Aisaia 42 - Nobonob Baibel

Yawenu maɗi nid

¹ Yawe atte. “Antteg! Imuam dahil maɗi nid; da nug haen oh elele daakkunu ɠagattag medattem. Ao, imu amu, da nug tituanmi; da nuhignu enanagnab doottem. Da dahil Ouɗi Nug medappi, dahil maɗi nid nug danab ah oh nai doya mala hettoɗia epeɗia elele mettak kobol ippunadkku.

² Nug ewak laa ii hema. Ao, Nug baag okkaippa ib naɗippa danab amelagppa nai ii mattima.

³ Danab laa elele iitta, qao laa wak ele daatte bia, Nug heeb, nauha autanab ii aoma. Ao, danab laa elele iitta daatte, lam qauhkkunu hette bia, Nug heeb iitta ii mema. Amge nug nai doya mala hettoɗia epeɗia elele mettak kobol am danab ah wan ohppanu tonadkkunu nug oo metta ii uuak kobol dim lamitta heeb bekku.

⁴ Nug amu hekkunu dabmak nug ooppa dayebeb, aɗitai laa ii qeeb nema; nug ooppa ɠagattag ele doyaya, nug uɗat amu ii uuma. Nug heeb, nai doya mala hettoɗia epeɗia elele mettak kobol am danab ah wan ohppa daatteb, ag kobol amu tonatteb oiglag. Danab ah wan miagnu, wan umanu ele, ag nuhig nai amuppanu ena bekkulagnu dabmak aɗan oiglag,” awa atte.

⁵ Kayak, Nug Yawe, Nug hab ha, abenppa me daatte; Ao, Nug wan ele ha, wanppan keeke bau daatteb oh ele heum. Nug wanppan danab ah oh bau dayak madatte. Ao, Nug aun aɗi wanppa oitteb amu, nug ag ouɗi madatte. Amu Kayak, Nug Yawe, Nugib nuhig maɗi nid amegppa geha atte.

^6-7 “Da Yawe, da genab tutukku hak kobol dim lamitten, na oninppa emi. Da ɠagattag ele medakkul. Da na ii uuidpa. Na heppe, ameg gaɗuak danab ag eɗun neegkkulagnu, ao, danab maniguittakppa daatteb, ag dimittim dokkulagnu, ge, danab maniguittak naunab gatatu eleppa daatteb, ag dimittim dokkulagnu, da heppi, na danab ah ag dahil nug tituana nai qakkaknu nai tutukku dim lamidkkulagnu na, da ag ele, ihinig gamag danab daanna, na iitta aɗi ele amahlak madakkut.

⁸ Da am Yawe, amuam da onil. Da uuppi, dahil binag amahlak oppiaawak ele am kayak hambuppuak laa, nuhigppa ii daama. Ao, da uuppi, kayak hambuppuak dottog laa da binal ii aoma.

⁹ Antteg! Keeke da anukka bekkulagnu ami amu, ag aakku beppig. Gemu da keeke bau laanu appi dooglag. Keeke bekkulagnu ii digmeppig ele amu, da ai, ag bekkulagnu daatteb,” awa aum.

Ahi laa, Yawe onig humatte

¹⁰ Ag wan atu ohppan danab ah ag Yawenu ahi bau etteg! Ao, ag wan batakppanu ag ahi ettanna, ag Yawe binag meig! Ag danab ag uubppa yu qaɗeppa oitteb, yuppanu keeke oh ele, ag anam heig! Ag danab ah wan miagnu, wan umanu ele, ag oh Yawe binag maknu ahi bau laa etteg!

¹¹ Ag danab ah atu taɗakppa daatteb, atu taɗakppan keeke oh ele ag baalag okkaippa Yawe binag meig! Kedar buɗub, ag Yawenu oolag gamag ahaɗ! Ag danab ah Sela daatteb amu, ag oo gamag ahak doon, ahi etteg! Ge, ag oo gamag ahak doon, ag qauko attan taadna daanna, ag laa, ag amu dooglagnu baalag okkaippa eig!

¹² Aben amu ohppan danab ag Yawe binag mettanna, ag wan miagnu, wan umanu ele, ag Nug binag okkai metteg!

Yawe Nug danab ah nuhikkud ehanadkku

¹³ Yawe Nug ban danab ɠagattag hette bia haaha, Nug ban haknu abenppa ban hekkunu gokku. Ao, ban danab ɠagattag nug ban elelenab hekkunu nug bannu dabmak nuhig ɠagattag qedatte, amubia Yawe Nug nuhikkud kekeɗ ele ban hekkulagnu bappaidkku. Ban danab nug ban hekkunu huana ette bia, Yawe Nug anam ha, Nug kekeɗ nuhikkud eɗadkku.

¹⁴ Yawe Nug ⌊nuhikkud danab ah Israel, Nug ahilagnu⌋ inam atte. “Haen elabnab da toetten dayeye, ⌊da ahilag kekeɗ ag ag aladppig ele, da ag ii hatti nauhppig⌋. Yo, da dakka oɗel qamute dayeye, ⌊da ahilag kekeɗ, ag ag hatteg nauhppig ele, da ag hadappi nauhkkulagnu ib amu, da oo nein,⌋ hamu daami. Amge gemu amu, da ah nug nid menukkunu wagai maama, ewawa, hik qe, hik huana awawa hette, amubia da uɗat okkai, guittak ele doyeye, ag ehanadkkul.

