Aisaia 36 - Nobonob Baibel

Asiria dilag king Senakerip nug Jerusalem eɗidkkunu heum

¹ Hesekaia nug Juda dilag king dayaya, nuhig king dayaknu maɗ 14ppa Asiria dilag king Senakerip, nuhikkud ban danab ele ag banelag uɗin, Juda eɗadnana, ahilkad aab ɠagattag aɗ ele amu oh aoppig. ⌊Amge aab okkai Jerusalem amu, ag amu ii aoppig.⌋

² Asiria dilag king nug eɗatta haaha, Lakis appa ban haaha, nug he, nuhig ban daup ikki banppa o ban guguittakppa daatte, ban daup ameg naɗi ele ag Lakisnu ahan, King Hesekaia gumidna, Jerusalem goppig. Ag gona, Jerusalem gukkuidna tena daappig. Ag tena daappigppa am le ippu laa dayom. Le am le ameg nakok attannu le ippu amuppa noa, aab ooppa ukkom. Appa laa ag lamen hekkulagnu henana, lamen tatam ihona heppig amu, ag appa ihappig. Ban daup ikki, daup ele ag ib aben amuppa gotte ele, ag ib amuppa daappig.

³ Ag anam daaegeg, Hesekaia nug nuhikkud ehanittak anuqak danab ewam maatte goppig; amuam Hilkaia bekka Eliakim. Nug am kingnu lag enanagnab gumom. Laa am Sepna. Nug am nai yaak danab. Laa amu, am Asap bekka, Joa. Nug am yaak danab dayom.

⁴ Haen danab ewam amu ag gona, Asiria gumadna teeg, Asiria dilag ban daup ikki banppa o ban guguittakppa daatte nug ag amelagppa aum. “Ag Hesekaia amegppa inam aig! ‘Nai imuam king okkai okkai, Asiria dilag king, nuhig nai. Nug nahipnu inam atte. “Na ootppa ɠagattag qak doottem, amge na diig attemun dabmak amu aottem?

⁵ Na, da ban hekkulnu maittak ena aomi, daup dahil ele am ɠagattag ele, dabmettem, amge amuam dabmak meu iitta; am dabmak hambuppuak. Na aunnu dabmettem amunu, na da waalppa daakkutnu uun, dahil nai tappae ne oittem?

⁶ Antteg! Isip am dudqak hokkat nau, qao aoɗakppa hak bia daatte. Danab nug dudqak hokkat amu eppegppa aɗa, dud qa oikkunu heebeb, hokkat amuam eppeg yaakku. Isip anam daatte, amge na ag na ehanidkkulagnu dabmettem. Aun aɗi ag Isip ehanadkkunu dabmetteb ele amu, Isip dilag king Paro, nug ahilagppa dudqak hokkat anambia daatte,” ’ ” awa aum.

⁷ Amu Asiria dilag ban daup ikki banppa o ban guguittakppa daatte nug anam awowa, nug nai tuɗitta aum. “Amu ag inam da amelppa akkulagtai. ‘Ig Yawe, Nug am ihinig Kayak, ig Nug ehanigkkunu dabmettem.’ Ag anam akkulagtai, amge Hesekaia nug ag Juda danab ah oh, laa Jerusalemnu, laa Juda wanppa laih laihnu amu, nug ag amelagppa, ‘Ag qaɗab laippu, Jerusalem iikku daatte, qaɗab amuppa aakkuib ag Yawe noobppa dup nona binag mekkulag, laa ohppa am iitta,’ awa ana he, ag Kayak amunu qaɗab, nuhig aabaabppanu mettid lag nakok ele iite hatteg nauhppig?” awa aum.

⁸ ⌊Asiria dilag ban daup ikki banppa o ban guguittakppa daatte nug anam anana, nug tuɗitta, Juda awa awa aqatta, inam aum.⌋ “Ahappeg! Ag dahil naɗi, Asiria dilag king, ag nug ele nai qakkeg! Ag amu hekkulag dayeb amu, da hos 2,000 ag madakkul, amge ag Juda ag danab 2,000 hos amu attan daan gona, ban hekkulagnu anadkkulagnu elelete?

⁹ Ag am elele iitta. Ag Isip ag daup bannu karis attan daan ban hetteb, daup ag hos attan daan ban hetteb ele maadppeg uɗin, ehanittak mattaglagnu dabmetteb, amge amuppa ag ehanittak ii aomna amunu, ag Asiria dilag ban daup ikki laa, nug Asiria dilag ban daup ikki oolagppa nakok daatte amu, ag nug eɗidkkulagnu amu, ag attem hena eɗidkkulag? Iitta.

¹⁰ Keeke laa amu, Yawe Nug iite a, da banelag uɗien, wan imu eɗitten, heppi nauhkkulagnu uɗimi? Nug a, da amu hekkulnu aakku uɗimi,” awa aum.

