak qaknu keeke aenppa hattak okkulatta, ooppa notte, amubia da na ehanitten, qagaiettak okkai anidkkut amu, da mautkkul.

³ Da Yawe, Israel dilag Kayak, da na oninppa ettem amu, na da dooiɗna autna aokkutnu, da na ehanitten, en okkai okkai, aben gatatu ele daatte medakkul. Ao, da en okkai okkai, aben lokkumakppanab daatte, da na medakkul.

⁴ Da Jakop buɗub, ag dahilad maɗi nid maɗi ah ele amu, da ag eheɗ daatteb anidttem amunu, da ahilagnu dabmak anuqak awewe, ehanadkkulnu hettem. Ao, da Israel danab ah, da ag tituanadmi amu, da ag eheɗ daatteb anidttem amunu, da ahilagnu dabmeinne, da ehanadkkulnu hettem. Da ehanadkkulnu hettem amunu Sairus, da na oninppa ein, uɗat imu mettami. Na da ii dooiɗttem, amge da na binan okkai mettami.

⁵ Da dakka aakkuib am Yawe! Kayak laa ii daatte. Na da ii dooiɗttem, amge da heppi, na ɠagattag daakkut.

⁶ Wan atu ohppanu danab ah, ag laa da bia ii daatte dooglagnu amu, da diig amunu ɠagattag medakkul. Da aakkuib am Yawe; Kayak laa ii daatte.

⁷ Da hei, amahlak amahaltte; da hei, gatatu daatte. Da hei, danab ag maɗoɗ aon daatteb, amu da hei, danab ag uug naunab waappa daan oitteb. Da Yawe, da keeke imu oh hettem.

⁸ Gu na, wan oh leppu medatte, amubia genab tutukku hak kobol hab attannu wan atu oh tonaɗ! Ao, gu lombigppanu na, wan oh leppu medatte, amubia genab tutukku hak kobol hab attannu na, wan atu ohppa dayaɗ! Wan nug gu awe, keeke bette, amubia ⌊genab tutukku hak kobol neeb,⌋ Padal ii maknu ehanittak kobol ba, okkai maɗ! Ao, wan gu awe, keeke bette, amubia ⌊genab tutukku hak kobol neeb,⌋ kobol amu, Padal ii maknu ehanittak kobol ele oh laippu okkai meiɗ! Da, da Yawe, da kobol amu hei beum.

⁹ Danab nug laa nug heittom ele, nug nuhignu nai hette amu, danab amunu am gadonnab gadon. Ao, danab ag waa aoɗak qatti laa, ag amubia aakkuib daatteb, amu danab nug laa nug heittom ele nuhignu nai hette ele amu, nug waa aoɗak qatti kuɗum oolagppa bia daatte aakkuib amunu, nuhignu am gadonnab gadon. Waanu lekkoh nug aha, nug waa keeke hak danab amegppa, ‘Na aɗi hekkutnu hettem,’ attete? O waa nug aha, ‘Laa heiɗtte ele amu, nug eppeg iitta,’ attete?

¹⁰ Laa nug aha, mameg amegppa ‘Na aɗinu menuiɗme? ⌊Na eheɗ heme⌋,’ atte amu, nuhignu gadonnab gadon. Ao, laa nug aha, anig amegppa, ‘Aɗinu na da dokkulnu guittak doome? ⌊Na nau heme,⌋’ atte amu, nuhignu gadonnab gadon.” Yawe Nug anam atte.

¹¹ Amu Yawe, Nug am Israel dilag Kayak Oppiaawak Ele, Nug he, Israel ag huu laippuppa daatteb, Nug kobol amunu inam ele atte. “Da butti aɗi dahilad nid dilagnu attem heppi amu, ag da amunu, ‘Amuam ena iitta. Na inam helom am ena,’ akkulagnu ib iitta. Ao, da dahilad nid dilagnu attem hettem amu, ‘Na inam he!’ akkulagnu ib iitta. ⌊Ag hekkulag dayeb amu ag hambuppun hekkulag.⌋

¹² Da, laa iitta, da wan hemi. Da hein, da danab ah aguppa daan oiglagnu ele hattami. Da eppelppa hab hein, da aam kalam hoɗoppai ele appa daatteb ele hattami.

¹³ Da genab tutukku hak kobol dim lamitten heppi, Sairus nug dahil uɗat hekku. Da nug ippu tutukku medappi, nug dahilad diia ukka laih me dayak danab ah uhuqatta, nug heeb, ag ahilag aab okkai bappaidkkulag. Da anam hekkul, amge Sairus nug amu hekkunu amu, nug dadennu ii hema. Nug keeke enanu ii hema. ⌊Iitta da heppi, am nug hekku⌋.” Yawe Nukka Ɠagattag Oh Ele, Nug anam awa atte.

