Aisaia 3 - Nobonob Baibel

Yawe Nug geha heeb, Juda danab ah, amu Jerusalem danab ah ele ag eheɗ aoglag

¹ Amu ag ⌊Juda danab ah, ag⌋ doyeg! Naɗi, Nug Yawe Nukka Ɠagattag Oh Ele, Nug Juda danab ah oh, laa Jerusalemnu, laa Juda wanppa laih laihnu amu, Nug ag ahilkad ehanittak keeke oh heeb, iitta mekkunu haen malom daatte. Nug amu haaha, Nug heeb, ee nakok laa ii daama, le lanaknu nakok laa ele ii daama.

² Ban danab nug nuhig hak okkai okkai laa, ban danab hamu laa ele ii daama, hettoɗiak danab laa, propet laa ele ii daama. Eman danab laa, aab okkaippanu danab okkai laa ele ii daama.

³ Ban daup ikki laa, wan gumak ikki laa ele ii daama, ulum danab laa, danab uɗat laala haknu doyak okkainab ele, eman danab nug nuhig uɗat ha autanab aotte ele, amu laa ele ii daama.

⁴ Amu Yawe Nug atte. “Da geha heppi, nid bau hamu ag ahan, Juda danab ah, laa Jerusalemnu, laa Juda wanppa laih laihnu amu, ag amu dilag ikki danab daaglag. Ge, nid yuɗ bia ag ahilag okkai daan, ag gumadkkulag,” awa atte.

⁵ Am danab anen anen ag lailkad dilagnu oo doyak iinab doomna. Iitta! Danab laa nug layag gai-iitta ele, nug nuhigppa eheɗ hekku. Danab laa am danab laa ele nug qekkulag. Ao, ag anen anen ag lailkad, mudippan laippu, eheɗ hattaglag. Nid bau ag danab kaino dilagnu, ag am binalag ele ii doona, ag oɗelag ii dim lamidmana. Amu danab laa ag dabmak nau beɗulagppa ambak ele, ag am danab dabmak ena ele, ag amu dilagnu ag binalag ele ii doona, aon aon aqaglag.

⁶ Amu haen amuppa danab laa nug ukka, awag o amag diig laippu ele, nug nug amegppa inam akku. “Na saket ele amunu, na ihinig ikki danab daakkut. Na ihinig ikki danab daanna, kinipan ameg okkai hume tak imu oh na geha gumanna, ⌊ig ehanigkkut⌋,” awa akku.

⁷ Nug anam akku, amge haen ⌊nau⌋ amuppa geha nug awag o amag nug aha hibaitta, nug amegppa akku. “Da ahilag okkai ii daapa. Da na, laa ele, da ag ehanadkkulnu ib iitta. Da ele laulppa ee ele iitta, lamen ele iitta amunu, ag aib da ahilag ikki danab daakkulnu otiɗpig,” awa akku.

⁸ Anam bekkunu diig am, Juda danab ah oh, laa Jerusalemnu, laa Juda wanppa laih laihnu amu, ag ahilag hakppa, ahilag mattiak ohppa ele ag Yawe, Nug binag amahlak oppiaawak ele, ag Nug noobppa Nug waappa daaglagnu uuna, ag nuhig nai tappaeg nette amunu, Jerusalem danab ah, ag taataɗ qeppig. Ao, Juda danab ah, ag nena qeppig.

⁹ Ag hipunin hetteb amunu, ag oolagppa aab daatte. Aab amu daya, aab dayak amu ag iɗulagppa danab ah anidkkulagnu bette. Ag Sodom danab anukka heppig bia, ag miag atiak hetteb. Hipunin ag hetteb ele, ag lokkumak ii hetteb. Ahilagnu amu, gadonnab gadon. Aɗinu? Ag bu nau aoglag. Ao, ag akka ag beɗulagppa, ag bu nau amu aoglagnu ib ooɗppig daatteb.

¹⁰ Imu dabmenan oiyeg! Genab tutukku hak danab ah dilagnu amu, ahilagnu am ena. Aɗinu? Ag ahilag haknu meu ena aon daaglag.

¹¹ ⌊Amge imu ele dabmenan oiyeg!⌋ Nau hak danab ah dilagnu amu, gadonnab gadon. Aɗinu? Ag hak nau ahilag laa dilagppa heppig, nob amu, ag amuib eɗun aoglag amunu, ag nauhkkulagnu hetteb.

