Aisaia 40 - Nobonob Baibel

Kayaknu danab ah oo mak mattak

¹ Ag ahilag Kayak, Nug atte. “Ag dahilad danab ah oo mak matteg! Ao, ag ɠagattag qatteg!

² Ag baalag bodoettakppa ɠagattag mattanna, dahilad danab ah ag uugppa aakku elele daaeg uɗiom anana, ag Kayak Nug hipunin ahilag uhuqa mattom, ag hipunin heppig, amunu nob amu, Yawe Nug nob amu elelenab aakku ag mattom, ag amu ele appeg doyeg!” awa atte.

³ Doyeg! Da laan baag inam eewo doottem. “Atu taɗakppa ag Yawe uɗikkunu ib babaitteg! Ao, wan meu waknu nakokib elele, appa ag ib tutukku, tak nak iitta ele ihinig Kayaknu babaitteg!

⁴ Ag ib uɗem elele ukkak daakkunu, ag oolnu noak elele mettan, qauko nakok buun, elele mettan, ib qe ta qe nak am ele tutukku elelenab mettan, ib bai biappa gotte am heppeg, uɗem dayaɗ!

⁵ Ag anam heppeg, geha Yawenu binag amahlak oppiaawak ele am miag atia dayebeb, danab ah oh ele anidkkulag.” Yawe Nug anam mattiom daatte amunu, am anam bekku.

⁶ Baag laa aum. “Na nai a!” A amu da ami. “Aɗi nai da madikkul?” Awe ai, amu baag amu da oɗelppa awa aum. “Danab oh ag gikkiɗah bia daatteb, binag amahalak oppiaawak ele ahilkad am bala haɗag bia daatte. Gikkiɗah qaɗaiedatte amu haɗag oh mauɗna, nena qetteb. Na anam aon appe doyeg!” awa aum.

⁷ Anana am tuɗitta aum. “Gikkiɗah bunaɗtte, bala mauɗna, nena qetteb. Aɗinu? Yawe Nug ulah iwale, ahilagppa gotte. Am genabnab genab, danab ah ag gikkiɗah bia paha mauhtteb.

⁸ Gikkiɗah bunaɗtte, bala nena qetteb, amge ihinig Kayaknu nai am hanhan daatte.” Baag anam anana, am da anam akkulnu aum.

⁹ O Sion danab ah, ag nai ena madippeg, laa dooglagnu maɗi ahilagppa daatte, amunu ag qauko laa attan teig! Ao, Jerusalem danab ah, ag nai ena madippeg, laa dooglagnu maɗi ahilagppa daatte amunu, ag qalan, enan mehuqeg! Ag qalan ena akkulagnu aib baɗappig. Ag, “Ahilag Kayak Nug uɗitte,” anana, Juda aab okkai, aab nakok ele ooppan danab ah appeg doyeg!

¹⁰ Antteg! Naɗi Yawe Nug aakku uɗitte. Nug am ɠagattag okkai okkai ele. Nug geha nuhig ɠagattag okkai okkai eleppa danab ah gumadkku. Antteg! Nug nob ena nuhikkud danab ah madakkunu awa uɗitte. Nug geha nob ena danab ah anen anen ag aɗi heppig, amu eleleppa madakku.

¹¹ Amu Nug sipsip gumak danab laa nuhikkud sipsip atognoadtte, amubia nuhikkud danab ah atognoadtte. Sipsip gumak danab nug sipsip nakkud diia, momoppa maatta, gamanattatta, anilkad amu qinonob omalatta gotte bia nuhikkud danab ah dilagppa hette.

Aun laa Yawe bia daatte

¹² Aun yu, le oh ele eppegppa gokkaɗe ukke, gane daatte doyom? Aun nug habnu elab dookkunu nug eppeg melemel daakkunu ha ma ukke, habnu okkai aakku doyom? Aun wan ohnu gappud awa, kalegppa ina aɗom? Aun nug qauko oh dilag uug dookkunu, qauko amu oh skelppa maattom? Aun nug qauko nakok oh dilag uug dookkunu qauko nakok amu oh skelppa maattom?

¹³ Aun laa nug Yawenu dabmak oh anttom? Aun laa nug nuhig ulum mettaknu danab dayaya, ulum nai laa mettom?

¹⁴ Yawe Nug aun nug doyak ena medakkunu oɗ mettom? Aun Yawe ib tutukku ippunittom? Aun nug doyak ena Yawe ippunittom? Ge! Aun nug diignu doyak tutukku awaknu ib oɗe Yawe ippunittom?

¹⁵ Yawenu neekkakppa amu, wan atu oh am keeke nakoknab, le ataɗa nak laippu giɗo nakokppa nette, amubia. Ao, Yawenu neekkakppa wan atu oh am keeke nakoknab, gappud teppu iittanab, skelppa daatte, amubia. Nug nud oh uugnu amu Nug gappud teppu iittanab skelppa daatte, Nug nud oh dilag uugnu anamib dootte.

¹⁶ Danab laa nug tutukku manaknu ofa laa hekku dayeb amu, ad oh Lebanon appa daatteb, am aab amu awa ileb, mana mettak amu eweb iitta mekkunu elele iitta. Doɗ ⌊mana mettaknu elele⌋ appa ana daatteb ele amu, ag ele ebqak ahilag am elele iitta.

