Aisaia 33 - Nobonob Baibel

Jerusalem danab ah ag enanag baɗak iitta daaglag

¹ Na laa, na hee, laa nauhtteb, laa ag na heitteg ii nauhme amu, nahipnu am gadonnab gadon. Yo, na laa hambuppualadna, nahip nai ag amelagppa ame ii dim lamidttem; laa ag nahipnu anam ii heppig ele amu, nahipnu am gadonnab gadon. Na laa heppe nauhkkulagnu uuppe, danab laa ag na heidppeg nauhkkut. Ao, na laa hambuppualadna, nahip nai ag amelagppa anana, ii dim lamidkkutnu kobol uuppe, laa ag hambuppuidna, na amenppa nai mattinna, ii dim lamidkkulag.

² O Yawe, na ihinignu amu, na oo bodoette enanag maɗoɗ ele hak kobol dim lamidkkutnu oɗ medattem. Ig na ele laippu daagnignu oonig huanaknab daatte. O Yawe, buttua oh na ihinig ɠagattag daakkutnu oɗ medattem. Ao, na uug nau ihinigppa bette amu, haen amuppa na ihinig padal mematanu ehanittak daakkutnu ele unuqidttem.

³ Na nai hakkaɗ qak bia mattieye, danab ah ag ooltteb. Ao, na ahae, wanppanu wan anen anen ohnu danab ah ag oolna mattatun gotteb.

⁴ Na kekeɗ hadappe nauhkkulag, amu ahilag keeke dayebeb, tap-lokus keeke oh latteb amu, amubia ig keeke amu oh aognig. Tap-lokus ag keeke oh lakkulagnu ee daatteppa ag qataiettan gotteb, amubia ig nahipad danab ig kekeɗ dilag keeke aognig.

⁵ Yawe Nug laa oh dilagnu eɗattak daatte. Aɗinu? Nug hab aabppa dayaya, Nug heeb, nai doya mala hettoɗia epeɗia elele mettak kobol, genab tutukku hak kobol ele aa Sion appa ambak daaglah.

⁶ Nugib ig ena daagnignu ukkunab daatte. Doyak dabmak ena ele, doyak, amu padal mematanu ehanittak ele Nug eppegppa huanak, ig aognignu daatte. Danab nug amu aokkun amu, nug Yawenu ebehi oh bodoetta le meeb oiyaɗ! Nug amu hekku amu, nug amu oh aokku.

⁷ Antteg! ⌊Ag kekeɗ ele nai mattinna, maɗoɗ ele daaglagnu heegeg, meu ii oum amunu,⌋ danab ɠagattag ag ibppa gaanna daatteb. Ao, danab ag heppeg, kekeɗ ele maɗoɗ dayaknu goppig amu, ag eɗun uɗin, huana gaatteb.

⁸ Ibppa danab laa ii oitteb. Ao, ibppa danab ah laa ii oitteb. Danab ag lailkad ele maɗoɗ daaglagnu nug tituanna nai qagatteb amu, ag nai amu tappaeg ne, hamu bia dootteb. Laa ag nai amu ɠagattag qettaglagnu daappig ele amu, laa ag amu dilagnu ena iinab dootteb. Laa nug layagnu, “Danab ena elele,” ii dootte.

⁹ Ihinig wan am nauhak daatte, appa danab ah laa ii daatteb. Lebanon appanu ad huanak bunaɗtteb. Atu onig Saron amu, gemu wan amuam atu Araba, am amubia daatte. Wan laih onig Basan, qauko nuhig Karmel appa amu, ad nauhegeg, uɗulag nena qetteb.

Yawe Nug kekeɗ amelagppa, “Ag dabmeig!” aum

¹⁰ Yawe Nug atte. “Gemu da ahakkul. Ao, da gemu kobol okkai heppi, danab ah ag da onil okkai meɗaglag. Ge, da uɗat okkai heppi, ag da binal okkai meɗaglag.

¹¹ ⌊Ag kekeɗ dahilad amu,⌋ ag am keeke hamu, wit qaɗu qaɗaiettak bia. Aab ewawa, wit qaɗu qaɗaiettak amota eotte, amubia ag akka akka anam henana nauhkkulag.

¹² Danab ah, dahilad kekeɗ daatteb, ag nauhna autna aoglag; aab aɗu he, kin eɗua ka daatte, amubia. Danab ah ag keeke qaɗaiettaknab huan ewawa iitta mette, amubia danab ah ag nauhkkulag.

¹³ Ag danab ah uma daatteb, ag da kobol okkainab hemi amu, ag amunu doyeg! Ao, ag danab ah miag daatteb, ag da ɠagattag okkainab ele anidna hambuppuna, ‘Nug gai-iitta,’ aib appig.” Yawe Nug anam atte.