¹² Juda danab ah, ag am dahilad danab ah, ⌊amu ahilagnu gadonnab⌋. Nid bau ag ahilag okkai danab daan, eheɗ hadatteb. Ah ele ahan, ag gumadnana daatteb. O Juda danab ah, ag am dahilad danab ah ele, ahilag okkai ag ib eheɗppa omaladna gotteb. Ag ib nau kuɗumppa ag kaboliadtteb.

¹³ Yawe, Nug danab ah nuhikkud ohnu nai doya mala, hettoɗia, epeɗiadkkunu hettoɗiak abenppa, nuhig dayak abenppa teum daatte. Nug hettoɗiak abenppa hibaittom daatte.

¹⁴ Am genab, Yawe Nug hettoɗiakppa nuhikkud danab ah dilag ikki danab, amu gumak danab ele, Nug ag epeɗiattatta, Nug ag amelagppa inam atte. “⌊Dahilad danab ah, ag dahil grep dad bia daatteb.⌋ Amu ag gumak danab agib aakku dad dahil amu heeg nauhom. Agib aakku danab keekenu tutu mak daatteb, ag daɗek ⌊keeke laippu laippuib aɗatteb amu,⌋ gumak danab ag ahilag keeke laib laib amu ag aɗadna, akkan gona, ag laulagppa meeg ambette.

¹⁵ Aun nug ag amelagppa a, ag dahilad danab ah eheɗ hattegeg, ag nauhna autna aotteb? Aun aum amunu ag daɗek danab tappalattegeg, ag iɗulag wanppa oɗoɗe nauhtteb?” Naɗi, Nug Yawe Nukka Ɠagattag Oh Ele, Nug anam awa atte.

Jerusalemnu enaen mak ah, ag geha haen nau anidkkulag

¹⁶ Am Yawe Nug atte. “Sion ah ag am dada ha, laa eɗittaknu dabmak awaknu ah daan oitteb. Ag anam daan oinna, laa ag neegna anadkkulagnu henana, amelagppa danab laala ag ele oiglagnu eeɗadnana, baeg gogppa oiyak henana, baelagppa bala oqotti okkunu metteb amunu, ⌊da ag bu madakkul,” awa atte⌋.

¹⁷ Anam amunu, geha Naɗi Nug heeb, Sion ah ag ikkilkad oh ihi medakku. Yo, Yawe Nug heeb, ikkilag uɗug oh mumuɗeb ukkeb, iitta mekku.

¹⁸ Haen amuppa Naɗi Nug geha Jerusalem ah dilag bala ena ena amu oh heeb, iitta mekkulag. Bala amuam baelag baagppanu bala, ikkilag ita talilittaknu lamen, baalagppanu bala onig kuambi,

¹⁹ daulagppanu bala, eppelag baagppanu eɗi, am iɗulag hautaknu lamen geɗaɗa ele,

²⁰ ikkilagppanu eɗi, bala sen bia baelag baagppa maknu, lamen ena ena imualag itatteb ele, aria hogot nakok, amuppa goɗen muttuɗig ena ele laala inan baalagppa qakkaeg na daatte ele, amu ehanittaknu baɗ, ag beɗulagppa aihatteg daatte,

²¹ amu ahilkad doyaknu at ringppa daatteb, am noolagppanu bala,

^22-23 amu ahilag lamen elab ena ena digdig, am ahilag bek battam, amu ahilag lettod, amu ahilag linen lamen diig laa, amu ikkilagppanu keeke laala ele. Yawe Nug amu oh heeb ahilagppa iitta mekkulag. ⌊Haen amuppa am inam daakku. Jerusalem ah ag bala ena tatam meppig bia ii memana. Iitta!⌋

²⁴ Ag goɗen muttuɗig ena ele bau laa ii laamna amunu, ag beɗulag hiuɗi nau okku. Ag bau laa lamen enanag imualag ii itamna. Iitta. Ag lamen nau maadna, muɗippa imualag qakkaglag. Geha ag ikkilag uɗug kobol digdigppa bau laa hena ii qakkamna. Iitta! Ag ikkilag uɗug iitta meeb, bikkalag ele daaglag. Ag lamen ena ena ele ii takkamna. Iitta. Ag lamen heɗiag ele takkaglag. Ag iɗu tuqak ele ii daamna. Iitta. Kekeɗ ag aen gakkaɗaknab ele ag beɗulagppa kobol mekkulag.

²⁵ Haen amuppa kekeɗ ag banelag uɗina, ag Juda danab qep elabppa aqaglag. Ao, ag Judanu ban danab ban hakppa aqappeg mauhkkulag.

²⁶ Aab Sion na eheɗ gaan, mahiak hekkut. Kekeɗ ag heppeg, danab ah Sion appa iinab daamna. Sion am na qa daakku.