Aisaia 27 - Nobonob Baibel

Yawe Nug geha dimppa Israel ehanatteb, ag laa waappa ii daamna

¹ Haen laa, haen amuppa amu Yawe Nug doɗ nau laa onig lewiatan, lewiatan nug am mat laa gai-iittanab oitte amubia, Nug doɗ nau amu bu medakku. Nug qep elab ɠagattagnab ele nuhig amuppa Nug Lewiatan, lewiatan nug am mat laa itoɗiak daatte amubia, Nug doɗ amu qep amuppa nob nau medakku. Ge, Nug am doɗ naɗi naunab nau amu yuppa daatte amu, Nug qeeb mauhkku.

² Haen amuppa ⌊Yawe anam hewowa, Nug inam akku.⌋ “Ag grep dad enanagnu ahi etteg!

³ Da Yawe, da grep dad amu gumattem. Da hanhan le medette, laa appa uɗia eheɗ laa hemanu amu, da haen oh amun tuqan ele gume daattem.” Nug anam akku.

⁴ ⌊Amu Kayak Nug anam mattiowa, Nug inam ele akku.⌋ “Da oo nauhak laa ii doottem. O gadon, uud keeke qaun ele ag grep dad dahilppa appa daaloblob, da ag banelag ukken heppi, aab aɗu am ag oh ewatta maladlo.

⁵ Amge dahilad danab ah dilag kekeɗ ag da ahilag padal mak eɗitteb ena dayaknu ehanittak daakkulnu oolag daatte dayeb amu, ag da ele maɗoɗ daagnignu unuqiɗkkulagoitte. Ao, ag da ele maɗoɗ daagnignu unuqiɗkkulagoitte,” awa aum.

⁶ Amu qinob dimppa, haen laappa ⌊Yawe Nug heeb⌋, Jakop buɗub ag ad diɗi wanppa noum daatte bia daaglag. Ao, Israel danab ah ag am ad haɗag qa, meu metta, meu huanak otte, ag amubia daaglag. Amu haen amuppa Israel ag anam daappeg, ahilag meu ena wan oh tonadkku.

⁷ Amu Yawe Nug Israel dilag kekeɗ bu madakku, amubia Nug Israel bu amubia madakkute? Nug laa Israel danab aqappeg mauhkkulag aqeb mauhkkulag, amubia Nug Israel aqeb mauhkkulagte? Iitta. Nug heeb, Israel dilag kekeɗ ag nauhna autnanab aoglag, amge

⁸ Nug heeb, Israel ag guittak aoglag, amge ag nauhna autnanab ii aomna. Nug heeb, kekeɗ ag uɗin, Israel eɗadna, diin gona maadppeg, Israel ag diia ukka laih me dayak danab ah wan laappa daaglag. Ge! Nug heeb, kaɗag ɠagattagnab uɗia, ad uɗug keeke iwale gotte, amubia Israel ag wan laappa maniguittak bia anam gona daaglag.

⁹ Yawe Nug anam hekku amunu, amu beeb, Israel wanppa kayak hambuppuak qaɗab laa ena ii daama. Iitta. Oh nauhadna autnanab aon, gappud bia daaglag. Israel wanppa kayak hambuppuak Aserah dabmekkulagnu biidod laa qappak ii daama. Amu qaɗab laa, qaɗab amuppa danab ag kalu danab ile muttuɗig enanag bette ele manatteb amu, kayak hambuppuak dilag qaɗab laa amu ele ii daama. Iitta! ⌊Amu beeb, Israel ag ele oolagppa keeke amu uuppeg amu, Yawe Nug⌋ ib amuppa, Nug Jakop buɗub dilag eheɗ haknu nob nau nuhig ɠagattag naɗippa heeb, iitta mekku. Ao, ag hipuninnu nob nau aolob, amge ag ii aomna.

¹⁰ Amu Israelnu aab okkai ɠagattag aɗ ele am hele-ettak daaglag. Appa danab ah ii daamna. Makau gaiɗ ag appa ee lanan daan, appa ele niiglag. Ag ad eppegppan uɗug aon lappeg,

¹¹ eppeg qaɗaiedappeg, ah ag uɗin, qiin aon gona, aab ilaglag. Aɗinu ⌊uug amu Israel dilagppa bekku⌋? Israel danab ah ag diignu doyak tutukku am iitta ele. ⌊Ag Yawe uun oitteb.⌋ Anam amunu, laa Nug ag hattom ele, Nug ahilagnu oo ii mattama. Ao, laa Nug ag daaglagnu hattom amu, Nug ahilagnu ena ii doya, keeke ena ii mattama. Iitta.

¹² Amu haen amuppa am inam bekku. Yawe Nug le Yupretis appanu uɗia uɗia, le onig Isip Le, le amuppa batak Nug danab nug ee aeg, dappunkkeg ele oh laippu daamanu, nug danab ee aeg mumuɗe, piɗe piɗe daattep, amubia Nug Israel danab ah epeɗia, otiatta heeb, laippu ippanu, laippu appanu amu, ag eɗun, ahilag wanppa daaglag.

¹³ Ge, danab trampet okkai iwale, danab dotteb, amubia Yawe Nug heeb, laa kekeɗ ag lamatteg, Asiria wanppa gona qettoɗna daatteb, laa Isip wanppa gona qettoɗna daatteb ele amu, ag appanu eɗun uɗin, Jerusalem appa qaukoppa, qauko amuam Kayaknu tituanak daatte, ag appa Yawe noobppa dup nona Nug binag mekkulag.