Aisaia 44 - Nobonob Baibel

Yawe Nug Israel tituanattom

^1-2 ⌊Uug Israel dilagppa anam bekku,⌋ amge Yawe, Nug ag Israel ag anilkad oolagppanu ii doppig haenppa hatta, atognoatta, butti aɗi ele ag ehanadkku amu, Nug atte. “O ag Jakop buɗub, ag am dahil maɗi nid maɗi ah ele, ag dahil nai doyeg! Ao, ag Israel danab ah, da ag tituanadmi amu, ag nai imu doyeg! Jakop buɗub, ag am dahil maɗi nid maɗi ah ele, ag aib baɗappig. Ao, ag Israel danab ah, da ag tituanadmi amunu, ag aib baɗappig.

³ Aɗinu ⌊ag ii baɗamnanu attem⌋? Da heppi gu huana wan qaɗaiettakppa na, leppu medakku. Ao, da heppi, gu huana neeb, le naunau kuɗum wan qaɗaiettakppa gokkulag. Da anam hekkul amu, anamib da dahil Ouɗi ag buɗulkad madakkul. Ao, da dahil itittak ena ag buɗulkad madakkul.

⁴ Ag buɗulkad ag gikkiɗah wan uɗem enappa bette bia bekkulag. Ao, ag ad popla le naunau daugppa betteb bia daaglag.

⁵ ⌊Amu haen amuppa⌋ laa nug aha, ‘Da Yawenu danab daattem,’ akku. Laa nug aha, nug, ‘Da am Jakop buɗub laa,’ akku. Amu laa nug aha, ‘Da am Yawenu danab,’ eppeg ⌊gomeppa⌋ ya, nug memetalkad anukkanu Israel, nug nug onig amu awa, nug nukka onig oela qedakku,” awa atte.

Yawe aakkuib am Kayaknab

⁶ Yawe, Nug Israel dilag king, Nug Israel dilag qagaiettakppanu eɗua uhuqaknu ehanittak, Nug Yawe Nukka Ɠagattag Oh Ele, Nug inam atte. “Da hanhan daattem; anuqakppa, batakppa ele da daattem. Kayak laal ii daatte.

⁷ Aun laa da hemi bia laa heum daattete? Anam dayeb amu, nug mattiaɗ! Ao, laa anam heum dayeb amu, aria nug da noolppa dayaya, amunu oh mattieb doyei! Aun aɗi ag anukkanab keeke ii beumnu haenppa mattieg doomut? Aun aɗi ag butti aɗi attem bekku amu madippeg doognig.

⁸ O danab ah dahilad, ag aib ebehilag hahaɗeb baɗappig. Anukka da ⌊aɗi keeke bekkunu dayom amu,⌋ da amunu mattii, ag iite dooppig? Da ag amelagppa amunu iite ami? Ag am dahilad laa aɗi heehe anttomnu mattiak danab ah daatteb. Da aakkuib am Kayak, ahilag ehanittak, daattem. Da laa anam daattenu ii doottem,” awa atte.

Kayak hambuppuak dottolkad ag keeke laa haknu elele iitta

⁹ Danab aun aɗi ag kayak hambuppuak dottolkad hadatteb ele, ag ahilag dabmak am kabolia auta autanab awak daatte. Keeke ag oolag huana hette ele am keeke hamunab. Danab laa ehanidkkulagnu elele iitta. Laa ag kayak hambuppuak binalag metteb ele, ag danab nug ameg gaɗue, keeke ii anidtte, ag amubia dabmak genab iitta ele. Ag dabmak iitta, amu amuppa ag uɗa nak aoglag.

¹⁰ Danab nug kayak laa dottog hoitte, o nug kayak laa dottog gol o silwappa bappaidtte amu, nug dabmak iitta ele. Kayak amu ag ehanidkkunu elele iitta.

¹¹ Danab ag amunu doyak ele, ag dottolkad amu hetteb ele amu, ag oh uɗalag nekku. Danab ag uɗat amu haknu doyak okkai ele, ag danabib. Ag akka akka ehanadnana, ɠagattag daaglagnu ag qagmena, laippu dayeg! Ag anam hekkulag, amge Yawe Nug heeb, ag nena qena, ag uɗa nak nau doon, ag eheɗ nau baɗaglag.

