Aisaia 43 - Nobonob Baibel

Yawe Nug nuhikkud danab ah padal memananu ehanadkkunu aum

¹ Anam, amge gemu Yawe Nug he, ag Jakop buɗub ag huu laippu daatteb ele, Nug ag amelagppa atte. Ao, Yawe Nug, Nug he, ag Israel buɗub ag danab ah laippu daatteb, Nug ag amelagppa atte. “Da ag laa eppegppa dayaknu qagaiettakppanu eɗua uhuqak dayaknu hein madakkul amunu, ag aib baɗappig. Da danab nug laa onigppanab eewo dootte, amubia da ag onilagppa ei, ag dahilad daatteb.

² Ag dahilad daatteb amunu, haen uug nau, uug amuam danab nug le umanab noa ukkak mataɗa laih gotte, amubia uug nau amu ahilagppa bekku amu, da ag ele daagnig. Ag dahilad daatteb amunu, haen uug nau, uug amuam danab nug le ui ele mataɗa laih gotte, amubia uug nau amu ahilagppa bekku amu, da ehanatten heppi, ag nena ii qemana. Ag dahilad daatteb amunu, haen uug nau, uug amuam danab nug aab aɗuppa oiyaya gotte, amubia uug nau amu ahilagppa bekku amu, da ehanatten heppi, ag aab ewakppa guittak ii aomna. Ge, aab aɗu amu ewattebeb, ag guittak ii aomna.

³ Ag anam ii nauhmana. Aɗinu? Da Yawe, ahilag Kayak, da am ag Israel, ahilag Kayak Oppiaawak Ele; da am ahilag padal memananu ehanittak daattem. Da heppi, Isip danab ah ag, ag oulag daappeg, ag Israel, ag qagaiettak ii daamna. Ao, da heppi, Kus, Seba danab ah ele ag, ag Israel danab ah oulag daappeg, amuppa da ag Israel eɗuen, aben enappa maadkkul.

⁴ Da ag Israel, ahilagnu da ool madattem, ag dahil neekkakppa ag binalag ele; da ahilagnu ool mauhtte. Anam amunu, da heppi, danab laa ag oulag daappeppeg, ⌊da amuppa eɗuen, ag aben enappa maadkkul⌋. Ao, ag Israel, ag mauhmananu da heppi, danab ah ag oulag daappeppeg, ⌊amuppa da ag ehanadppi, ag ena daaglag⌋.

⁵ Ag aib baɗappig. Aɗinu? ⌊Da heppi, ag laih laih mattatun gona daaglag, amge⌋ da ehanadppi, ag aam bedeppanu, aam nodeppanu ele eɗun uɗiglag.

⁶ Da danab ah ag yawalti uɗitteppanu daatteb, da ag amelagppa, ‘Ag dahilad danab ah paɗadppeg, ag eɗun wanelagppa ukkeg!’ appi dooglag. Amu danab ah yau uɗitteppanu daatteb amu, da ag amelagppa, ‘Ag danab ah dahilad aib aɗualadppig!’ appi dooglag. Da wan ohppa, dahilad danab ah aguppa daatteb ele, da amu amelagppa ag dahilad danab ah omaladppeg, ag eɗun, ahilag wanppa uɗiglagnu appi dooglag.

⁷ Da danab laa amu, da ag danab ah dahilad, da onil ahilagppa daatte amu, da danab ah amu ag dahilad danab ah ohnab omaladppeg uɗiglagnu appi dooglag. Da dahilad danab ah dahil hakppa hattami. Da eppelppa ag hattami. Ao, da danab ah dahilad ag genab dahilad daan, dim lamiɗppeppeg, danab ah laa ag anidna dooiɗna, binal mekkulagnu hattami.

⁸ Ge da, ‘Ag laa ag danab ah dahilad, ag amelag ele, amge ag keeke ii anidtteb, ag daulag ele, amge ag keeke ii dootteb, ag danab ah laa ag danab ah amu omaladna uɗieg!’ appi dooglag.