¹⁴ Amu Yawe Nug atte. “O danab ah dahilad, da heppi, Isip dilag en, am Kus dilag en ele ag Israel, ahilag daakku. Sabea danab, ag danab elab, ag uɗin, ag Israel noolagppa dup nona, ahilag ehanittak daaglag. Ag maɗi nid ag okkai ahilag uɗat hekkulagnu senppa daanna, nug dim lamidtteb, amubia Sabea danab ah ag uɗin, ahilag ehanittak daaglag. Ag uɗin, ag noolagppa dup nona, ag oo doyakppa oɗ mattan akkulag. ‘Genab, Kayak Nug ag ele daatteb; laa ii daatte. Ge, Kayak laa ii daatte ⌊amu ig ele Nug noobppa dup nota, Nug binag mekkunignu oonig hette⌋!’ akkulag.” Yawe Nug anam awa atte.

¹⁵ O Israel danab ah, genab ahilag Kayak Nug miag atiakib ii daatte. Iitta. Nug danab ah amelagppa lokkumak ele daatte. Nug am ahilag Kayak; Nug ag Israel, Nug ahilag Padal ii maknu ehanittak daatte.

¹⁶ Anam, amge laa ag kayak hambuppuak hetteb ele, ag oh am uɗa nak aon daanna, laa noolagppa uɗa nak nau guittak ele dooglag. Ao, laa ag kayak hambuppuak hetteb ele, ag uɗa nak nau guittak ele doon oiglag.

¹⁷ Amge Yawe Nug Israel ehanatteb, ag padal iinab memana. Ehanitteb, padal ii mak amuam hanhannu; iitta ii mema. Ao, ag Israel, ag uɗa nak ii aomna; laa noolagppa uɗa nak nau guittak ele ii daamna. Ag hanhan anamib daaglag.

¹⁸ ⌊Keeke amu oh am anamib bekku.⌋ Aɗinu? Yawe, Nug hab heum, Nug nukka am Kayak. Ao, Yawe, Nug wan heum amu, Nug wan ɠagattag daakkunu babaittom. Nug danab ag wanppa daaglagnu wan babaittom. Nug wan danab ah appa ii daamnanu ii babaittom. Iitta! Nug danab ah aguppa daaglagnu babaittom. Amu Yawe Nug atte. “Da am Yawe, laal ii daatte.

¹⁹ Da aben lokkumak ele, da aguppa dayeye, nai ii mattimi. Wan amuppa gatatu daatte amu, da gatatu amu ooppa daye, nai ii mattimi. Da Jakop buɗub ag aben danab ah ii daattebppa da aniɗna dim lamiɗkkulagnu mattiɗkkulagnu ii ami. Da, Yawe, da genab madittem. Da kobol tutukku aakkuib ippunadttem,” Yawe Nug anam atte.

²⁰ Yawe Nug imu atte. “Ag danab ah wan atu laih laihnu, ag banppa ii mauhppig ele amu, ag qagmena uɗin, da noolppa daanna, ⌊dahil nai doyeg⌋! Aun aɗi ag kayak hambuppuak dottolkad maon oin, binalag metteb ele, ag am dabmak iitta. Ag kayak hambuppuak amu unuqadtteb, amge kayak hambuppuak amu ag ehanadkkulagnu elele iitta.

²¹ Ag danab ah laih laihnu banppa ii mauhppig ele, ag kayak hambuppuak binag metteb amu, ⌊ahilag kayak amu⌋ ag butti aɗi, aɗi bekkunu daatte appeg dootu! Ag amu hekkulagnu ag laippu daan mattieg! Aun nug anukka kobol bekkun daattenu mattiom. Ao, aun nug anukkanab uug imu bekkunu aum? Am da, da Yawe, da amu iite hemi? Kayak laa ii daatte. Da Kayak, da genab tutukku hak kobol aakkuib hettem. Da eheɗ laa ii hettem. Da danab ah ehanatti padal ii metteb. Kayak laal ii daatte.

²² Amu ag danab ah oh wan atu ohnu ag padal memananu ag da dim lamiɗna, ehanittak da eppelppanu aweg! Aɗinu? Da aakkuib Kayak daattem. Kayak laal ii daatte.

²³ Da dakka, dahil nai da onilppa ɠagattag qettami; amu da geha aɗi keeke hekkulnunab ami amu, da genab hekkul. Da dahil nai qakkak amu eɗuen ii aopa; anamib daakku. Amu nai amuam danab ah oh ag da noolppa gatelag qaun ona, da binal mena, ag oh ahilag nai ɠagattag qettan, ag dahilnu inam akkulag.

²⁴ ‘Yawe Nugib genab tutukku hak kobol diig daatte. Nugib am ɠagattag ele,’ ” aon akkulag. Amu laa oh ag Yawenu oo nauhak okkai dootteb, ag amu uɗalag nekku.

²⁵ Amge geha Israel buɗub oh ag Yawenu ehanittakppa genab tutukku daan, ag gamag ahak okkainab dooglag.