¹² Danab nug aenppa uɗat haknu doyak okkai ele, nug aen maha awa, aab aɗu eotteppa me gakkaɗe, nug hamappa qeeqe, dottog laa aakku ha bette. Anamnab danab nug doyak amu ele nug hamappa kayak hambuppuak dottog aenppa bappaidtte. Nug eppeg am ɠagattag ele, amu nug eppegppa hama aɗa, uɗat amu hette. Nug hette, amge nug haaha, enug qeeqe, nug beɗu gai-iitta mette. Ao, nug hette, amge nug haaha, nug le baag diie, nug ameg qittintte.

¹³ Laa doyak amu ele, ag kayak hambuppuak dottolkad adppa hetteb. Laa anam hette ele nug ad mahappa melemel elele ma, nug keeke nai yaatteppa dottog amu ad qaɗeppa bappaitta mala, nug siselppa digma, dottog hoitte. Nug hoiye ukke, nug baula melemel maama, elele antta, nug tuɗitta hoitte. Nug danabnab dottog, iɗu tuqak ele kayak hambuppuaknu mettid lag nakokppa noobppa dup noa binag maknu daakkunu he bette.

¹⁴ Nug amu hekkunu amu, nug ad sidatai okkula awa hette, o nug ad saipres, o ad ok awa hette. Tatam nug atu ooppa neekka, ad amu antta, uue dayaya, okkai elele me, nug wa okkula awa, dottog amu bappaidtte. O iitta, nug ad pain eppe, gu ne, ad amu okkai me, nug wa awa, dottog amu hette.

¹⁵ Danab nug kayak hambuppuak dottog hekkunu nug ad amu o qiie okkula awa, nug oppata, laih aab ilakkunu awa, aab ile ewewe, danab amu beɗu gakkaɗak ele aotte. Nug aab ila, amuppa nug ee nuhig hette, amge ad amunu laih, nug laih amu ii ilom amu, amuppa nug kayak hambuppuak dottog hoitte. Nug hoiya mala, nug dottog amu noobppa dup noa binag mette. Ao, nug hoiya mala, nug dottog amu noobppa dup noa binag mette.

¹⁶ Ad nug o qiitte ele amu, ad amunu laih nug awa, aab ila, nug teppu amuppa mane, ewa male, nug la, oo diditte. Aab ewewe, amuppa ele nug beɗu gakkaɗeɗe, nug, “Ehe, enanag! Da daaiyi, aab gakkaɗile, da beɗul gakkaɗa malom,” awa atte.

¹⁷ Nug amu ha amu, nug laih aab ii ilom ele amu awa, kayak hambuppuak dottog nuhig hoitte. Nug hoiya mala, nug dottog amu noobppa dup noa binag ma, nug unuqitta, inam atte. “Na dahil kayak amunu, na da ehaniɗppe, da padal ii mepanu oɗ medattem.”

¹⁸ Danab ag anam hetteb ele, ag dabmak iitta. Ag keeke laa ⌊unuqagnu⌋ diignu doyak tutukku iittanab. Aɗinu? Ag danab nug ameg hautaknab, keeke iinab anidtte, ag amubia keeke genab anidna dooglagnu elele iitta. Od manak dayeye, danab nug lag ooppa gokkunu ib iitta, amubia dabmak tutukku ahilag dabmakppa gokkunu ib iitta amunu, ag diignu doyak tutukku laa aoglagnu elele iitta.