⁹ Amu ⌊haen amuppa⌋ wan atu ohppan danab ag ⌊ele⌋ qagmena uɗiglag. Ao, danab ah diig ohnu ag uɗin daaglag. Ag uɗin daaglag, amge ag oolagppanu, o ahilag kayak hambuppuak laa nug keeke bekkun daatte a doomutte? Ahilagppan laa nug digmakppanu uɗia gemu batak, nug haen amu ohppan keeke laanu, keeke amu ii nak haenppa, nug keeke amunu mattie doomutte? Ahilagppan laa nug anam heum dayeb amu, laa nug mattiak amu doyom ele, nug aha, mattieb dootu! Nug anam mattieb amu, laa ag ele ahan, ‘Nug genabib atte,’ akkulagnu elele. ⌊Amge laa anam haknu am iitta.⌋” Yawe Nug anam atte.

¹⁰ Amu Yawe Nug ele atte. “Ag Juda danab ah, ag am da aɗi aɗi hei anidppig amu, ag laa amelagppa amunu mattiglagnu danab ah dahilad daatteb. Laa ele amu, ag am dahil maɗi nid daatteb. Da ag dahil maɗi nid daaglagnu tituanadmi. Ag da dooiɗkkulagnu, ag dahilnu oolagppa genab dooglagnu, ag da am Yawe, ag amunu diignu doyak tutukku aɗaglagnu ele da anam tituanadmi. Da haen oh daami. Kayak laa dayeye, dimppa da ii uɗimi. Iitta! Da haen oh daami. Da malappi, kayak laa ii daama. Iitta! Da haen oh daakkul. Da dakka, da Yawe daattem.

¹¹ Da, yo da, da am Yawe daattem. Da aakkuib, da danab ah padal memananu ehanittak daattem. Laa iitta.

¹² Da, Yawe, da ag Israel, ag padal memananu ehanadkulnu ami. Da anam awoya, da amu hemi. Kayak hambuppuak atu laihnu anam ii heum. Ag Israel, ag, ‘Da am Kayak,’ ag amu anidna malappig amunu, ag laa amelagppa amunu mattiglagnu danab ah dahilad daatteb.

¹³ Ge, keeke laa oh ii dayom haenppa, da Kayak daami. Aɗi da eppelppa daatte amu, aun laa nug amu aɗila aokkute? Da aɗi keeke hettem ele amu, aun laa nug heeb, keeke da hemi ele am eɗua, tatam dayom bia daakkute?” Yawe Nug anam atte.

Kayak nug oo gai-iitta doyaya, oo mekka ehanigtte, amge Israel ag Kayak tutukku ii dim lamidppig

¹⁴ Yawe, Nug ag Juda, ag ahilag qagaiettakppanu eɗua uhuqaknu ehanittak daatte, Nug ag Israel, ahilag Kayak Oppiaawak Ele amu, Nug atte. “Ag Juda, ag Babilon appa diia ukka laih me dayak danab ah daaglag amunu, da ahilagnu dabmak anuqak awewe, da heppi, ban danab laa ag Babilon gona, ban heppeg, Babilon nauhkku. Da heppi, laihnu ban danab ag Babilon eɗadna, ag Babilon danab ah kuɗum aɗualadna heppeg, ag laih gonana, ag gaanna gokkulag.

¹⁵ Da am Yawe, da ag Juda, ahilag Kayak Oppiaawak Ele daattem. Da ag Israel hatten, da ahilag king daattem,” awa atte.

¹⁶ Amu Yawe Nug anukka Israel ag yu mataɗkkulagnu Nug he, le naɗi gamagppa ib dayom. Ao, Yawe Nug Israel ag yu mataɗkkulagnu Nug he, le koɗkoɗ qak ele gamagppa ib aakku dayom.

