Aisaia 34 - Nobonob Baibel

Yawe Nug wanppan wan ohppan danab ah epeɗiadkku

¹ Danab ah wan atu ohppanu ag gumiɗna dona, nai doyeg! Ao, ag wan atu ohppan danab ah, ag daulag human, nai doon, dabmetteg! Ag wanppan danab ah oh, wanppan keeke laa oh ele ag doyeg! Ao, wan atu ohppa danab ah, wanppan keeke ele, ag doyeg!

² Aɗinu? Yawe Nug wanppan wan anen anen ohnu oo nauhak dootte. Ao, wan ohnu dilag daup dilagnu amu, Nug oppoɗi ba autanab awom. Nug heeb, ag nuhignuib, nuhig pelemppa daaglag. Ao, Nug ib oo ii nekku amunu, laa ag ag aqappeg mauhadkkulag.

³ Ag mauhadna, ag beɗulkad am miag, boumak iitta daaglag. Ao, ag anam daappeg, uɗig wak eheɗ nau ahakku. Ge, ag huanaknab mauhadna, ag tiilag am le bia qauko attannu amba nekku.

⁴ ⌊Haen amuppa⌋ Yawe Nug heeb, habnu keeke, amuam aam kalam hoɗoppai keeke, keeke amu oh iitta mekkulag. Ao, Nug hab itoɗieb, qak daakku. Hoɗopai oh ag muɗi grep uɗulkad qaɗaiettan, nena qetteb bia nena qekkulag. Ao, ag ad fig uɗulkad qaɗaiettan, nena qetteb bia nena qekkulag.

⁵ Amu Yawe atte. “Dahil qep elab nug hab aabppa aɗi uɗat hekkunu nai awa mala, qep amuam Edom danab ah bu madakkunu nekku. Da danab ah wan amuppanu, ag dahilnuib, dahil pelemppa daaglagnu ain malami amunu, am anam bekku,” awa aum.

⁶ Tiig am Yawenu qep elab aeg am laidkku. Ao, ittag Nug qep aeg laidkku. Sipsip nag tiilag, meeme tiilag ele qep elab aeg nuhig laidkku. Ao, sipsip dawai aɗita doɗonu ittag am qep aeg laidkku. Nuhig qep elab aeg anam daakkunu diig am, Yawe Nug mana mettak okkai Edom wanppa aab onig Bosra appa daakkunu dabma, bekkunu mattia malom. Ao, Edom wanppa am mauhak huanaknab daakku.

⁷ Makau okkai ebehi ele dakkuɗ am ele aqeb mauhkkulag. Makau gaiɗ, makau dawai okkai okkai ele aqeb mauhkkulag. Edom wanppa tiig huanaknab neeb, tiilag am wan amu toneb, leppu medakku. Ao, wan amuppan mauhak huanaknab dayebeb, ittag am gappud ele kabolieb, gappud leppu ambak ele bia daakku.

⁸ Aɗinu amu oh bekkunu daatte? Yawe Nug danab ah eheɗ hetteb ele, Nug ag eheɗ heppignu nob tutukku mattaglagnu haen tituanom daatte. Ao, Nug danab ah ag Juda danab ah eheɗ hadappig ele, Nug ag bu aoglagnu maɗ tituanom daatte.

⁹ Yawe Nug heeb, Edom wanppanu le am eɗun, kolta daaglag. Ao, Yawe Nug heeb, Edom wanppanu gappud am eɗua, kalu laa huana eotte onig salpa, amubia ewawa daakku. Edom wan anam dayaya, kolta huana eotte, anamib eokku.

¹⁰ Amun tuqan ele wan amuam ewawa daakku. Ao, aab kah appanu am hanhan taataib daakku. Wan amu hanhan hele-ettak daakku. Ge, danab laa haen laa baula wan amu tom laihnu ukka, tom laappa ii goma. Iitta!

¹¹ Atu taɗakppanu hipunai, ag appa daappeg, hipunai gayak baag eheɗ ele, ag ele appa teɗ mekkulag. Hipunai okkai, ai alɗal ele, ag appa teɗ mekkulag. Kayak Nug heeb, Edom wan am nauha autanab aokku. Ao, Nug heeb, wan nauheb, danab ah appa ii daamna.

¹² King laa wan amu gumakkunu ii daama. King bekkod ele oh am iitta mena, ii daamna. Iitta.

¹³ Uud keeke qaun ele ba, aab ooppa aben aɗ ɠagattagnab ele tonakku. Ao, muɗi qaun digdig ele bena, ban haknu aben ɠagattag ele tonaglag. Wan amuppa doɗ jakal ag daaglag. Ao, hipunai ag aguppa daaglag.

¹⁴ Atu taɗakppanu doɗ dakkuɗ ag appa daappeg, doɗ haaina ele qagmena daaglag Meeme dakkuɗ ag daappeg, danab layag ele nai madittep bia, ag lailkad ele anam hekkulag. Tuqannu doɗ nau ag aguppa daanna, aguppa niiaknu aben ena anidkkulag.

¹⁵ Hipunai nug aguppa teɗ ma, oppa mekku. Oppa ma toneb makkulppeg, nakkud haug waappa gumadkku. Kaub ag aguppa, ag anen anen ahilkad ehanittak ele qagmena daaglag.

¹⁶ Na Yawenu buk itoɗiak laappa neegna, amuppa aɗi yaak daatte ebqe! Am inam. “Doɗ amu laa am appa daakkunu ii uuma. Ag ohnab ahilag ehanittak ele appa daaglag. Yawe Nug amu bekkunu Nug oɗeppa haknunab mattiom amunu, am anam bekku. Nuhig Ouɗi Nug doɗ amu oh aguppa qagmaadkku amunu, am anam daakku.”

¹⁷ Yawe Nug doɗ amu ag wan amuppa daaglagnu, wan amu ahilag tituana, anen anen daaglagnu wan amu otia mattom. Doɗ amu ag hanhan wan aon, amuppa daappeg, amu ahilagib hanhan daakku.