Aisaia 30 - Nobonob Baibel

Juda ag Isip dilagppa ehanittak aoglagnu aib dabmeppig

¹ Yawe Nug atte. “Juda danab ag hib guitta danab ah daatteb. Ag ib laa, da ag ib amu ii ippunadmi amu, ag maittak amu aon, ib amu dim lamidtteb. Ag danab dilagppa ehanittak aoglagnu nai qagatteb, amge dahil Ouɗi Nug ag amu hekkulagnu ii ippuanattom. Kobol ahilag amuppa amu, ag hipunin ahilag tuɗitteg, okkainab metteb amunu, ahilagnu am gadonnab gadon.

² Ag da oɗ ii meɗanna, ag Isip gona, ehanittak ahilagppanu aoglagnu hetteb. Isip ag ehanadppeppeg ena daaglagnu dabmetteb. Ao, danab nug aam ɠagattag nette haenppa ad logoppa ena daatte, amubia ag Isip ahilag padal mak eɗitteb ena dayaknu ehanittak dayebeb, ena daaglagnu dabmetteb. ⌊Ag nau amu oh hetteb amunu, ahilagnu gadonnab gadon.⌋

³ Ag Isip dabmedatteb, amge Paronu ehanittak am genab ii ehanadma. Iitta! Ao, ag ehanittak amu aoppeg heeb, ag uɗalag nekku. Ge ag Isipnu ehanittak aoppeg heeb, ag uɗa nak nau guittak ele dooglag.

^4-5 Amu Juda dilag nai awa ukkak danab ag ⌊Isipnu ehanittak aoglagnu gona,⌋ Isip dilag aab okkai aɗit onilah Soan amu Hanes ele, ag appa tena daatteb. Ag appa daatteb, amge Isip danab ag ib laippuppa Juda nakok laa ehanadkkulagnu elele iitta amunu, Juda danab ah ag Isipnu ehanittak genabnab genab iinab aomna. Iitta. Ag uɗa nak nau guittak ele aoglag. Isip ag ehanittak Juda ii mattamna. Iitta. Ag uɗa nak mattaglag.” Yawe Nug anam atte.

⁶ Nai meunab ele Negeb wanppan doɗ dilagnu, Yawe he, Aisaia doyom ele am iikku. Ag ⌊Juda dilag⌋ nai awa ukkak danab, ag en okkai ena ena donki attan mena gotteb. Ge! Ag am en amu kamel attan meeg, mawatteg gotteb. Ag amu henana, ag wan laa, wan amuam wan ɠagattag iitta, wan amuam ag ehanadkkulagnu elele iitta, ag wan amuppa gotteb. Ag appa gokkulagnu gonana, wan ena iittanab, wan danab uug madatte, wan amuppa laion ⌊dawai,⌋ laion anig, amu mat nau digdig ele daatteb amu, ag anam daaegeg ag gotteb.

⁷ Ag Isip gotteb, amge Isip nug ag ehanadkkunu elele iittanab iitta. Isip nug anam daatte amunu, da Isipnu, “Nug am doɗ beɗu okkai okkai, amge gai-iitta daatte,” attem.

Juda danab ah ag Yawenu nai doyaknu uuppig

⁸ Yawe Nug da ⌊nuhig nai Juda dilagnu⌋ yaappi dayebeb, gemu, hanhan ele nai amuam Yawenu dabmak ippunattatta daakkunu da amelppa aum. “Na ahan, uɗugppa ye! Ao, na buk itoɗiakppa ye!” awa aum.

⁹ Nai amuam hanhan danab ah inam ippunadkku; Juda danab ah imu ag am nai tappe nak danab ah. Ag nid naunau dahilad, amge ag hambuppun oinna, ag hambuppuak danab ah daatteb. Ao, nid naunau ag mamelkad anilkad dilag nai dooglagnu uutteb, amubia danab ah imu ag da, Yawe, ag dahil nai uutteb.

¹⁰ Ag Yawenu propet amelagppa, “Ag baula Yawenu nai tuleglegppa aib anidppig,” atteb. Ao, ag propet danab amelagppa, “Ag baula Yawenu nai genab tutukku ele tuleglegppa aib anidna, ig amenigppa madippig,” anam maditteb. Ag mattina, ag tuɗidna Yawenu propet amelagppa atteb “Ag Yawe oɗe aon, nuhig nai uug ele aib madippig. Ag keeke ena, keeke ig oonig hette ele, ag amu mattieg!

¹¹ Ag propet ag hetteb ele, ag amu baula aib heppig! Ib ag dim lamidtteb ele, ag ib amu uun, laa aweg! Ag Israel dilag Kayak Oppiaawak Ele baula aib ippunigppig!” aon atteb.

