Aisaia 37 - Nobonob Baibel

Hesekaia nug Aisaia ulum nai medakkunu oɗ meum

¹ Danab amu ag King Hesekaia amegppa Asiria dilag ban daup ikkinu nai amu nug amegppa aeg doya, Hesekaia nug lamen nuhig patiɗa, nug lamen heɗiag ele takka, nug aha, Yawenu mettid lakka ukkom.

² Amu nug Eliakim, nug kingnu lag enanagnab gumom, Sepna, nug am nai yaak danab, amu mana mettak danab anuqak ele ag oh lamen heɗiag ele maadna, ag ahan, Amos bekka, Aisaia toppa gokkulagnu a, ag goppig. Aisaia nug am propet.

³ Ag gona, ag Aisaia amegppa appig. “Hesekaia nug inam atte. ‘Gemu am deɗ nau, uug nau tonikkaknu deɗ. Deɗ imuppa ig Yawenu daug batak aottem. Ig gemu uɗa nak nau guittak ele doottem. Amu ig ah laa, nuhig haen iitta me, nug nid aokkununab daatte, amge nuhig ɠagattag iitta me, nug nid aokkun elele iitta, ig anam bia daattem.

⁴ Asiria dilag king nug he, nuhig ban daup ikki banppa o ban guguittakppa daatte, nug Kayak hanhan bau daatte awa awa qedakkunu uɗia, ⌊anam heum⌋ amunu Yawe, Nug nahip Kayak, Nug awa awa qettak nai amu Nug doyom ele, Nug nai amu dabmedakkutai. Nug dabmedatta, Nug Asiria dilag king bu medakkutai. Anam amunu, na ig Juda oɗo yaak daattem ele, na Yawe Nug ehanigkkunu unuqidkkutnu oɗ medattem,’ awa atte, aon appig.”

⁵ King Hesekaianu ehanittak anuqak danab amu ag Aisaia gumidna gona, anam aeg amu,

⁶ Aisaia nug ag amelagppa aum. “Ag eɗun gona, ahilag King Hesekaia amegppa inam appeg doyaɗ! ‘Yawe Nug atte, “Asiria dilag king nug he, danab laa ag nug waappa daatteb ele, ag uɗin, nai laa mattieg doome. Amu nai ag madippig amu, na nai amunu aib baɗame. Asiria danab amu ag nai amuppa dahilnu dabittak nai madippig.

⁷ Antte! Da heppi, Asiria dilag king, nuhig dabmak am kaboliak daakku. Nuhig dabmak am anam daakku amunu, nug nai laa doyowa, nug eɗua, nuhig wanppa ukkeb, appa da heppi, laa ag nug qep-ppa, qeppeg mauhkku.” ’ Yawe Nug anam atte,” awa aum.

Asiria dilag okkai nug Jerusalem heeb nauhkkunu eɗua aum

⁸ Anam ba ukke, Asiria dilag ban daup ikki banppa o ban guguittakppa daatte, nug Asiria dilag king nug Lakisnu aha, Lipna ukka, appa dayomnu nai doyom amunu, nug aha ukka, nug king am Lipna appa ban heehe anttom.

⁹ Amu Isip dilag king onig Tiraka, nug Kus danab, nug Asiria ele ban hekkulagnu dabma uɗieye, Asiria dilag king Senakerip nug amu doya, nug nai laa Hesekaia dookkunu, nug nuhig maɗi oiyak danab laala Hesekaia toppa gona, nai amu mettaglagnu maatte goppig. Nai ag Hesekaia mettaglag, nai amuam inam.

¹⁰ “Ag Juda dilag king Hesekaia amegppa inam aig! ‘Na Kayak laa, na nuhigppanu ehanittak aon, ena daakkutnu dabmettem amu, na Kayak amu buppuidmanu dabme! Kayak amu Nug na amenppa, “Da ehanidppi, Asiria ag Jerusalem ii eɗidmana. Ag Jerusalem ag Asiria eppelagppa ii daamna,” atte, amge amuam genab iitta.

¹¹ Na ig, Asiria dilag king, na ig wan laa ohppanu danab ah eɗadtata, heut nauhna autnanab aoppig doon malame. Amu Kayak nahip Nug na ehanitteb, ig nahipnu ele anam iite hekkunig?

¹² Da mamelad aɗi ag Asiria dilag king daappig amu, ag henan, wan kuɗum eɗadna heeg, nauhna autna aoppig, wan amunu kayak laa nug ag ehanatte ena daappigte? Iitta! Wan amuam Gosan, Haran, Resep, amu Iden danab ag Telasar daappig.

