Aisaia 38 - Nobonob Baibel

Hesekaia nug oɗe ma, mauhkkunu miag dayom

¹ Haen amuppa amu, Hesekaia nug oɗe ma, nug mauhkkunu miagnab dayeye, Amos bekka propet Aisaia nug aha, gumitta ukka, amegppa aum. “Yawe Nug atte. ‘Na mauhkkut amunu, na nahip keeke oh bappaidna, na mauhkkut. Na eɗun ena ii daamna,’ ” awa aum.

² Aisaia nug Hesekaia amegppa anam a, Hesekaia doya, nug eɗua, laug gililppa neekkakka, nug Yawe unuqitta aum.

³ “O Yawe, na dahil hak imu dabmekkutnu oɗ medattem. Da na noomppa oo metta ii uuak kobol dim lamitte oiyeye, da meul ohppa na dim lamidkkulnu heine oiyeye, da amenppa kobol aɗi aɗi am ena, da amu dim lamidmi.” Hesekaia nug anam unuqittowa, nug huana gayom.

⁴ Hesekaia nug amu he, Yawe Nug nuhig nai imu Aisaia mettom.

⁵ “Na gona, Hesekaia amegppa inam appe doyaɗ! ‘Yawe, Nug am na alan Dawitnu Kayak amu, Nug atte. “Da unuqittak nahip doyen, nahip gayak ele doomi. Da bau dayak nahipnu haen tuɗidppi, na paha ii mauhmana. Iitta. Na maɗ 15 baula daakkut.

⁶ Laa amu da heppi, Asiria dilag king nug aab imu ii eɗidma. Da ag Juda, da ag ehanadppi, aab okkai imuam Asiria dilag king eppegppa ii daama,” ’ ” awa aum.

⁷ Yawe Nug anam a, Aisaia nug Hesekaia amegppa anam awowa, nug nai tuɗitta aum. “Yawe Nug aɗi hekkunu nai anan qakkom amu, Nug genabnab genab nuhig nai heeb bekku ippunidkkunu amu, Nug at laa medakku. ⌊Nug at amunu inam atte.⌋

⁸ ‘Antte! Haen doyaknu adqaɗ Ahas heum, amuppa aam amahalele, lokko noum, am adqaɗ amunu tappa ukkak 10 eɗua tekku.’ ” Yawe Nug anam aum. Nug anam ana amu, Nug he, lokko am eɗua teete, adqaɗ tappa ukkak 10 lokko dayom eleppa am ii dayom.

⁹ Yawe Nug anam ha, Hesekaia ehanitte, Juda dilag king Hesekaia eɗua ena daya, Nug ahiettak imu yom.

¹⁰ “Da ⌊oɗe mein, da⌋ inam ami. ‘Da danabnab dayeye, da kaino ii memi, haen imuppa da mauhkkulnu daattem. Da keeke okkainab, uɗat laa, uɗat dahil laa oh eɗittak hekkulnu daattem, amge yab danab laanu keeke yab aotte, amubia mauhak am dahil haen yab aweb, da mauhen, uɗat amu ii hepan daattem.

¹¹ Da mauhen, da baula Yawenu uɗat okkai okkai wan imuppa ii anidpa. Da mauhen, da wan imuppan danab ah baula ii anadpa, danab ah gemu wan imuppa daatteb ele, da ag ele baula ii qagmemata.

¹² Danab nug peh lag aɗe na ii daatte, amubia dahil bau dayak am iitta mekkun hette. Danab nug lamen otala hamu agakkunu masinppanu otaɗa aɗe, appa ii daatte amu, dahil bau dayak am anambia iitta mekkun hette.’ Da anam ainne, da, ‘Yawe Nug he, da mauhkkulnu hettem,’ ami.

¹³ Laion nug danab ebehi oh he qiie, danab nug gayaya daatte, amubia da gaai ukke, wakkaɗom. ‘Da Yawe Nug he, da mauhkkulnu hettem,’ ami

¹⁴ Da ai laala, ahilag gayak oqotti teppu iitta ele, da anambia gaami. Uppuɗil beɗulag nakok laa, nug nakok gaatte, da anambia gaami. O Kayak, da gaai ukke, nahip ehanittak anidkkulnu nahipnu neekki, da amel guittom. Da uug doottem. O Naɗi, na uɗin, da ehaniɗkkutnu od medattem.

¹⁵ Da anam ainne, ⌊gemu⌋ da aɗi akkul? Yawe Nug anam he, kobol dahilppa beum am aakku beum. Uug dahilppa be, ⌊amuppa da doyak aomi⌋ amunu, da dahil bau dayaknu maɗ ohppa amu, da dakka da onil qeppi neeb oikkul.

¹⁶ O Naɗi, nahip ehanittakppa danab ah ag bau daatteb. Nahip ehanittakppa da ele bau daattem. Na he, oɗe dahil iitta meum. Na he, da ii mauhmi, da eɗuen bau daattem.

¹⁷ Am genab, da ehaniɗkkutnu na uug naunab dahilppa bekkunu ib oo ii neme. Na dahilnu oot mauhe, na dahil hipunin oh uhuqna meɗe, iitta mena, da beɗulppa iinab daatteb amunu, na ehaniɗe, da padal ii memi.

¹⁸ Aɗinu ⌊na ehaniɗe, da ii mauhmi⌋? Laa mauhppig ele ag na onin okkai mettan, ⌊ag baelkadppa aɗi amelagppa⌋ nahip ehanittaknu akkulagnu elele iitta. Ao, laa mauhppig ele ag na binan human, nahip ehanittak okkainu ⌊laa dooglagnu⌋ ahi ettaglagnu elele iitta. Laa boumaknu moɗppa niitteb ele amu, ag ⌊wan imuppa oinna,⌋ nahip layag oo metta ii uuak kobol na dim lamidnana, ehanittak mettaglagnu dabmekkulagnu elele iitta.

¹⁹ Danab bau daatteb, ag na onig okkai medatteb, ag ⌊baelkadppa aɗi amelagppa⌋ da gemu hettem bia, ag nahip ehanittak okkainu maditteb. Mamelkad ag nid naunau ahilkad amelagppa layag oo metta ii uuak kobol nahip na dim lamidnana, danab ah ehanadtteb ele amu, ag amunu ag amelagppa maditteb.

²⁰ Yawe Nug ehaniɗe, da ii mauhmi amunu, ig bau daattem ele, ig haen amu ohppa nuhig mettid lagppa Nug onig humagnignu musik gitappa, amu keeke gita biappa hetat daagnig.” Hesekaia nug ahiettak anam yom.

²¹ ⌊Amge tatam, haen Aisaia nug Hesekaia amegppa nug eɗua ena daakkunu aum amu, haen amuppa⌋ Aisaia nug ⌊amu bekkunu inam ele⌋ aum. “Ag ad fig meu aon bappaidna, mamattin qaɗeppa meppeg, nug eɗua ena daakku.”

²² Amge tatam Hesekaia nug Aisaia inam oɗ mettom. “Yawe Nug da geha eɗue bau mein, nuhig mettid lakka gokkulnu aum amu, nug geha at aɗi, da nai amuam genab bekku dookkulnu meɗakku?” awa oɗ mettom. ⌊Nug anam oɗ mette, Yawe Nug he, lokko adqaɗppa dayom, lokko amu aben dayomppanu eɗua teum.⌋