¹⁹ Danab ag kayak hambuppuak dottolkad hetteb ele oolagppan laa nug tutukku dab-ii-mette. Laa nug doyak elele, o diignu doyak tutukku elele am iitta. Laa nug anam dabmak elelob, o laa nug diignu doyak tutukku elelob amu, nug inam alo. “Ad amunu laih amu da awen, aab ilen, da ee dahil amuppa hemi. Da teppu manen lami. Da amu hemi amunu, gemu da ad amunu laih awen, keeke naunab nau, Yawe Nug amunu ooppa uuaknab dootte amu, da amu hoikkul am enate? Ao, da ad maha awen, amu noobppa da dup noin binag mekkul am enatte?” ⌊Laa nug dabmak elelelob amu, nug anam helo, amge iitta.⌋

²⁰ Danab nug kayak hambuppuak dottog hoiya, binag mette ele, nug am dabmak iittanab iitta. Nuhig doyak am kaliak dayaya he, danab amu nug ib tutukku apiɗitta malom. Nug nukka, nug padal memanu nugakka ehanidkkunu elele iitta dayaya, nug dabmak nau nuhig uua, “Kayak hambuppuaknu dottog imu da eppelppa aɗattem ele, keeke amuam keeke genab iitta, am keeke hambuppuaknab,” akkunu ele, elele iitta.

Yawe Nug danab ah nuhikkud daug ii atima

²¹ Amu Yawe Nug atte. “O Israel danab ah, ag am dahilad maɗi nid maɗi ah ele amunu, ag Jakop buɗub, ag keeke imu ag daulagppa doaɗ! Da ag huu laippu daaglagnu hemi, ag am dahilad maɗi nid maɗi ah ele; da ahilagnu daul ii atima.

²² Ag hipunin heppig, amge da hei, ulah lombig ye ukka ii daatte, amubia da ahilag hipunin oppii ii daatteb. Ao, ag hipunin heppig, amge aam he, buttuanu buttuɗai iitta mette, amubia da uhuqen mattai, hipunin ahilag ii daatteb. Da ag hipuninnu qagaiettakppanu eɗua uhuqak hein mattami amunu, ag dahilppa eɗun uɗieg!” Yawe Nug anam atte.

²³ Yawe Nug keeke okkai heum amunu, ag habppanu, ag oo gamag ahak okkai doon, ahi etteg! Ag wanppa daatteb, ag huana eig! Yawe Nug Jakop buɗub hipuninnu qagaiettakppanu eɗua uhuqak ha mattom; Nug nuhig binag amahlak oppiaawak ele Israel oolagppa he, miag atiom amunu, wanppan keeke oh Yawe hattom ele amu, ag ahi etteg!

Juda danab ah ag eɗun, Jerusalem daaglag

²⁴ Yawe, Nug ag qagaiettakppanu eɗua uhuqaknu ehanittak daatte, Nug he, nid anig ooppa ena mette, amubia nug he, ag Israel ag huu laippu daatteb amu, Nug atte. “Da am Yawe, da keeke oh hemi. Da dakka da hab hemi. Da dakka da wan ele hemi.

²⁵ Da, Yawe, da hei, propet hambuppuak danab dilag nai am kaboliak daatte. Ao, da hei, danab ah laa ag eman danab dilagnu ag dabmak iittanab ele daatteb anadtteb. Da hei, wanppan doyak dabmak ena ele danab dilag dabmak iitta mette. Ao, da hei, ahilag dabmak am hamunab, kaaka bia daatte.

²⁶ Da dahil propet, ag am dahilad maɗi nid, da aɗi nai ag madattem amu, da hei, nai amu meu otte. Ao, da aɗi nai dahil propet oɗelagppa mettem amu, da hei, nai amu genab bette. Amu da Jerusalemnu attem, ‘Israel danab ah ag eɗun, aguppa daaglag.’ Ao, da Juda dilag aab, ‘Danab ag aab amu eɗun bappaladkkulag,’ attem. Ge! Kekeɗ ag Jerusalem, Juda dilag aab naunau ele heeg nauhppig amu, da aab amu ohnu attem. ‘Da heppi, ag ena, babaittak daaglag.’

²⁷ Da le yuppa gotteb, yu ele qaɗaiettaglagnu ai ag qaɗaiedatteb.

²⁸ Amu da Sairusnu ele attem. ‘Danab ah dahilad ag sipsip bia daatteb, amu Sairus nug am dahil sipsip gumak danab daatte. Nug da ool hette oh heeb bekku. Nug Jerusalemnu, “Danab ag ahan babaitteg!” akku. Ao, nug dahil mettid lagnu, “Danab ag ahan, digmen babaitteg!” akku.’ ” Yawe Nug anam atte.