¹³ Ge, Hamat dilag king, o Arpat dilag king, o aab okkai Separwaim dilag king, o Hena dilag king, o Iwa dilag king, king amu oh gemu adeppa daatteb?’ ” Asiria dilag king nug nai amu Hesekaia dookkunu me ukkom.

Hesekaia unuqittom

¹⁴ Amu Hesekaia nug uɗug yaak amu danab amu eppelagppanu awa, ebqa malowa, nug aha ukka, Yawenu mettid lakka ta, nug uɗug yaak amu Yawe amegppa kola meum.

¹⁵ Hesekaia nug kola me dayeye, nug Yawe inam unuqittom.

¹⁶ “O Yawe Nakka Ɠagattag Oh Ele, na Israel dilag Kayak, na Tituanak Nainu Kunupnu engel okkai-kerubim aɗit dottolah gamalahppa sia king nahip-ppa daattem. Na hab, wan ele hatame. Yawe, na aakkuib am wan ohppan Kayak daattem.

¹⁷ O Yawe, da na Asiria dilag king Senekaripnu nai doon, dabmekkutnu ool daatte. O Yawe, na neegna, Asiria ag aɗi hetteb anidna dabmekkutnu oɗ medattem. Asiria dilag king Senakerip nug na, na Kayak bauklel ele, nug na awa awa nittak naunab nidakkunu nai me uɗiom amu oh, na amu neegna anidna doon, dabmekkutnu oɗ medattem.

¹⁸ O Yawe, Asiria dilag king ag wan amu oh heeg nauhaknab daaeg, appa danab ele hatteg nauhppig amu, nai nuhig amuam genab.

¹⁹ Genab, ag wan amu ohppan kayak am akkaeg, aab aɗuppa teeg ewatte, iitta meppig, amge ag amu heppignu diig am, kayak amu, ag am kayak genab iitta; ag am men, ad ele hoiyak aakkuib. Danab ag kayak amu eppelagppa heppig.

²⁰ Ag kayak hambuppuak amu dilagnu anam heppig amunu, O Yawe, ihinig Kayak, na wan atu ohppan danab ah ag na, O Yawe, na nakka, na Kayak daattem dooglagnu, na ig Asiria dilag king eppegppanu awigppe, ig ena daagnignu od medattem.” Hesekaia nug anam unuqittom.

Hesekaia unuqitte, Aisaia nug Yawenu nob mak nug mettom

²¹ Hesekaia nug anam unuqitta male, Amos bekka Aisaia nug nai imu Hesekaia dookkunu me ukkom. “Yawe, Israel dilag Kayak, Nug inam atte. ‘Na Senakerip, Asiria dilag king, na nuhig nainu da unuqiɗme amunu,

²² da Yawe, da Senakeripnu nai uug elenu inam mattimi daatte. “Sion danab ah ag nahipnu ena iinab doon, ag aon aon nittaglag. Na oolna gobeppe, Jerusalem danab ah ag imidkkulag.

²³ Na aun aon aon qettan, nuhignu dabittak nai ele mattime? Na aun qattiɗ qettame? Na aun noobppa, da na eɗitten oittem bia oime? Na kobol nau amu oh da Yawe, da Israel dilag Kayak Oppiaawak Ele, na dahilppa nau amu oh heme.

²⁴ Na he, nai awa ukkak danab nahipad ag da, da Naɗi, ag da aon aon naunab iuppig. Na amu hena amu, na inam ame. ‘Da bannu karis kuɗumnab dahilppa da wan oh eɗadmi; danab nug Lebanon qauko okkai okkai igippa ta, ad sida elab elab, laa oh eɗattak, amu ad pain enanag, nug ad amu okkula aotte, da amubia hemi. Da danab nug qauko attannab, laa oh eɗattak, danab laa appa ii oitte bia, appa ad enanagnab daatteb, nug aguppa ta, ad okkula aotte, da amubia hemi.

²⁵ Da wan digdigppa, anukka ag am dahil wan iitta, da appa le moɗ awen, le amuppanu lami. Da hei, Isip wanppa le naunau qaɗaiedappig.’ Na anam ame.

²⁶ Senakerip, na anam ame, amge na nai imu iite doome? Anukkanab da Yawe, da keeke amu bekkunu tituanmi. Anukkanab da maittak amu aomi. Da amu hemi amu, gemu da hei, aakku beum. Ao, da hei, na amu oh henana, na hee, aab okkai ɠagattag aɗ ele am loppaɗattak, kinipan ameg okkai hume tak daatteb.

²⁷ Appan danab ah ag ahilag ɠagattag iitta me, ag oolag uug nau qe, ag uɗalag neum. Ag am datta keeke eppak, keeke amu digma baaba, gai-iitta daatte bia daappig. Ao ag gikkiɗah aben laa wan teppu iittanabppa appa be, ulah gakkaɗak nau uɗia he, okkai ii meum haenppa bunaɗtte, ag amubia daappig.

