Aisaia 29 - Nobonob Baibel

Danab ah Jerusalem daatteb amu, ag uug okkainab anidkkulag

¹ ⌊Yawe atte.⌋ “Ig alanig Dawit nug anukka aab okkai Jerusalem awa dayom, dahil qaɗab am aguppa daatte, amge ag danab ah ag gemu Jerusalem appa daatteb amu, ahilagnu am gadonnab gadon. Ag maɗ anen anen oh, ag haen oh qagmak gamag ahak ele hetteb, da ag hekkulagnu ami amu, ag amu henan tuɗidna hetteb,

² amge da heppi, kekeɗ ag uɗin, Jerusalem oo mattan, danab aqadkkulagnu daan, appan danab ah ag guittak okkai aon, ag gaanna, mahiak okkai hekkulag. Jerusalem am danab mana mettaknu qaɗab qaɗeppa doɗ tiig gokkaɗeg laidtte, am amubia daakku.

³ Ag Jerusalem daatteb amu, da heppi, ahilag kekeɗ ag uɗin, ag daaglagnu ahilag aben Jerusalem taliliak aon bappaidna, ag taliliadna daanna, ag ahilag bannu babaittak aben amu ohppa bappaidna, ag ag aqaglagnu aɗ dimittim balal attannab aab talilittak bappaidkkulag.

⁴ Da heppi, ahilag kekeɗ ag anam heppeg, ag Jerusalem danab ah ag nena qena, uug naunab nau doon, ag danab nug wanppa niiaya, nai danab uma dayaya nai maditte bia mattiglag. Ao, ag ahilag mattiak baag am danab nug gappud teppu eleppa niiaya, nai miagib iitta maditte, ag amubia nai mattiglag. Ag baalag am dottog laa baag bia daakku. Ao, ag gappudppa appa nai otiptippa mattiglag.” Yawe Nug anam atte.

⁵ ⌊Ahilagppa anam bekku,⌋ amge Yawe Nug heeb, kekeɗ ahilkad ameg naɗi amu, ag am gappudnu kalukal bia daaglag. Ao, kekeɗ ameg naɗi amu, ag oo doyak ii doon nau hetteb ele, Nug heeb, ag ee aeg dappunkkeg, ulah iwale gotte bia daaglag. Yawe Nukka Ɠagattag Oh Ele, Nug pahanab ha,

⁶ Nug am ag Juda danab ah gumatta tula bekku. Hakkaɗ qeebeb, mim neebeb, oqotti huanak oobob, ulah kilibob heebeb, ulah laa ele huanak uɗiebeb, aab ewa naɗi dittia, keeke ewebeb, Nug tula bekku.

⁷ Amu wan ohppan ban danab huanak ag Jerusalem, nuhig aab aɗ ɠagattagnab ele, ag banelag uɗin, ban henan, oo mattan, aqaglagnu hekkulag amu, Yawe Nug heeb, ag am danab nug keeke tulppa anidtte bia daaglag. O ag danab nug keeke tuqan tuleglegppa anidtte, ag amubia daaglag.

⁸ Am inam bia daakku. Danab ameg naɗi wan ohppanu uɗin, qauko Sion ele ban hekkulag amu, ag am danab enug qeeqe, tuqan tulppa ee lana antta, eɗua aha, enug qeeqe daatte, ag amubia daaglag. O ag danab nug le baag diieye, tuqan tulppa le lanan dayaya antta eɗua aha, le baag diieye, beɗu gai-iitta daatte, ag amubia daaglag.

Propet hambuppak ag agakka buppualadtteb

⁹ Ag ⌊Juda, ag⌋ dabmak iitta ele oinna, ag dabmak kuɗumnab aotteb! Ag heeg, amelag gaɗue oitteb! Ag kaaka aqe oitteb, amge ag le ɠagattag lappig amunu, ag anam ii hetteb! Ag oinna, nena qena, ahan eɗun nena qetteb, amge ag le ɠagattag lappig amunu, ag anam ii hetteb!

¹⁰ Aɗinu? ⌊Ag doonna, Yawe oɗe ii dim lamidtteb amunu,⌋ Yawe Nug he, ag niin gad metteb. Nug he, ag propet danab ag amelag gaɗuom. Ao, Nug he, ag propet danab, ag amelag hautak daatteb.

^11-12 Ag propet danab ag Yawenu nai, Nug tuleglegppa ippunittom amu, nai amunu ag nai laa buk itoɗiakppa daatte, amge laa nug danab buk itoɗiak amu matulmanu hag meum; propet danab ag Yawenu nai daulagppa dootteb, amge nai buk itoɗiak amuppa daatte bia, ag nai amu diig ii dootteb. Laa ag buk itoɗiak amu aon, laa ebqak dootte ele mettan, “Ebqebeppe doognig,” appeg, Nug, “Iitta. Laa buk itoɗiak amu matulpanu hag meum amunu, da ebqekkulnu elele iitta,” akku, am amubia propet ag tuleglegppa keeke anidtteb ele mehuqkkulagnu elele iitta. O ag buk itoɗiak amu aon, laa buk itoɗiak ebqak ii dootte ele metta, “Ebqebeppe doognig,” appeg, nug, “Iitta! Da ebqak kobol ii doottem,” akku, am amubia propet ag tuleglegppa keeke anidtteb ele mehuqkkulagnu elele iitta.

