Aisaia 28 - Nobonob Baibel

Naɗi Nug Israel dilag eheɗ hak, amunu nob madakkunu aum

¹ Amu Israel danab ah ag le lanana, spak metteb ele, ahilagnu am gadonnab gadon. Gemu ahilag aab anuqak, Samaria, aab amuam binag amahlak oppiaawak ele; nug aben laa wan ittag enanag ele, amuppa qauko nakok eleppa daatte. Amu Israel danab ah ag wain lanana, spak metteb ele ag Samaria onig attannab human, laa oh eɗattak anambia dootteb, amge iitta! Bala laa bunaɗkkunu mauɗe neekkak ena iitta daatte, aab amuam amubia daatte.

² Laa Naɗi eppegppa daatte amu, nug wan laappan danab, nuhikkud daup ag am ɠagattag ⌊ag Asirianu⌋, amu Naɗi Nug heeb, nug nuhikkud daup ele ag uɗin, ag Samaria heppeg nauhkku. Ag ais habppanu, gu ele, aria ulah huana eheɗ ele na, keeke he nauhtte bia, geha ag pahanab bena, heppeg nauha auta autanab aokku.

³ Israel danab ag spak mena, Samaria onig attannab human, laa oh eɗattak anambia dootteb, amge kekeɗ ag uɗin eheɗ tappan oɗoɗppeg, nug nauha niia, padal mekku.

⁴ Am inam bekku. Aab Samaria am binag amahlak oppiaawak ele, aben wan ittag enanag qauko nakok eleppa daatte, amge aab amuam ad fig meu tatam oɗutte, danab antta, paha eppeg bahia awa latte, am amubia daatte. ⌊Anam amu, geha kekeɗ ag uɗin, heppeg nauhkku.⌋

⁵ Amu haen amuppa amu, Israel danab ah oɗo yaak daaglag. Daanna oippeppeg, Yawe Nukka Ɠagattag Oh Ele, Nug king haɗ enanagnab bia ahilagnu dayaya, ahilag king daakku.

⁶ Yawe Nug geha danab ag epeɗiak danab daatteb, Nug ag nai doya mala hettoɗia epeɗia elele mettak kobol elele hekkulagnu doyak ena matteb heppeg, amu Nug daup ag aab okkainu odppa daan, kekeɗ ag ooppa nona, danab ah aqamnanu ib oo netteb ele amu, Nug ag ɠagattag aqadkku.

⁷ ⌊Amu anam aakku bekku, amge gemu⌋ Israel danab le lanak kobolppa daatteb amu, ag Israel danab ah gumadtteb. Propet danab, mana mettak danab ele oh le ɠagattag lana, spak menan, taataɗ qeegeg, hak ahilag am nauhom. Ag amubia oitteb amunu, dabmak ahilag eɗatte, maɗi ahilag amu, ag tutukku ii hetteb. Propet ag Kayak Nug tulppa keeke ippunatte, ag pehettak ii anidtteb. Mana mettak danab ele ag danab ah dilag keeke tutukku ii epeɗitteb.

⁸ Ag le ɠagattag huanaknab lanana bahaegeg, bahak ahilag amu balal oh tona ambeum. Balalppa aben ena laa iinab daatte!

⁹ ⌊Ag anam henana, ag dahilnu inam atteb.⌋ “Danab imu nug aun, amunu nug ig doyak megakkunu hette? Ao, nug am aun, amunu nug ig diignu doyak tutukku ippunikkunu hette? Ig am nid naunau, anilkad geha iikku huh aɗadppig, ag nai mattiglagnu, dabmak aoglagnu ele elele iitta, ig ag biate?

¹⁰ Nug nid naunau sul aotteb bia ihinigppa hette. Amuam, ‘Ippa ɗo daatte, appa ɗo daatte. Ippa na oiyak nahip gume! Appa na oiyak nahip gume! Ippunittak iguppa aweg! Ippunittak aguppa aweg!’ Nug anam anana, nug nai maditte ele amuib baubau maditte,” aon atteb.

¹¹ Anam amunu, ag da oɗel dab-ii-mekkulag dayeb, aria, Kayak nug laihnu danab, ag nailag laa, Israel ag ii dootteb ele amu, Nug danab amu maatteb, ag Israel gumadna uɗina, ag ag oɗelagppa nai madappeg dooglag.

¹² Kayak Nug matu wan imu ag mattowa, Nug ag amelagppa inam aum. “Imuam hik awa, oo maɗoɗ ele dayaknu aben laa. Danab ah ag uug dootteb ele, ag uɗin, ippa hik aweg! Imuam oo maɗoɗ ele dayaknu aben.” Nug anam aum, amge Israel danab ah ag nai amu doon dabmekkulagnu uuppig.

¹³ Ag uuppig amunu, Yawe Nug nukka geha ag sul madakku. Nug danab nid naunau doyak aoglagnu keeke digdignu awa uɗia, sul madatte, Nug amubia haaha, “Ippa ɗo daatte, appa ɗo daatte. Ippa na oiyak nahip gume! Appa na oiyak nahip gume! Ippunittak iguppa aweg! Ippunittak aguppa aweg!” awa akku. ⌊Nug sul baubau anam maatta hekku, amge doyak awaknu ib uug iitta amuppa ele ag uun heppeg, kaaka aqeb, ii dim lamidkkulag⌋ amunu, Yawe Nug heeb ag eheɗ nau aoppeppeg, ahilkad kekeɗ ag eɗadna, wan laappa diia ukka laih me dayak danab ah daaglagnu diin gokkulag.

¹⁴ Anam bekku amunu, ag Jerusalemnu danab okkai, ag Yawenu nai aon aon qedatteb ele, ag Yawenu nai doyeg!

