Aisaia 39 - Nobonob Baibel

Babilon dilag king nug nuhikkud danab Hesekaia anidkkulagnu uɗippig

¹ Haen amuppa Baladan bekka, Merodak Baladan, nug Babilon dilag king dayom. Nug king dayaya, nug Hesekaia oɗe ma, eɗua ena daye doyom amunu, nug nuhikkud danab laa ag pas laala, keeke ena laa ele ag aon gona, nuhig daakkunu Hesekaia hamu mettaglagnu maatte goppig.

² Ag gona, Hesekaia toppa teeg, Hesekaia nug oo gamag ahe, humattom. Humatta, nuhig en maknu laugppan keeke oh ippuanattom. Keeke amuam silwa, gol, spais digdig ⌊spais am wanila, sinamon, keeke amubia⌋, goɗen enanag, amu nuhig ban haknu keeke oh ele. Keeke oh nuhig en lag anen anenppa dayom amu, nug ag ippuanattom. Keeke oh nuhig lag enanagnab, appa dayom, nuhig ɗo maɗoɗppa ele dayom amu, nug keeke amu oh ippuanattom. Nug keeke laippu laa ii lokkumom.

³ Hesekaia nug anam he, propet Aisaia nug aha, King Hesekaia toppa ukka, oɗ metta aum. “Danab uɗippig ele amu, ag aɗi nai madippig? Ag adeppan uɗippig?” awa oɗ mettom. Aisaia nug anam a, Hesekaia nug aum. “Ag umanunab uɗippig. Ag da aniɗkkulagnu Babilonnu uɗippig,” awa aum.

⁴ Awa a amu, Aisaia nug oɗ mettom. “Ippa nahip lag enanagnabppa ag aɗi anidppig?” awa oɗ mettom. Nug anam oɗ mette amu, Hesekaia nug aum. “Dahil lag enanagnab, ippan keeke oh ag anidppig. Da keeke laippu laa, dahil en lakka daatte amu, da keeke anam laa ii lokkummi. Da dahil keeke oh ippunadmi,” awa aum.

⁵ Nug anam a amu, Aisaia nug Hesekaia amegppa aum. “Na Yawe Nukka Ɠagattag Oh Ele, na nuhig nai doye! Nug atte.

⁶ ‘Haen laa genab uɗikku, haen amuppa amu, nahip lag enanagnab, ippan keeke, keeke oh na mamenad aɗi ag qagmeppig ele, Babilon danab ag uɗin, keeke amu akkan aon gona, Babilon mekkulag. Keeke laippu laa ii daama.’ Yawe Nug anam atte.

⁷ Am keeke laa amu, na buɗunppan laala, ag na tiinppanunab dokkulag amu, Babilon ag nid amu oolagppan nid danab laala ag akkan gona, ag hipalkad aqappeg, ag anam daanna, ag Babilon dilag kingnu maɗi nid daaglag.” Aisaia nug Yawenu nai anam Hesekaia amegppa aum.

⁸ Nug anam a, Hesekaia nug nuhig dabmakppa, “Dahil haenppa ig maɗoɗ, baɗak ele iitta daagnig,” dabmeum amunu, nug eɗua Aisaia amegppa aum. “Na Yawenu nai da meɗame ele, nai amuam nai ena,” awa aum.