Aisaia 32 - Nobonob Baibel

Kayaknu ɗo maɗoɗ am wan atu oh tonakku

¹ Antteg! Qinob king laa nug kobol genab tutukku dim lamittatta, danab ah gumadkku. Ao, danab ah dilag okkai ag nai doya mala hettoɗia epeɗia elele mettak kobol dim lamidnana, ag danab ah gumadkkulag.

² Haen amuppa kobol inam bekku. Danab okkai amu oh ag gilil ulah qehagtte bia daaglag. Ao, ag ulah huanak uɗieye, danab nug padal mak eɗitteb ena dayaknu abenppa ukka daatte, ag aben amubia daaglag. Okkai danab amu ag atu taɗak, le iitta ele, ag appa le laa noa gotte bia daaglag. Ao, ag wan laappa, aam gakkaɗak naunab nau neene, danab nug men okkainab logoppa ukka daatte, ag lokko amubia daaglag.

³ Haen amuppa danab ah amelag ele, ag keeke tutukku anidkkulag; qehakkak ii daama. Danab ah ag daulag ele ag keeke pehettak dooglag.

⁴ Danab ag dabmak ii aonna, laippun ahan keeke hetteb amu, ag eɗun, tatam dabmak aonna, haen amuppa keeke hekkulag. Danab ag nai kagi ele maditteb amu, ag eɗun, nai elele, pehettakib mattiglag.

⁵ Laa nug Kayak dab-ii-mette, Nug ele dim ii lamidtte ele amu, laa ag nuhignu baula, “Danab enanag,” ii amana. Amu laa ag danab nug kobol eheɗ kuɗum hette ele, ag nuhignu, “Ig nuhignu ena elelenab doottem,” baula ii amana.

⁶ Aɗinu? ⌊Ag inam dooglag.⌋ Danab nug Kayaknu dab-ii-maama ii dim lamidtte ele, danab amu nug nuhig nai mattiak am Kayak dab-ii-maama hakppa gotte. Ao, danab Kayak dab-ii-maama, Nug dim ii lamidtte ele, nug nau hekkunu dabmaama daatte. Danab nug Kayak dab-ii-maama, Nug dim ii lamidtte ele, nug Kayaknu, nuhig haknu ele uutte. Ao, danab nug Kayak dab-ii-maama, Nug dim ii lamidtte ele, nug Yawenu hambuppuak nai maditte. Danab anam nug danab ee iitta ele ehanitta, ee metteb lakkunu uua heehe, danab amu ee iitta daatte. Ge, nug danab le baag diitte ele, nug nug ehanitta, le oug metteb lakkunu uua heehe, danab amu nug le iitta daatte.

⁷ Danab nau nug nau hak kobol dim lamidkkunu hette. Nug eheɗ hekkunu lokkumakppa dabmaama, maittak eheɗ awa, daɗek danab heeb nauhkkulagnu hik qeeqe dabmette. Daɗek danab ag eheɗ laa ii heppig, ag tutukkuib henan daaegeg, danab nau nug heeb nauhkkulagnu anam hette.

⁸ Danab nau ag anam hetteb, amge danab ena, kobol tutukkuib dim lamidtte ele, nug hanhan dabmak ena, tutukku ele aakkuib haen oh awawa, enaib hekkunu dabmak aotte. Nug dabmak anam awawa, nug ɠagattag hibaitta daatte.

Juda ah ag bu aoglag

⁹ Ag Juda ah, ag hamu uug iitta ele daatteb, ag ahan, nai dahil doyeg! Ao, ag Juda ah, ag oolagppa, “Ig eheɗ laa ii anidmata,” dabmetteb amu, ag daulag human, nai dahil doyeg!

¹⁰ Ag gemu ag uug laa ii dootteb, ag, “Ig eheɗ laa ii anidmata,” dabmena, anam dootteb, amge haen elab iitta, maɗ laippu maha nakoknab laa ele uueb amu, ag ottaikkulag. Aɗinu? Haen amuppa ag grep meu nakok laa iinab anidmana. Ao, ad oh meu ii omana.

^11-13 ⌊Uug anam bekku amunu,⌋ ag Juda ah, ag hamu, uug laa iitta, eleleib doon daatteb amu, ag ottaieg! Ao, ag Juda ah, ag oolagppa, “Ig eheɗ laa ii anidmata,” dabmetteb amu, ag hahaɗeg! Ag lamen ena uɗadna, ag lamen heɗiag ele takkeg! Ag ee meu oh ena ii bemananu, ag grep muɗi am meu ii omananu, ag wan imuam ena ii daamanu, ag keeke amu ohnu mahieg! Aɗinu? Uud keeke qaun ele ag bena wan imu oh tonan, aab imu, lag laala imuppa daatteb ele, amuppa gamag ahak nau daatte, aab, lag amu ele tonaglag.

¹⁴ ⌊Ag mahieg!⌋ Aɗinu? Aab imuppanu king laug enanagnab am hamu, danab iitta daakku. Ao, aab okkai am hele-ettak daakku. Aab ooppa aben aɗ ɠagattagnab ele, ban danab neegna kekeɗ anidttebnu lag attan ta ukkak menppa hak, amu ele nauhna, nena qena, haen elab anamib daan, daappigppa amu, amuam wan meu waknu nakokib eleleppa daaglag. Appa amu, gikkiɗah beeb, donki sipsip ele ag enanagnab doon, gikkiɗah lanan daaglag.

¹⁵ Wan amu nauha anam dayeb ukkeb, Yawe Nug nuhig Ouɗi hab attannu ig mekkeb batakku. Yawe Nug anam heeb, atu taɗak amu, wan amuam wan ittag ele bekku. Ao, Nug anam heeb, wan ittag ele, am ittag huanaknab ele daakku.

¹⁶ Nai doya mala hettoɗia epeɗia elele mettak kobol am atu taɗakppa daakku. Ao, genab tutukku hak kobol am wan ittag eleppa daakku.

¹⁷ Genab tutukku hak kobol dim lamittak am maɗoɗ heeb bekku. Ao, genab tutukku hak kobol dim lamittak am maɗoɗ, baɗak iittappa dayak ele heeb beya, hanhan daaglah.

¹⁸ Am dahilad danab ah ag aben maɗoɗ ele daaglag. Ao, ag laulkadppa baɗak iittappa daaglag. Ge, ag aben uug ii betteppa hik aon daaglag.

¹⁹ ⌊Haen amu uɗikku, amge haen gamag imuppa amu,⌋ ais doɗo hab waappanu naana, atu, aab okkai imu ele heeb nauhkkulag,

²⁰ amge ⌊dimppa, haen ena bekku, haen amuppa⌋ ag itittak ena aon daaglag. Ag le guguittak ee eppaladnan, ag heppeg, ahilag makau, donki ele ag gikkiɗah lakkulagnu laih laih gona hamu oiglag.