Aisaia 31 - Nobonob Baibel

Danab ag Yawenu ehanittak aoglagnu dabmekkulag aakkuib am ena

¹ Aun aɗi ag Isip appanu ehanittak aoglagnu dabmetteb amu, ahilagnu am gadonnab gadon. Ag bannu hosppa ⌊Isipnu⌋ ehanittak aoglagnu dabmetteb. Ag Isip dilag daup bannu karis kuɗum eleppa daan, ban hetteb doon amunu, bannu karis amuppa ehanittak aoglagnu oolagppa genab dootteb. Ao, ag Isipnu ban danab kuɗumnab hos attan daan oin, ban hetteb doon amunu, ahilagppa ehanittak aoglagnu oolagppa genab dootteb. Ag anam dabmetteb, amge ag Israel dilag Kayak Oppiaawak Ele, ag nuhig dabmak aoglagnu oɗ ii medatteb. Ao, ag Yawenu, ag ehanittak nuhigppanu aoglagnu ii dabmetteb. Ag anam hetteb amunu, ahilagnu gadonnab gadon.

² Yawe Nug doyak dabmak ena ele. Nug heeb, uug naunab bekkunu elele. Nug aɗi keeke hekkunu dabma maditte, Nug mattiom amu aakku hette. Nug nai nuhig ii baolitte. Nug nau hak danab ah bu aqadkku. Ao, Nug danab ah ag eheɗ hak danab ehanatteg, ag eheɗ hetteb ele amu, Nug amu dilag oh Nug heeb, ag uug maon, padal mekkulag.

³ Isip danab ag am danabib, ag Kayak iitta. Ge! Isipnu hos ag doɗ. Ag ouɗi iitta. Yawe Nug ɠagattag nuhigppa heeb, miag atieb, Isip dilag daup, ag laa ehanadkkulagnu hetteb ele amu, ag taataɗ qekkulag. Ao, danab laa ag Isip appanu ehanittak aotteb, ag nena qekkulag. Ge, ag oh laippu padal mekkulag.

⁴ ⌊Amuam genab bekku.⌋ Aɗinu? Yawe Nug da amelppa inam aum. “Laion nug doɗ laa qe mauhe, nug liɗimama guma daatte. Ao, laion bau nug doɗ laa qe mauhe, nug liɗimama guma daatte. Anam amu, sipsip gumak danab ameg okkai ag qagmena lamidkkulagnu muttub okkai qettebtai, amge laion amu nug amunu ii dabmette. Ag huanaknab enana, muttub naɗi qettebtai, amge laion nug ii baɗatte. Ao, ag oqotti digdig heegeg, oqotti ottetai, amge laion amu nug uug laa ii dootte. Laion nug anambia hette amu, ⌊amubia da kekeɗ dahilad ii baɗadpa; ahilag hak ele ii dabmepa⌋,” awa aum. Yawe Nukka Ɠagattag Oh Ele, Nug na, Sion qaukoppa dayebeb, nuhikkud kekeɗ ele ban hekkulagnu daakku.

⁵ Amu ai anig nug aɗi keeke laa teɗ nuhig heeb nauhman boppala daatte, amubia Yawe Nukka Ɠagattag Oh Ele, Nug Jerusalem padal memanu ehanidkku. Nug nuhig guppiɗ daya ehanitteb, padal ii mema. Ao, Nug laa ag heppeg qagaiettak daamanu ehanitteb, ena daakku.

⁶ Amu ag Israel danab ah ag Yawe dimettan autna aoppig, amge ag eɗun, nuhigppa uɗieg!

⁷ Haen laa uɗitte, haen amuppa ⌊ag Yawenu ɠagattag okkai anidna, ag kayak hambuppuak ag ehanadkkulagnu elele iittanab iitta ele anidna,⌋ ag kayak hambuppuak dottolkad, silwa, gol eleppa hak, dottolkad amu ag hipunin henana hoippig ele amu, dottolkad amu oh ag agappeg gokkulag amunu, ag eɗun, Yawe toppa uɗieg!

⁸ Amu Yawe Nug atte. “Asiria ag mauhkkulag, amge ag danab dilag qep-ppa ii mauhma. Ao, qep laa heeb, Asiria ag mauhkkulag, amge qep amuam danabnu qep iitta. Ahilkad nid danab ag oolkkulag, amge ag uug ii qe-eɗidmana. Ao, laa ag ag aɗualadna maadppeg, daden madna, diin gona heppeg, ag danab ɗo waappa kingnu uɗat haknuib daaglag.

⁹ Asiria ag eheɗ nau baɗaglag amunu, ahilag ɠagattag oh iitta mekku. Ao, ag da Yawe, da ag eheɗ hadakkulnu at anidna, ahilag daup dilag okkai ag eheɗ baɗan abenlagppa daan, ban iinab hemana.” Yawe Nug anam atte. ⌊Yawe, Nug amu atte ele amu, Nug oppiaawak, ɠagattag ele daatte, amu ɠagattag, oppiaawak amu ele aa aab ewak bia daattep.⌋ Amu aab amu Sion appa daatte. Ge! Aab amunu qaɗab am Jerusalem appa ana daatte.