¹¹ Asiria dilag ban daup ikki banppa o ban guguittakppa daatte nug Hibru naippa anam a, Eliakim, Sepna, am Joa ele ag nug amegppa appig. “Ig, ig am nahipad maɗi nid, ig Aram dilag nai doottem amunu, na Hibru naippa madippe doognignu oonig ii daatte. Ihinig danab ag aab okkainu aɗppa daatteb, Aram nai ii dootteb ele, ag nahip nai doomnanu na Aram dilag naippa ig ele nai mattignignu oɗ medattem,” aon appig.

¹² Ag anam appig, amge Asiria dilag ban daup ikki banppa o ban guguittakppa daatte nug aum. “Dahil king nug da Juda danab oh amelagppa nai madippi dooglagnu meiɗe uɗimi. Nug da ahilag okkai nug, aria ag laa, nug ag maatte uɗippig ele, nug da ag aakkuib amelagppa nai madikkulnu meiɗe ii uɗimi. ⌊Ag dahil okkainu nai ii dim lamidkkulag dayeb amu, nug heeb, haen elab iitta,⌋ ag Juda danab okkai hekkulag bia, danab aɗppa daatteb imu oh ag ele ahilag biiak, ahilag hippuɗak ele lakkulag,” awa aum.

¹³ Nug anam ana, nug hibaitta, Hibru naippa baag okkaippa ewa, inam aum. “Ag Juda danab ah, ag king okkai naɗi, Asiria dilag king, ag nuhig nai doyeg!

¹⁴ Nug inam atte. ‘Hesekaia nug hambuppualadmanu ag dabmeig! Aɗinu? Nug ehanatteb, ena daaglagnu elele iitta.

¹⁵ Hesekaia nug ag amelagppa atte. “Yawe Nug ehanikkeb, ig ena daagnig. Nug heeb, Asiria dilag king nug aab okkai imu ii eɗidma. Ig nug eppegppa ii daamta,” awa atte. Nug anam atte, amge ag nuhig nai amu dabmenana, oolagppa genab aib dooppig. Yawe Nug ii ehanadma.

^16-17 Ag Hesekaianu nai aib dooppig; aib dabmeppig. Iitta!’ Anam amu ag Asiria dilag kingnu nai dabmekkulag am ena. Nug atte. ‘Ag dahil nai doon, ag da waalppa daaglagnu anana, ag dahilppa uɗippeg, ag oh ippa daanna, ag ee ahilag wanppa bette ele, amuam grep meu, ad fig meu ele amu, ag amu, le oug ahilag ele lanana daaglag. Ag anam daanna labeppeg ukkeb, da eɗuen uɗien, da omaladppi, ag gona wan laappa, wan amuam ahilag wan imubia, da omaladppi gona, aguppa daaglag. Wan amuppa ee aeg, amu muɗi grep ele betteb. Ao, appa ag ee, wain bau ele elelenab aoglag.

¹⁸ Hesekaia nug, “Yawe Nug ehanikkeb, ig Asiria dilag king eppegppa ii daamta,” awa atte, amge nug ag hambuppualadmade dabmeig! Wan laappan kayak nug ag ehanatte, ag Asiria eɗadna, ag eppelagppa ii daappigte? Iitta!

¹⁹ Danab ah Hamat, Arpat ele daappig amu, ahilag kayak gemu adeppa daatteb? Danab ah ag Separwaim daappig amu, ahilag kayak ele adeppa daatteb? Amu Samarianu danab ah ele, ahilag kayak ag da wan amuppan danab eɗadkkulnu elele iitta daakkulnu ehanatteg, qagaiettakppa ii daappigte? Iitta!

²⁰ Kayak amu oh am ahilkad danab ah ehanadppeppeg, ena daaglagnu elele iitta daappig. Kayak amu ag ahilkad danab ah ehanadppeg, da ag ii eɗadpanu elele ii daappig. Anam amunu, Yawe Nug ag Jerusalem daatteb, Nug ag ehanatteb, ag da eppelppa iite daamna? Iitta,’ awa atte.” Asiria dilag ban daup ikki banppa o ban guguittakppa daatte nug anam nuhig okkai oɗe awowa, anam awa aum.

²¹ Asiria dilag ban daup ikki amu nug anam aum, amge Juda danab ag nuhig nai dooppig ele, ag nob laa ii medappig. Hesekaia nug ag nai nob ii memananunab aum amunu, ag ii heppig.

²² Asiria dilag ban daup ikki amu nug anam mattia male, Hilkaia bekka Eliakim, nug am kingnu lag enanagnab gumom, Sepna, nug nai yaak danab, aria, Asap bekka Joa, nug am yaak danab dayom amu, ag oh ahilkad lamen pattiɗadna, ag eɗun Hesekaia toppa gona, ag Asiria daup dilag okkainu nai oh nug amegppa mattieg doyom.