Aisaia 35 - Nobonob Baibel

Qagaiettakppanu eɗua uhuqak mattaknu gamag ahak okkainu nai

¹ ⌊Amu Aisaia nug haen laa dimppa, haen amunu nug inam aum⌋. Dimppa amu, atu taɗakppa, amu atu taɗak huana qaɗaiedatte ele amu, aben amuppa wanppan keeke oh ena beppeg, gamag ahak daakku. Ao, wan meu waknu nakokib elele, wan amuam gamag ahak daakku. Amu appa, bala onig lili mappatadtteb bia, bala huan mappatadkkulag.

² Keeke kuɗumnab atu taɗak appa mappatadppeppeg, wan amuam bala mabatak ena ele, amubia enanag daakku. Wan amunu keeke oh danab nug oo gamag ahak doyaya, baag okkainab ele ahi edatte, amubia wan amunu keeke oh ag danab daaloblob am gamalag aheb, ahi ettalob. Yawe Nug heeb, gemu laih atu taɗak daatte amu, atu amu qinob Lebanon wan binag ele daatte, am binag amubia ele daakku. Ao, Yawe Nug heeb, atu taɗak amu, am qauko Karmel, uɗem naɗi onig Saron ele, aa aben enanagnab, onig ele, am wan amubia daakku. Yawe Nug heeb, atu amu anam bekku amunu, danab ah atu ohnu ag anam anidna, ag Yawenu binag amahlak oppiaawak ele anidkkulag. Ao, ag Kayak, Nug am ihinig Kayak, ag nuhig ɠagattag okkai naɗi ele anidkkulag.

³ ⌊Anam bekku amunu, ag dahil nai doon, Yawenu oolagppa genab dootteb ele,⌋ ag danab ah ag dabmak ahilagppa, “Ig ebehinig iitta,” doon, ag ahilag dabmakppa, “Ig am gai-iitta daattem,” ele doon oitteb amu, ag ag ehanadna,

⁴ ag danab ah ag baɗan oitteb ele amelagppa inam appeg doyeg! “Ag ɠagattag dayeg! Ag aib baɗappig! Ahilag Kayak Nug ag ehanadkkunu uɗia, kekeɗ ahilkad amu, Nug ag eheɗ heppignu nob tutukku madakku. Nug uɗia, ahilkad kekeɗ nob madatta, bu nau madakku. Nug ag ehanatteb, padal ii memananu uɗikku.” Ag anam aon aig!

⁵ Amu Nug uɗia anam heebeb, danab amelag gaɗuak ele ag neegkkulag. Danab daulag ituak ag geha eɗun nai dooglag.

⁶ Danab ag baelag laih nauhak ele, ag tappan gonana, oolna tena oolna nenana, ahi ele goɗappeg, danab ah ag oɗelag qamutak ag geha nai mattinna, oo gamag ahak okkai doon, ewak okkai hekkulag. Yawe heeb, wan meu waknu nakokib elele, appa le okkai huanak daakku. Ao, atu taɗak, appa lenag kuɗum daaglag.

⁷ Anam amunu, geha atu taɗakppa ihi huana gakkaɗtteppa ele, amuppa le ameg daakku. Ao, wan qaɗaiettaknabppa, le okkai qeppuɗia bekku. Amu aben qaɗaiettak, doɗ jakal ag daanna oippigppa amu, geha gikkiɗah, qao, papairus ele bekkulag.

⁸ Amu Yawe heeb, wan enanag dayeb, amuppa ib naɗi enanag ele daakku. Ib amu onig am Danab Oppiaawak Ba Daakkunu Ib. Danab ah ag Yawenu neekkakppa ag oolagppa dubuttid teum daatteb ele, ag ib amuppa ii oimna. Iitta. Ib amuam danab ah ag Kayakib dim lamidna, hipunin ii hetteb ele, ag ippulag aakkuib daakku. Nau hak danab ag Yawe dab-ii-mena ii dim lamidtteb ele, ag amuppa nakok laa oiglagnu elele iitta.

⁹ Doɗ laion ib amuppa ii daama, amu doɗ nau laala, danab qe mauhtte ele, doɗ amubia laa ib amuppa nakok iinab daamna. Doɗ anam ag ib amuppa ii daamna. Ib amuppa amu, danab ah Yawe Nug ag hipuninnu qagaiettakppanu eɗua uhuqak ha mattom ele, agib aguppa oiglag.

¹⁰ Ao, danab ah Yawe Nug ehanatte, ag qagaiettakppa ii daatteb ele, ag eɗun uɗiglag. Ag eɗun uɗin, gamag ahak, amu maɗoɗppan gamag ahak ele Sion tena, hanhan oo gamag ahak amu doon daaglag. Oo gamag ahak amu ahilagppa ambak dayebeb, uugnu oo doyak, oo uug mettak ele amu, ahilagppa nakok laa iinab daama.