²⁸ Na hee, ag anam daappig, amge na adeppa daattem amu, da doottem. Na ahan laih gottem amu, da doottem. Na eɗun uɗittem amu, da doottem. Da amu oh doyen, da na dahilnu oppoɗi bak huanak doottem amu, da doottem.

²⁹ Ao, na dahilnu oppoɗi bak huanak doonna, na dada hak kobol ele dim lamidttem amu, da amu doottem. Da amu doottem amunu, diig amunu da heppi na uɗimeppa eɗun, na wanenppa gokkut. Da danab nug makau dawai noobppa aen huk ma, makau amu huk amuppa omala laih laih gotte bia, da nahip-ppa hekkul. O da danab nug aen maha hos oɗeppa ma he, hos laih laih gotte, da amubia nahip-ppa hekkul.” ’ ” Yawe Nug Senakeripnu Aisaia oɗeppa Hesekaia amegppa anam mattiom.

³⁰ Yawe Nug Senakeripnu Aisaia oɗeppa anam mattia male, Aisaia nug Hesekaia amegppa inam aum. “O Hesekaia, imuam na anidna, Yawenu nainu ootppa genab dookkunu at daakku. Gemu, maɗ imu amu, na aɗi keeke anppa nukka beum am lakkut. Maɗ imu uueb, maɗ laappa na aɗi keeke meu amuppanu nukka bekku amu, na maɗ amuppa ee amu lakkut. Amge maɗ amu uueb, maɗ amuppa na wit keeke ebappe ba, meu okku amu, na lanan daakkut. Na grep dadppa muɗi grep ebappe ba, meu oobob lakkut.

³¹ Juda danab ah oɗo yaak daaglag amu, ag gikkiɗah keeke, hiɗaeg be, wanppa niiaya, diɗi eɗua wan ooppa noa he, gikkiɗah eɗua bau dayaya meu otte, Juda amubia baula appatna, ena daaglag.

³² Keeke amuam anamnab aakku bekku. Aɗinu? Oɗo yaak danab ag Jerusalem appa bau daaglag. Ao, qauko Sion appanu danab ah laippu laippu, ag ii mauhmana; ag bau daaglag. Yawe Nukka Ɠagattag Oh Ele, Nug amu bekkunu yag-nab-bak dootte amunu, Nug heeb bekku,” awa aum.

³³ Anam bekku amunu, Yawe Nug Asiria dilag kingnu inam atte. “King amu nug aab okkai Jerusalem imu ooppa ii uɗima. Nug lat doɗo ele eeb, ippa ii uɗima. Nug guppiɗ aɗa aab okkai imu ele ban hekkunu ii uɗima. Nug ippa uɗia heeb, nuhikkud daup ag aab imunu aɗ letaglagnu wan aɗ dimittim qagmebeppeg ii tema.

³⁴ Nug ib laa aɗa uɗiom amu, nug anamib eɗua gokku. Nug aab okkai imu ooppa ii uɗima.

³⁵ Da aab okkai imu ehanitte, guppiɗ bia daabppi, ena daakku. Da, da laa ag dahilnu dabmak pehettak iitta aomnanu, da amunu dabmak anuqak awewe, aab imunu guppiɗ dayeye, da dahil maɗi nid Dawit amegppa keeke laa hekkulnu ami amu, da amunu ele dabmak anuqak awewe, aab imunu guppiɗ daakkul.” Yawe Nug anam atte.

Asiria dilag king Senakerip nug mauhom

³⁶ Yawe Nug anam aum dimppa nuhig engel nug aha ukka he, Asiria dilag daup daappig ele, ag oolagppanu danab 185,000 ag mauhppig. Ag mauheg, wagɗe buttua laa ahan, danab gaɗalag amu huanaknab niiegeg anadppig.

³⁷ Anam amu, Asiria dilag king Senakerip nug he, nuhikkud daup ii mauhppig ele ag ahan, eɗun ag wanelagppa goppig. Ag gona, Senakerip nug nug wanebppa aab okkai Niniwe, nug appa dayom.

³⁸ Nug appa dayaya, deɗ laa nuhig kayak hambuppuak onig Nisrok, nug nuhig mettid lag, appa nug nug noobppa dup noa binag meeme, nug bekoɗ aɗit, Adramalek, Sareser ele, aa qep elabppa aa mamelah qeeh mauhom. Mauhe, bekoɗ aa oolya, wan laa onig Ararat, aa appa goya daapiɗ. Aa appa daapiɗ amu Senakerip bekka laa onig Esarhadon, nug mameg abenab awa, Asiria dilag king ba dayom.