¹² Ag Juda danab ah, ag anam hetteb amunu, Israel dilag Kayak Oppiaawak Ele, Nug inam atte. “Ag dahil nai doon uun, ag layag ɠagattag iitta ele eheɗ hettak kobol dim lamidna, laa anam eheɗ hattanana, hambuppuak kobol ele dabmenan dim lamidtteb amunu,

¹³ ahilag hipunin amu heeb, ag nauhkkulag. Men gilil attannab nug gai-iitta, aoɗak ele dayaya, laippun na qette, amubia ag nena qekkulag.

¹⁴ Gilil aoɗak ele anam am, danab nug waa adppa o aoɗa, maha naunaunab, amunu maha laappa uɗat laa haknu elele iitta daatte, amubia nauhkku, ⌊amu ag ele amubia nauhkkulag.⌋”

¹⁵ Aɗinu ⌊ag anam nauhkkulag⌋? Naɗi Yawe, Israel dilag Kayak Oppiaawak Ele, Nug amunu inam atte. “Da ag ehanadppi, padal ii memananu ib am, ag oolag eɗueb, ag hik ii aqebeb, ag dabmak ahilag ii dim lamidmana. Ao, ag ɠagattag daaglagnu ib am, ag heɗi ii aqebeb, ahilag dabmak ii dim lamidmana, ag dahilnuib oolagppa genab dooglag. Anam daatte, amge ag amu uun autna aoppig.

¹⁶ Ag amu uuna, ag appig. ‘Iitta. Ig hos attan oolkkunig.’ Ag anam appig amunu genab, ag oolkkulag, ⌊amge kekeɗ ag ag lamadkkulag⌋. Ag, ‘Ig hos qaiettan gotteb ele attan daat oolkkunig,’ appig amunu genab, ag anam oolkkulag, amge ahilag kekeɗ ag hos qaiettan, huan gotteb ele amu, ag amuppa ag lamadna, ag eɗadkkulag.

¹⁷ Amu ag Juda danab 1,000 daappeg, kekeɗ laippuib uɗia heeb, ag Juda ag oolkkulag. Kekeɗ tanig eleib heppeg, ag Juda oh ag oolkkulag. Kekeɗ ag anam hebeppeg ukkeb, ag Juda ag laippu laippu, biidod laippu nukka qauko igippa daatte, ag amubia daaglag. Ao, anam hebeppeg ukkeb, ag Juda ag laippu laippu, pilak nukka qauko igippa daatte, ag amubia daaglag.” Yawe Nug anam atte.

Yawe Nug Juda dilagnu oo gai-iitta doyaya, oo matta, ehanadkku

¹⁸ Diig amunu amu, ⌊Ag oolag eɗueb,⌋ Yawe Nug oo bodoette enanag maɗoɗ ele hak kobol dim lamittatta, amuppa ag ehanadkkunu oo huan daatte. Ao, Nug ⌊ag oolag eɗueb,⌋ Nug ahilagnu oo bodoetta le mekkunu babaittak daatte. Aɗinu? Yawe Nug am Kayak haen oh nai doya mala hettoɗia epeɗia elele mettak kobol dim lamidtte. Amu aun aɗi ag Yawe ameg metteb ele amu, ag am itittak ena aoppig daatteb.

¹⁹ Amu danab ah ag Sion daaglag. Ge, ag Jerusalem appa daaglag. Amu ag ⌊Sion danab ah, ag Sion daatteb amu, ag appa⌋ daanna, ag baula ii gaamna. Ag Yawe unuqidppeg, Nug ahilag unuqittak amu doya, Nug oo bodoette enanag maɗoɗ ele hak kobol dim lamitta, ehanadkku. Nug unuqittak ahilag doya, pahanab, haen amuppanab Nug nob ena madakku.

²⁰ Naɗi, Nug ahilag ippunittak daatte amu, Nug uug digdig madakku, amge Nug baula lokkuma iinab daama. Iitta. Ag amelagppanab Nug anidkkulag.

²¹ Ag oippeppeg, ag dimulagppa baag laa ag ib attem aon gokkulagnu ippunadkkunu, “Ib iikku, aakkud ukkeg!” ab dooglag. Aɗinu? Ag oinna, ag ib naɗiap-ppa gokkulagnu daatteb dayeb amu, ag baag doon, naɗiap-ppa gokkulag. O ag ib nanehppa gokkulagnu daatteb dayeb amu, ag baag doon, nanehppa gokkulag.

²² Amu haen amuppa ag ahilkad kayak hambuppuak dottolkad silwappa hak, golppa hak ele, ag dottolkad amu heppeg nauhppeg, ag dottolkad amunu kinipan nau, beɗak doon, baula anidmananu ag agappeg gokkulag.

