Aisaia 26 - Nobonob Baibel

Yawe Nug geha heeb, danab ah nuhikkud amu, ag laa oh eɗadkkulag

¹ Geha dimppa haen laa uɗieb, danab ah Juda wanppa daatteb, ag geha ahi imu ettaglag: Ig am aab okkai ɠagattagnab ele. Yawe Nug he, Padal ii maknu ehanittak nuhig am aab amunu aɗ, wan buue te aɗ itak ele daatte.

² Genab tutukku hak danab ah, ag aab amu ooppa nokkulagnu amu, ag laa ag aab okkainu od okkai oh matulatteg! Ao, danab ah ag Yawenu oo metta ii uuak kobol dim lamidtteb ele amu, ag uɗin, aab amu ooppa nokkulagnu ag laa ag aab okkainu od okkai oh matulatteg!

³ O Yawe, danab ah ag nahipnu dabmenan oin, dabmak amu ɠagattag aɗan oitteb ele amu, na hee, maɗoɗ enanagnab ag oolagppa daatte. Aɗinu? Ag nahipnu oolagppa genab dootteb.

⁴ Yawe, ge Yawe, Nug am ihinig lokkumak aben ɠagattag, men laa hanhan daatte bia daatte. Nug geha anamib haen oh daakku amunu, ig hanhan nuhignu oonigppa genab dootu!

⁵ Amu Yawe Nug dada danab ah onilag ele, Nug ag onilag qe nette. Ao, Nug ahilag aab okkai loppaɗe, aab amunu lag, aɗ keeke ele wanppa na qette. Nug he, aab amu nauha auta aotte. Ao, Nug he, aab amu na qa gappudppa daatte.

⁶ ⌊Yawe Nug anam hette amunu,⌋ daɗek danab ah ag aab ahilag baelagppa tabatabeɗatteb. Ao, danab ah keekenu tutu mak daatteb amu, ag aab baelagppa tabatabeɗatteb.

⁷ Ib genab tutukku hak danab ah dim lamidtteb ele, ib amuam tak nak okkai, o tak nak naunau laa iitta. O Yawe, na haen oh kobol genab tutukkuib hettem amu, na genab tutukku hak danab ah dilag ib ena babaittette, tak nak laa ii dayeye, ag amuppa oitteb.

⁸ O Yawe, ig ihinig oiyak ohppa nahip ɗo dim lamidtata, amenig na anidtata, naib amen mekkunig. Ig na onin, binan okkai ele daakkutnu oonig okkai daatte.

⁹ Tuqanppa, dabmak dahil oh nahip-ppa dayeye, da na ele daagnihnu ool huan daatte? Wagɗeb buttua amu, da ouɗil na ele oh daagnihnu oo huana hette. Aɗinu? Haen na nai doya mala hettoɗia epeɗia elele mettak kobol dim lamidna, wan danab ah oh toliadna gumadttem amu, haen amuppa wanppan danab ah ag genab tutukku hak kobolnu dabmak aotteb.

¹⁰ Nau hak danab ah amu, ag genab tutukku hak kobol ii dootteb. Na ahilagnu kobol ena attem hekkut am ii ehanadma. Iitta. Ag eɗun, genab tutukku hak kobol hekkulagnu iinab dabmemana. Ag danab ah genab tutukku hetteb imu oolagppa daatteb, amge ag ahilag hak nau am ii uutteb. Ag tuɗidna henana, ag Yawe, Nug dagom onig ɠagattag ele daatte amu, ag amu dab-ii-metteb. Iitta!

¹¹ O Yawe, na nau hak danab ah ele nob nau madakkutnu na eppen humame daattem, amge ag amu ii dabmetteb. Anam amu, na nahipad danab ah ehanadkkutnu yag-nab-bak doottem ippunadppe, nau hak danab ag amu anidna, dabmak eheɗ aoppig dooppeg, uɗalag nekkunu ool daatte! Ge, na heppe, aab aɗu na nahipad kekeɗ dilagnu bappaidme amu, aab aɗu amuam hipunin danab ah ewadkkunu oɗ medattem.

¹² Ig aɗi uɗat ena hemut ele amu, na ihinig uɗat amunu ulum mekkae, ena beum amunu, O Yawe, na heppe, nahip maɗoɗ ihinigppa ba daakku, ⌊da oolppa genab doottem⌋.

¹³ O Yawe, na am ihinig Kayak. Okkai laa ag ig gumigppig, amge ig na oninib binag mettem.

¹⁴ Gemu danab okkai ig gumigppig ele amu, ag mauhppig. Ag laa ii daatteb, ag geha eɗun bau ii ahamna. Na bu mattae, ag nauhna autnanab aoeg, danab ah ag gemu danab amu onilag baula ii dabmetteb. Iitta.

¹⁵ Yawe, na ihinig wannu tom am, na tuɗidna hee, wan ihinig okkainab daatte. Ao, na hee, ihinig wan am okkai eppom daatte. Na anam heme amunu, nahip binag amahlak oppiaawak ele am okkainab beum daatte.

¹⁶ O Yawe, nahipad danab ah ag uug nau doon oippig, haen amuppa ag na mattidppig. Ao, na ag toliadna, bu mattaeye, ag ɠagattag iitta daan, otiptippaib na unuqidppig.

^17-18 ⌊Na noomppa ig eheɗ heut,⌋ na bu mekkame ⌊amunu,⌋ ig ah nid aokkunu guitte, beɗu itoɗia akkoniaya, gayaya hette bia na noomppa hetat daamut. O Yawe, ig guittak okkai nau aota, ig dabmak ihinigppa, “Keeke ena laa geha bekku,” doomut, amge iitta. Ig ehanitteb padal ii maknu uɗat laa wanppa heut ii beum. Ig kekeɗ tappaladpput noppeg, ig hepput, ihinig dayak ena bekkunu amu, ig ii heut beum.

¹⁹ Ig anam daamut, amge ⌊O Yawe, nahipad⌋ huu mauhna, moɗppa daatteb, ag geha eɗun ahaglag. Ag beɗulag eɗua, bau ahakku. O ag danab ah, ag matmatppa niitteb amu, ag eɗun, bau ahan gamalag ahebeb, ag eig! Aɗinu? Yawe Nug heeb, tuqan baito wan qaɗaiettakppa na, leppu mette, gikkiɗah bau bette, amubia ag moɗppa daatteb ele, ag eɗun ahaglag.

²⁰ O danab ah dahilad, ag laulag ooppa nona, od maneg! Ag lokkumna haen nakokib oppoɗi bak haen imu iitta mekkunu ameg meig!

²¹ Aɗinu? Antteg! Yawe, Nug wanppan danab ah ag nau heppignu nob naunu bu madakkunu, Nug nuhig aben hab aabppa daatte amu uua, Nug nette. Amu wan nug geha danab tiilag danab laa aqappig, tiilag amu tuɗitta, ii lokkumadma. Iitta. Wan nug geha kobol nau amu oh danab ag heppig, am amu oh heeb, miag atiglag.