¹⁷ Yawe noobppa amu, wan atu oh am keeke ii daatte, amubia daatteb. Ao, Nug noobppa wan atu oh am keeke iitta, hamunab, uɗat mettaknu elele iitta, amubia daatteb. Nuhig neekkakppa wan atu oh am keeke nagnagnag, anttaknu elele iitta bia daatteb.

¹⁸ Kayaknu neekkakppa wan atu oh anam daatteb amunu, ag danab laa anidna, “Kayak Nug danab amubia daatte,” akkulagnu elelete? Iitta! O ag keeke laan dottog anidna, “Kayak Nug amubia daatte,” akkulagnu elelete? Iitta!

¹⁹ Kayak Nug kayak hambuppuak dottog bia iinab daatte. Dottog amuam danab nug uɗat amu haknu doyak okkai ele, nug hette. Nug ha male, keeke golppa hak danab laa nug awa, qaɗeppa gol qataqette. Nug laitta mala, nug silwa awa, sen dottog amu ⌊bala medakkunu⌋ ele hette.

²⁰ O danab nug enub iitta, nug gol, silwa ele awa, nuhig kayak hambuppuak dottog laa metteb hekkunu elele iitta amu, danab amu nug ad ena laa, paha ii beɗatte, nug ad amu awa, danab ad hoyak uɗat haknu doyak okkainab ele mattia antta mette, danab amu nug kayak hambuppuak, nuhig dottog am elele hette. Nug ha mala, nug diig eleleppa dottog amu na qemanu ha, aguppa buuidtte.

²¹ ⌊Danab kayak hambuppuak binag metteb ele ag anam hambuppun hetteb, amge ag wanppan danab ah oh⌋ ag imu iite dooppig? Ag imu iite daulagppa dooppig? Laa nug digmak haenppanu uɗie, gemu ele imunu iite a dooppig? Ge, ag Kayak Nug wan imu heum haenppanu uɗie, gemu ele ag imu diignu doyak tutukku iite aɗappig?

²² Kayak Nug sia kingppa wan imu attan dayaya, wan imu oh gumatte. Danab ah wan imuppa oitteb ele, ag nuhig neekkakppa keeke nagnag, tap bia daatteb. Nug danab lamen okkai naɗi taietta otala mette, Nug amubia hab otala taiettom. Ao, danab nug aguppa daakkunu peh lag nuhig bappaidtte amu, Kayak Nug hab taietta babaittom.

²³ Kayak Nug he, wan imuppan king buɗuppud ag danab hamunab daatteb. Ao, Nug he, wan imuppan okkai ag iitta metteb.

²⁴ Danab okkai amu ag am bala danab ebatte, ag amubia daatteb. Nug eppe, okkai mekkunu haaha, diɗi wanppa digma noono, ulah gakkaɗak uɗia he bunaɗtte, amubia Kayak Nug he, danab okkai amu ag iitta metteb. Ag ulah ee aeg dappunkkeg mawa uma gotte, amubia Kayak Nug he, ag ii daatteb.

²⁵ Kayak Oppiaawak Ele, Nug oɗ madatte. “Ag auntai laa anidna, ‘Kayak Nug danab amubia daatte,’ akkulag? Aun nug da bia daatte? ⌊Amu oh iitta. Laa da bia laa iinab daatte,⌋” awa atte.

²⁶ Ag attan neegna, habppan keeke antteg! Aun nug keeke amu oh heum? Laa Nug keeke amu oh gumaama, Nug keeke amu oh onilkad dootte ele, Nug heum. Nug am ɠagattag okkai naɗi ele amunu, habppan keeke oh am hanhan anamib daatte. Laa iinab qettoɗtte.

²⁷ O Jakop buɗub, aɗinu ag inam atteb? Ao, ag Israel danab ah, aɗinu ag wagai mena, inam atteb? “Yawe Nug dahil ib ii dootte. Ao, Kayak dahil Nug nai doya mala hettoɗia epeɗia elele mettak kobol ii dim lamitta, da ii ehaniɗtte.” ⌊Ag anam atteb, amge amuppa ag eheɗ hetteb.⌋

²⁸ Ag Yawe, Nug Kayak hanhan daatte, Nug wan atu oh, amuppan keeke oh ele heum amu, ag amu iite dootteb? Ag amu daulagppa iite dooppig? Yawe Nug beɗu bahi ii yaatte; beɗu bodo-ii-edatte. Nuhig diignu doyak tutukku amu, laa nug oh dookkunu elele iittanab iitta.

²⁹ Nug danab beɗu bodoettom ele ɠagattag medatte. Ao, Nug danab gai-iitta meum ele he, nug ɠagattag ele daatte.

³⁰ ⌊Wan imuppa uug kuɗum daatteb amunu,⌋ nid bau ag beɗulag bodoetta, gai-iitta mette. Ao! Nid danab ag oinna, beɗulag gai-iitta me, baelkad keeke laala yeeye, taataɗ qena, nena qetteb.

³¹ Anam amge, laa ag Yawenu dabmena, nuhigppa ehanittak aoglagnu dabmena oitteb ele, ag ɠagattag baula aoglag. Ag ai igel hab waappa uug iitta ele hagagaɗa gotte, ag amubia hekkulag. Ag qaiettan oiglag, amge ag beɗulag bahi ii yaama. Ag baelagppa oiglag, amge ag beɗulag bodo-ii-ettama.