²³ ⌊Ag amu heppeg,⌋ Yawe Nug heeb, gu nug keeke ag ebappig ele le medakkunu neebeb, ee meu huanak, ittag ele wanppanu aoglag. Haen amuppa ahilag makau ag gikkiɗah dad okkai okkaippa gikkiɗah lanan daaglag.

²⁴ Uɗat haknu makau, am donki ele, ag doɗ amuppa wan buutteb amu, doɗ amu ele ag ee aeg babaittak ele madappeg lakkulag.

²⁵ ⌊Yawe Nug keeke bappaidkku amu,⌋ haen amuppa am inam bekku. Kekeɗ kuɗum ag aqakppa mauhppeg, kekeɗ dilag bannu keeke ele nauhppeg, le ⌊enanag⌋ qauko okkai okkaippanu, qauko nakok okkaippanu ele nekkulag.

²⁶ Qinob, haen amuppa Yawe Nug nuhikkud danab ah Nug eppegppa guittak aoppig ele oh ihilag ita heeb, ihilag oh qaɗaiedakku. Nug anam heebeb, kalamnu amahlak, am aamnu amahlak bia dayebeb, aamnu amahlak gemu amahlak laippu daatte, haen amuppa nuhig amahlak am amahlak eblaih aɗit bia daakku. Deɗ eblaih aɗitnu amahlak deɗ laippuppa haen amuppa daakku.

Yawe Nug Asiria bu madakku

²⁷ Yawe Nug umanunab uɗitte. Nug oo nauhak huanak aab ewewe, aab kah tette, amubia dootte. Yawe Nug nai uug naunab, oppoɗi bak ele maditte. Ao, Nug lemaɗu am aab aɗu, keeke oh ewadtte, amubia daatte.

²⁸ Nuhig ouɗi amu le ui o ugakka, danab baag batak tette, nuhig ouɗi am anam bia daatte. Nug wanppan danab ah oh epeɗiattette, laa ena daatteb, laa padal metteb. Nug danab aen maha hos oɗeppa ma he, laih laih gotte, amubia Nug danab ah bu mettak ibuppa omalatte gotteb.

²⁹ Kekeɗ dilagppa anam bekku, amge ag Yawenu danab ah ag danab ag qagmak gamag ahak ele Yawenu tituanak daatte, ag amu henana, ahi edatteb, amubia ag ahi ettaglag. Ao, danab ag dumuttum iwalnana, Yawenu qaukoppa tenana, oo gamag ahak dootteb, amubia ag oo gamag ahak dooglag. Ag Israel dilag ehanittak, Nug laugppa tenana, gamag ahak dootteb bia dooglag.

³⁰ Yawe Nug heeb, danab ag Nug baag enanag ɠagattag ele dooglag. Nug heeb, ag Nug, ɠagattag okkai okkai ele neebeb anidkkulag. Nug oo nauhak huanaknab, aab aɗu keeke oh ewewe iitta mette ele, Nug amu oh ele nekku. Nug gu huanak neebeb, amemɗi awak, hakkaɗ baag huanak, ais doɗo hab waappanu nak ele nekku.

³¹ Amu Asiria ag Yawe baag doon, Nug ag bu ɠagattag nuhig mattebeb anidna amu, Asiria ag baɗan autnanab aoglag.

³² Am inam daakku. Yawe Nug bu nuhig, Nug bu amuppa danab ah eheɗ hetteb ele bu madatte amu, Nug bu amuppa Asiria danab bu madakku. Nug bu mattebeb, laa ag ⌊Yawe he, eheɗ hak kobol aakku na qette anidna, ag⌋ tambarin, amu harp eleppa ahiettak hekkulag. Yawe, Nugnab Asiria ele ag ban hekkulag.

³³ Amu bekkunu diig am, danab mauhe, ag gaɗa aab aɗuppa heeg ewa iitta mette, amubia Yawe Nug anukkanab he, Asiria dilag king, ⌊Asiria ele⌋ iitta mena autnanab aoglagnu babaittom daatte. Ao, Yawe Nug matu ⌊Asiria,⌋ ahilag king ele aab ewakppa iitta mekkulagnu babaittom daatte. Amuam laa ag danab gaɗa maiglagnu aben okkai, uma noa ukkak bapaidna, aab huanak akkaeg te, aben akka eɗitta te, gaɗa amu qaɗeppa meeg dayeye, kalu laa huana eotte onig salpa le nag gotte bia uɗia aab amote, aab gakkaɗaknab ewawa, gaɗa ewe iitta mette, amubia Yawe Nug heeb, Asiria dilag king, ⌊Asiria ele ag⌋ iitta mekkulag.