¹³ Am Naɗi Nug atte. “Danab ah imu ag oɗelagppan nai mattiakppa da gumiɗna uɗitteb. Ao, ag nai mattiak ahilagppa da binal meɗatteb, amge ag oolag da ii meɗatteb. Ag dup nona binal metteb, amge ag danab dilag dabmakppaib, amu ag danab dilag ɗoppaib amu hetteb.

¹⁴ Ag anam hetteb amunu, da baula kobol okkai okkai, danab hekkunu elele iitta, da kobol amu heppi, danab ah imu ag ottaikkulag. Da anam heppi, danab doyak, dabmak ena ele, ahilag doyak, dabmak ena ele amuam iitta mekku. Ao, da heppi, danab ag doyak okkai ele, ahilag doyak okkai am iitta mekku, baula ii daama.” Yawe Nug anam atte.

¹⁵ Laa ag akka ahilag dabmakppa keeke hekkulagnu maittak aona, Yawe Nug amu doomanu ag dabmak ahilag amu lokkumkkulagnu uɗat okkai hetteb. Ao, ag ahilag hak gatatu ooppa henana, ag “Aun anigtte?” anana, o “Aun dookku?” atteb amu, ahilagnu gadonnab gadon.

¹⁶ Amu ag ahilag dabmak am eɗuaknab daatte. Ag waa keeke hak danab, nug wan nug amuppa keeke hette ele, nug wan amu ele aa laippu bia dabmettebte? Amu wan waa nug aha, danab waa amu heumnu, “Nug da ii heiɗom,” akkute? O wan waa laa nug aha, danab heumnu, “Nug keeke laa ii dootte,” akkute? ⌊Amge ag dabmak eɗutteb ele ag amu, ag anam bia hetteb.⌋

Butti aɗi amu haen enanag daakku

¹⁷ Amu haen elab iitta Lebanon wanppa ad kuɗum daattebppa, aben amuppa wan eɗua, dadnu wan ittag ele dayebeb, appa ee enanag baaba, meu huanak okku.

¹⁸ Haen amuppa ⌊Yawe Nug heeb,⌋ danab daulag ituak ele, ag danab laa buk itoɗiak ebqeebeb dooglag. Danab amelag gaɗuak ele ag, ag baula gatatu ooppa ii daamna. Iitta! Ag neegkkulag.

¹⁹ Haen amu uɗieb amu, danab ag akka ag onilag qeeg nette ele, ag Yawe, nuhig ehanittaknu oolag gamag ahakku. Ao, danab ag keeke iitta ele, ag Yawe, Nug Israel dilag Kayak Oppiaawak Ele, ag nuhig ehanittaknu oolag gamag ahakku.

²⁰ Aɗinu ag oolag gamag ahakku? Am inam. Danab ag oo doyak ii doon nau hetteb, ag iitta mekkulag. Amu danab ag Yawe, amu nuhikkud danab ah dilagnu ele ag aon aon aqatteb amu, ag padal mekkulag. Danab ah oh ag kobol nau hekkulagnu dabmenana oitteb amu, Yawe Nug heeb, ag nena qekkulag.

²¹ Danab nau amu, ag am laa ag hettoɗiakppa danab eheɗ laa ii he, nug eheɗ heum atteb. Ao, ag am laa ag hettoɗiakppa danab eheɗ ii heum laikkud, ag nug ehanittegeg, laa amu ag amu dilagnu pelem meeg, ag eheɗ aotteb. Ge, ag am laa ag hettoɗiakppa danab eheɗ ii he, ag hambuppun, “Nug eheɗ amu heum,” ag nai amu ag nug hamu yaatteb amunu, danab nug eheɗ ii heum, nug hamu guittak aotte.

²² Anam ⌊amge Yawe Nug heeb, Israel ag genab oolag eɗuglag⌋ amunu, Yawe, Nug Abraham hipuninnu qagaiettakppanu eɗua uhuqak heum ele, Nug Jakop buɗub dilagnu inam atte. “Israel danab ag baula uɗa nak ii doomna. Ge! Ag baula uɗa nak nau doon, iɗulag hakkab ii eppama. Iitta!

²³ Aɗinu? Da heppi, Jakop buɗub ag huana apatppeg, nid ahilkad kuɗumnab daappeg, ag amu anidna, haen amuppa amu, ag da onil oppiaawak ele dabmenana, ag dahil nai dim lamidkkulag. Ag da, da am Jakop buɗub dilag Kayak Oppiaawak Ele amu, ag da oppiaawak daattem doon autna aon, anan oiglag. Ao, ag da noolppa, da am Israel dilag Kayak amu, ag da noolppa ebehilag oh bodoetta le meebeb oiglag.

²⁴ Laa ag dabmak tutukku iitta ele ag diignu doyak tutukku aoglag. Amu laa ag dahil nai dim lamidkkulagnu uug doon nai heppig amu, ag da oɗel aon, dim lamidkkulag.” Yawe Nug anam atte.