Aisaia 25 - Nobonob Baibel

Yawenu ena heme ana, binag ma, unuqittaknu ahi

¹ O Yawe, na dahil Kayak! Da na binan mein, na onin attan humakkul. Aɗinu? Na keeke oh hekkutnu anukka maittak aome amu, na maittak amunu oo metta ii uuak kobol dim lamidnana, aakku heme. Amu, na keeke heme amu, keeke amuam keeke okkainab, danab andatta ottaitte.

² Amu na aab okkai hatte, gemu ag kinipan ameg okkai hume tak daatteb. Ao, na aab ɠagattag aɗ ele ele hatte, oh nauhppig. Na hatte, laihnu danab dilag aab, aab amuam ban haknu aben ɠagattag amu, aab amu oh iitta meppig. Ag eɗun, aab amu baula ii bappaidmana. Iitta.

³ ⌊Na anam heme⌋ amunu, danab ah wan ɠagattagppanu, ag geha na binan okkai attan humaglag. Ao, wan laappan danab, danab amu ag laanu oo doyak ii doon nau hadatteb, ag nahipnu ebehilag oh bodoetta le mekku.

⁴ Aɗinu ⌊ag anam hekkulag⌋? Na daɗek danab dilag padal mak eɗitteb ena dayaknu ehanittak dayeye, uug haenppa ag ena daappig. Ao, danab ah keekenu tutu mak daan oitteb ele amu, ahilag uug nau ag tonattette, na ahilag padal mak eɗitteb ena dayaknu ehanittak dayeye, ag ena daappig. Danab ag laanu oo doyak ii doon nau hadatteb ele amu, hak ahilag am ulah ɠagattag uɗia, aɗ duttune ⌊na qette⌋ bia daatte.

⁵ Ao, atu taɗakppa aam eheɗ gakkaɗa, ⌊ad keeke oh he nauhtteb⌋, ahilag hak am amubia daatte, amunu O Yawe, na kekeɗ oɗelag qamute, ahilag muttub qa ewak iitta mette. Lombig aamnu gakkaɗak qehakke, atu oug mette, na amubia hettem. Na amu hettem amunu, danab ag laanu oo doyak ii doon nau hadatteb ele amu, ag ahilag gamag ahak iitta mette.

⁶ Sion qaukoppa, Yawe Nukka Ɠagattag Oh Ele, Nug geha ee lanak hobul okkai okkai, ee enanag digdig appa bappaidkku. Hobul amuppa amu, doɗ digdig teppulag ena ena, am wain digdig enanag lanak baag ubuhinab ele, amu ele daakku. Nug danab ah wan ohppanu ag uɗin, hobul amuppa qagmekkulagnu bappaidkku.

⁷ Qauko amuppanu amu, Yawe Nug heeb, danab ah ag baula ii mauhmana ⌊amunu, mauhaknu oo doyak baula ii daama⌋. Ao, Nug heeb, uug danab ah oh baula ii aqama ⌊amunu, uugnu guittak baula ii doomna⌋. Iitta.

⁸ Naɗi Yawe Nug geha mauhak amu heeb iitta meeb, geha mauhak amu ahilagppa ii bema; hanhan anamib daakku. Nug geha danab ah oh amelag leb amu oppieb, iitta mekku. Amu Nug geha danab ah nuhikkud wan ohppa uɗa nak nau guittak ele ahilagppa daatte amu heeb, iitta mekku. Yawe Nug anam mattiom daatte amunu, am anam bekku.

⁹ Haen keeke amu beppeg, danab ah ag inam akkulag. “Antte! Imuam ihinig Kayak. Ig nuhignu oonigppa genab doomut, Nug ig ehanikke, ig padal ii memut. Ao, imuam Yawe, ig nuhignu oonigppa genab doomut, Nug ig padal mematanu ehanikkom amunu, ig oonig gamag huan ahaɗ!” Ag anam akkulag.

¹⁰ ⌊Aɗinu ag anam akkulag?⌋ Yawe Nug geha Sion qauko anam ena atognokku, amge Moap aɗi, ag eheɗ naunab aoglag. Makau ag gikkiɗah qaɗaiettak tappan oinna biieg, gikkiɗah biiak ele kaboliak daatteb, kekeɗ ag Moap dilagnu amubia hekkulag.

¹¹ Moap ag am geha danab nug yu gamagppa padal memanu baɗa, yu ihippa langppa gokkunu wagai ma mutui ma gotte, ag amubia hekkulag. Ag geha keeke digdignu uug mawak nau amu eɗidkkulagnu hekkulag, amge Yawe Nug geha ahilag doyak, am ahilag ɠagattag ele tappeb nokku amunu, ag aɗi keeke laa ag ehanadkkunu hekkulag am geha ehanadkkunu elele iitta.

¹² Kayak Nug geha aab okkai ahilagnu aɗ attan, ɠagattag ele, Nug amu oh loppaɗeb gappudppa nekku. Gemu aɗ amu attan, ɠagattag ele daatte, amge Nug geha heeb, ag nena qena, wanppa nokkulag.