¹⁷ Nug he, Isip dilag daup ag hos, bannu karisppa ele oippig, amu daup laa oh ele ag ahan, Israel dim lamadppig. Ag dim lamadppig, amge Yawe Nug he, ag nena qena, eɗun ahaglagnu iitta. Ag danab nug amahlak qauhe, iitta mette, ag amubia padal meppig. Yawe Nug keeke amu oh heum ele amu, Nug Juda amelagppa inam atte.

¹⁸ “Ag keeke anukka beppig amu, ag daulag atiaɗ! Ag baubau amunu aib dabmeppig!

¹⁹ Antteg! Da keeke bau hettem. Keeke amuam geha iikku bekkun daatte. Ag iite anidtteb? Da atu taɗakppa ib laa madakkul. Ao, da wan meu waknu nakokib elele, da appa le hadappi gokkulag.

²⁰ Da danab ah dahilad, da ag tituanadmi amu, da ag le lakkulagnu atu taɗakppa le hadakkul. Ao, da danab ah dahilad ag le lakkulagnu, da wan meu waknu nakokib elele, appa da le hadappi gokkulag. Da amu hekkul amunu, doɗ dakkuɗ digdig, doɗ jakal, aria hipunai ele, ag le amu lanana, ag dahilnu oolag gamag ahebeb, ag dahilnu, ‘Ena hen mekkame,’ bia dooglag.

²¹ Da Israel danab ah ag dahil hak ena anidna, ag amunu danab ah laa amelagppa akkulagnu da hei, ag huu laa aakku daan, dahiladnab daatteb.

²² Da hei, ag Israel ag huu anam daatteb, amge ag Israel, ag Jakop buɗub amu, ag da onilppa ii eppig. Ao, ag Israel buɗub, ag hik aqeeqe, da ii dim lamiɗppig.

²³ Ag sipsip aon uɗin, manaknu ofa hena ii meɗappig. Ao, ag binal meɗanna, mana mettak digdig da ii meɗappig. Da ag ee aegnu ofa kuɗum, ag aon da meɗaglagnu ii hemi. Ao, da kalu danab ile muttuɗig enanag bette ele kuɗumnab ag aon, da meɗaglagnu haknunab anak ii mattami.

²⁴ Ag keeke qaittobttob bia diig laa muttuɗig ena ele daden mena aon, da ii meɗappig. Ao, ag mana mettaknu doɗ ittalkad kuɗumnab aon, ittalkad amu da ii meɗappig. Da ag uug anam ii mattami, amge ag hipunin ahilagppa uug okkainab da meɗappig. Ao, da ag uug anam ii mattami, amge ag tappe nak ahilagppa bahi yaak okkainab da meɗappig.

²⁵ ⌊Ag hipunin henana, padal mekkulagnu elele,⌋ amge da, da Yawe, da diilnu dabmak anuqak awewe, da ahilag hipunin uhuqen madattem. Da ahilag hipunin uhuqen matten, da daul atie, baula dab-ii-mettem.

²⁶ ⌊Amge ag amu uutteb dayeb, ag, ‘Ig keeke laa, laa nug amu uhuqa megakkunu ii hemut,’ dabmetteb dayeb amu,⌋ ag hettoɗiak abenppa goppeg daat, ag ahilag oiyak digmakppanu gemu batak appeg doyei! Ag anam heppeg, ag da ele ig amunu nai apput ona, apput doaɗ! Ag ahilag dabmakppa ag eheɗ laa ii heppig, ag amunu appeg doyei!

²⁷ Ag mamelag tatamnu amu, nug hipunin heum. Ahilag ikki danab ag da oɗel tappaeg neum.

²⁸ Amunu da heppi, ag Juda, ag ahilag mana mettak danab amu, danab ah laa ag ahilagnu, ag am keeke hamu bia dooglag. Ao, da heppi, ag Jakop buɗub, ag dahilnuib, dahil pelemppa daaglag. Ge, da heppi, ag Israel buɗub ag uɗa nak nau guittak ele dooglag.” Yawe Nug anam atte.