¹⁵ Ag atteb. “Ig Mauhak ele nug tituanta nai qakkamut. Ao, ig mamak aben ele nai mattita, nug tituanta nai qakkamut amunu, uug nau okkainab laa ihinigppa bekkunu haaha, ii iqama. Iitta! Qe-eɗikka gokku,” atteb. Ag laa ele atteb am, “Ig heut, kayak hambuppuak ag ihinig padal mak eɗitteb ena dayaknu ehanittak daatteb. Ao, ig heut, kayak hambuppuak ag ihinig lokkuma dayaknu aben bia daatteb, ⌊amunu uug nau, okkainab amuam ihinigppa ii bema⌋,” aon atteb.

¹⁶ Ag anam atteb amunu, Naɗi Yawe Nug inam atte. “Antteg! Da geha Sion appa men ɠagattag, men enanag laa, ukku ɠagattag daakkunu ebappi dayebeb, ag amu qaɗeppa keeke oh heppeg tekku. Amu aun laa nug nuhignu ooppa genab dookku amu, nug ɠagattag, ena daakku.

¹⁷ Da amu hekkulnu amu da nai doya mala hettoɗia epeɗia elele mettak kobolib dim lamidkkul. Ao, da genab tutukku hak kobol dim lamitten hekkul. Ag kayak hambuppuak dilagnu, ‘Ag am padal mak eɗitteb ena dayaknu ehanittak ihinig daatteb’ atteb, amge gu, ulah huana ele uɗiya heeh, keeke nauhtte, amubia dabmak hambuppuak amuam iitta mekku. Ao, ag kayak hambuppuak dilagnu, ‘Ag am ihinig lokkumak aben daatteb’ atteb, amge le ui naɗi keeke oh ihe gotte bia, dabmak hambuppuak amuam nauhkku.

¹⁸ Ag Mauhak ele nug tituanna nai qagappig daatte amu, da nai amu heppi nauhkku. Ao, ag mamak aben ele nai mattin, nug tituanna nai qagappig amu, da heppi, nai amuam na qekku amunu uug nau, okkai amu uɗieb, ag nauhna autnanab aoglag.

¹⁹ Haen adekkuppa uug nau, okkai amu uɗikku amu, uug amuam ag diia auta aokku. Amu uug amu haen kuɗumnab amun, tuqan ele anidkkulagib.” Naɗi Yawe Nug anam atte. Amu aun aɗi ag nai imu doon, diignu doyak tutukku aoglag amu, ag aakku eheɗ nau baɗan daaglag.

²⁰ Aɗinu ⌊ag anam baɗaglag⌋? Danab nug niikkunu he, niiak balal tutu daye, nug beɗu taiedakkunu elele iitta daya, nug eheɗ dootte, amubia laa nai imu dooglag amu, ag ⌊bu aoglagnu doon,⌋ eheɗ dooglag. Ge! Laa blanget laa laakkunu he, nakok eppe, elele niikkunu elele iitta daya, eheɗ dootte, amubia danab nai imu dooglag ele amu, ag ⌊bu aoglagnu doon,⌋ eheɗ dooglag.

²¹ Yawe Nug danab ah bu madakkunu Nug anukka Perasim qaukoppa heum bia hekku. Ao, Nug danab ah bu madakkunu Nug oolnu noak Gibeon, amuppa heum ele, Nug amubia hekku. Nug nuhig uɗat, danab dooglagnu elele iitta ele, Nug nuhig uɗat amu hekku. Ao, Nug uɗat laa, Nug uɗat amu haen kuɗum ii hette ele, Nug amu hekku.

²² Naɗi, Nug Yawe Nukka Ɠagattag Oh Ele, Nug da amelppa Nug genab wan imu oh heeb nauhkkunu ɗo meum daattenu aum amunu, ag Yawe nai maditte, ag amunu imak uueg! Ag amu ii uuglag dayeb, Yawe Nug bu mettak ahilag tuɗitteb, awaknu daatte eɗittak, okkainab mekku.

²³ Ag da aɗi amelagppa attem imu doyeg! Ao, da nai madittem imunu, ag daulag human doon autna aon, dabmetteg!

²⁴ Dad hak danab nug dad nuhigppa wan buuawaib ii daatte. Ao, dad hak danab nug dad nuhigppa masinppa wan aduduɗak hak aakkuib ii daatte.

²⁵ Iitta. Nug wan elele babaitta mala, nug ee tumu iɗu iɗunu tom aben abenppa eppaladtte.

²⁶ ⌊Nug amu hettenu diig am,⌋ Kayak, nuhig Kayak, Nug amu haknu kobol ippunidtte. Ao, Kayak Nug ib tutukku dim lamitta, amu oh hekkunu doyak medatte.

²⁷ Amu danab ag karowei meu aoglagnu, ag ee aeg mumuɗaknu keeke palang otala okkaippa hak ii tonan mumuɗadtteb. O ag kumin meu mumuɗadna aoglagnu wilkar ii duttuneg ukka tona gotte. Iitta! Ag karowei meu aoglagnu ag ad qetak okkai biappa tutuna, ag kumin meu aoglagnu ag ad qetak nakokppa amu tututteb.

²⁸ Ag ee aeg mumuɗakppa nauhkkunu elele amunu, danab nug ee aeg mumuɗak haahaib ii mumuɗtte. Ge, danab nug wilkarppa ee aeg mumuɗtte, amge nug hos wilkar eeɗtte ele am ee aeg heeb nauhmanu dabmetta auta aotte.

²⁹ Doyak imu oh am Yawe Nukka Ɠagattag Oh Ele, nuhigppanu uɗitte. Nug ulum ena ena ele megatte. Nug doyak dabmak okkai okkai, laa oh eɗattak ele.