¹⁴ Hipunin hak danab ah Sion daatteb ele, ag eheɗ nau baɗatteb. Ao, Kayaknu nuhig haknu ele uuak danab ag hahaɗtteb. Ag hahaɗnan atteb. “Ig oonigppanu amu, aun nug Kayak, Kayak Nug aab aɗu keeke oh ewe iitta mette bia daatte amu, aun nug Nug ele daaglahnu elele?” Ao, ag hahaɗnan, “Ig oonigppanu aun nug Kayak, Kayak Nug aab aɗu keeke oh ewe iitta mette bia daatte amu, aun nug Nug ele hanhan daaglahnu elele?” atteb.

^15-16 Hipunin hak danab ag anam baɗan, uug doon oitteb, amge danab laa nug aben enanag, uug iittappa daakku, danab nug ɠagattag, enaib daakkunu padal mak eɗitteb ena dayaknu aben nuhigppa daakku amu, nug nuhig kobol am inam. Nug danab genab tutukku hak kobol dim lamitta oiyaya, nug nai tutukku, hambuppuak iitta maditte. Nug keeke lokkumakppa awaknu duttuna hak kobolppa men doɗo keeke ii aotte. Nug hettodiakppa lokkumakppa eheɗ haknu ehanittak aokkunu nai hambuppuak madikkunu, “Yo,” ii atte. Danab laa ag lailag laa qeppeg mauhkunu maditteb amu, nug nai amu doya, nug ehanittak madakkunu ii dabmette. Nug nau hekkunu dabmak nakok laa ii aotte. Danab nug anam hette ele, nug hanhan ee ele daakku. Nug le oug nuhig am iitta ii mema. Iitta.

¹⁷ Amu na anam hekkut dayeb amu, na king ɠagattag okkai naɗi ele, na nug amenppanab anidkkut. Anidna na nuhig wan okkai okkai, tom uma ukkak ele anidkkut.

¹⁸ Na anidnana, na tatam ootppa baɗak eheɗ nau dayom amu, na baɗak amunu dabmenana, na ootppa inam akkut. “Danab okkai ag heeg, ig men doɗo takisnu gane ewaknu doomut amu, ag adeppa daatteb? Ao, laa ag heeg, ig men doɗo okkai takisnu ag eppelagppa memut amu, ag adeppa daatteb? Ge, laa ag men doɗo ig mattamut aon, lakka ebqeppig ele amu, ag adeppa daatteb? ⌊Yawe he, gemu ag oh iitta meppig; ag ii daatteb⌋,” aon akkut.

¹⁹ Laihnu danab amu, ag am beɗuppa tak danab, ahilag nai am laa, ag Juda ag ahilag nai ii dootteb. Ao, ag ahilag naippa nai maditteb, amge ag Juda, ag daulagppa ele ii dootteb. Anam amge, Yawe Nug heeb, ag Juda ag danab laihnu amu, ag ag baula ii anadmana. Iitta!

²⁰ ⌊Genab, Yawe Nug anam heeb, danab nau amu ii daamna,⌋ na neegppe ukkeb, Sion anidkkut; Sion appa amu, ig ihinig qagmak gamag ahak ele hettem. Ao, na neegppe ukkeb, na Jerusalem anidkkut. Na neegna anidna, Jerusalem am aab maɗoɗ daatte anidna, na Jerusalemnu, aab amuam peh lag hanhannu bia anidkkut. Aab amuam danab nug pehnu pin elab wanppanu ii aotte, peh hanhan aguppaib daatte, aab amuam anamib daakku. Ao, peh laanu muɗi ii pagutte, peh am hanhan qappakib daatte amu, aab amuam anamib daakku.

²¹ Amu ig aab amuppa daapput, Yawe Nug ihinig gumikkak ɠagattag okkai ele dayaya gumigkku. Ig aguppa danab ag le okkai okkai, le naunau ele daugppa daatteb bia daagnig, amge kekeɗ dilag uub naɗi, ban haknu amu, ag appa ii temana. Ao, ban haknu uub ɠagattag laa appa ii goma.

²² Aɗinu keeke amu bekku? Yawe Nug ihinig gumak danab daatte. Nug ɗo nuhig ig megatte. Yawe Nug ihinig king daatte. Nug ehanikkebeb padal ii memata.

²³ ⌊Amge gemu haen imuppa amu, ag Juda ag eheɗ daatteb.⌋ Ag uub laih nuhig nauhom, ulah nuhig lamen ele ii aotte, ag amubia daatteb. Amge qinob, Yawe Nug heeb, ag kekeɗ eɗadna, ahilag keeke aon, ag anen anen en ahilag aoglag. Ge! Danab baelkad nau autaut oitteb ele, ag kekeɗ dilag en amu anen anen aoglag.

²⁴ Haen amuppa danab ah Sion daatteb, ag oolagppanu laa nug, “Da oɗe ele,” ii ama. Danab ah appa daatteb ele amu, Yawe Nug ahilag hipunin uhuqa madakku.