¹⁵ ⌊Da ag anam ehanadkkulnu hein, danab layag ehanidkkunu keeke kuɗum he nauhakib daatte, amubia⌋ da qauko okkai, amu qauko nakok ele hadappi, ag nauhaknab bena daaglag. Da heppi, ad keeke, ag qaukoppa daatteb amu, ag qaɗaiettaglag. Amu ele da heppi, le, amu le ameg ele ag qaɗaiettaglag.

¹⁶ Da geha dahilad danab ah, ag amelag gaɗuak bia daatteb amu, da ag omaladppi, ib ag anukka ii dooppig ele amuppa gokkunig. Yo, da ag omaladppi, ib ag anukka ii anidppig ele, ig amuppa gokkunig. Da heppi, gatatu ag tonattom daatte amu, gatatu amu oppiak ele dayeb, ag amahlak aoglag. Da heppi, aben qe ta qe nak ele, am uɗem tutukku daakku. Genab, da anam aakku ehanadkkulnu hekkul; da ag iinab uuadpa.

¹⁷ Da anam aakku hekkul, amge danab ag kayak hambuppuaknu oolagppa genab dootteb, ag da heppi nauhna, ag uɗalag nekku. Ao, laa oh ag dottolkad amelagppa, ‘Ag am ihinkad kayak,’ atteb ele, ag da heppi nauhna, ag uɗalag nekku.” Yawe Nug anam atte.

Israel ag amelag gaɗuak, daulag ele ituak daatteb

¹⁸ Yawe Nug anam mattia mala, Nug nai tuɗitta aum. “Ag daulag ituak ele, ag nai doyeg! Ag amelag gaɗuak ele, ag neegna antteg!

¹⁹ Dahil maɗi nid nug ameg gaɗuak ele. Anam amunu, laa nug ameg gaɗuak amu eɗittak daattete? Iitta! Ao, dahil maɗi danab, nai dahil awa gotte ele amu, nug am daug ituak daatte, am laa daug ituak amu eɗittak daattete? Iitta! Danab amu nug dahil danab daatte, amge nug ameg gaɗuak ele, laa nug nuhig ameg gaɗuak amu eɗittak iinab daatte. Ao, da Yawe, dahil maɗi nid ameg gaɗuak ele amu, laa nug ameg gaɗuak amu eɗittak ii daatte.

²⁰ O Israel danab ah, ag keeke kuɗum dooppig, amge ag dooppig ele, ag amunu ii dabmeppig. Yo, ag dooglagnu daulag ele, amge ag da aɗi attem amu, ag dooglagnu uuppig,” awa aum.

²¹ Yawe Nug genab tutukku hak kobol aakkuib haen oh hette, amu Nug amunu dabmak anuqak awawa, Nug heeb, ɗo nuhig am binag amahlak oppiaawak ele dayeb, danab ah oh ag dooglagnu oo dayom.

²² Amge ⌊Israel⌋ danab ah imu amu, laa ag ban hena, ahilag keeke oh aoppig. Ag oh am doɗ pelemppa daatte, ag anam bia daatteb. Ag danab maniguittakppa daatteb, ag amubia daatteb. Ag ban danab ɠagattag ag laa dilag keeke aon gotteb ele, dahilad danab ah ag keeke laa aon goppig ele, ag amubia daatteb. Ag anam daatteb amu, laa nug ag ehanatteb, ag qagaiettakppa ii daamnanu am iitta. Yab danab ag keeke yab aon gotteb amu, dahilad danab ah ag keeke laa yab aon goppig ele, ag anam bia daatteb, amu laa nug, “Ag yab danab, ag eheɗ anam heppig. Ag danab ah amu paɗadppeg, ag eɗun, ag wanelagppa ukkeg!” akkunu iitta.

²³ Ag Juda danab ah, ag oolagppa aun nug uug amunu dabma, butti amu, aɗi kobol bekkunu ele dabma auttanab aokku?

²⁴ Aun nug he, laa ag Jakop buɗub eɗadna diin gokkulagnu elele daatteb? Aun he, ban danab ɠagattag ag Israel buɗub eɗadna, ahilkad keeke, ag ele, ag eppelagppa aɗaglagnu elele daatteb? Am Yawe Nug amu iite heum? Ig Israel danab ah, ig Yawe, nuhigppa hipunin hemut. Nug kekeɗ ehanattomnu diig amu, ig Israel ig Nug dim lamidkkunignu uumut. Israel danab ah ag Yawe ippu ii dim lamidppig. Ag nuhig ɗo tappaeg neum.

²⁵ Israel ag anam heppig amunu, Yawe Nug ahilagnu oo nauhak huanaknab be, Nug he, ban nau ag wanelagppa neum. Ban amuam aab aɗu danab oh diia ewadkkunu hette bia dayom, amge ag nau amu beumnu diig ii dooppig. Ao, ban amuam aab aɗu danab ewa iitta mette bia dayom, amge ag amunu dabmak tutukku ii aoppig.